ຜູ້ຈັດການທີມ ແມນຢູ ຍອມຮັບ ຢູເວນ ຄຸນນະພາບເໜືອກວ່າ
ໂຊເຊ ມູຣິນໂຢ ຜູ້ຈັດການທີມສະໂມສອນ ແມນເຊັສເຕີ ຢູໄນເຕັດ ໃຫ້ສໍາພາດພາຍຫລັງເສຍໃຫ້ ຢູເວນຕຸດ 0-1 ຄາບ້ານ ການແຂ່ງຂັນຢູຟາ ແຊມປ້ຽນລີກ ກຸມເອ ໃນວັນທີ 23 ຕຸລາຜ່ານມາວ່າ: ຕ້ອງຍອມຮັບວ່າ ຄຸນນະພາບຂອງຢູເວນ ຊຸດນີ້ເໜືອກວ່າ ແມນຢູ ໄປອີກລະດັບໜຶ່ງ ທັງປະສົບການ ແລະ ຄວາມສະໝໍ່າສະເໝີໃນເກມ.
ຜູ້ຈັດການທີມ ແມນຢູ ຍັງກ່າວອີກວ່າ: ສະໂມສອນ ຢູເວນຕຸດ ມີກອງຫລັງທັງ 2 ຄົນທີ່ຄອຍຄຸມແນວຮັບ ເຮັດໃຫ້ແນວບຸກຂອງເຂົາສາມາດບຸກໄດ້ສະບາຍໃຈ ແລະ ມີອິດສະຫລະ ເນື່ອງຈາກໝັ້ນໃຈວ່າຕໍ່ໃຫ້ເສຍບານໃຫ້ຄູ່ແຂ່ງ ກອງຫລັງກໍສາມາດປ້ອງກັນໄດ້ ແລະ ສິ່ງດັ່ງກ່າວເຮັດໃຫ້ ທີມຢູເວນ ເປັນທີມທີ່ນັບມື້ຫລິ້ນດີຂຶ້ນ.
ອີກຢ່າງ ຜູ້ຫລິ້ນຂອງ ແມນຢູ ສ່ວນຫລາຍໄດ້ຮັບບາດເຈັບມາຈາກຊ່ວງພັກທີມຊາດ ເຮັດໃຫ້ຕ້ອງຈັດຕໍາແໜ່ງຜູ້ຫລິ້ນຕົວສໍາຮອງ ແຕ່ລຸກທີມແຕ່ລະຄົນກໍມີຄວາມພະຍາຍາມຢ່າງເຕັມທີ່.
