ໂຕໂຢຕ້າ ຄັດເລືອກນັກກິລາ U15 ກຽມເຂົ້າແຂ່ງຂັນທີ່ ສຕລ
ສະໂມສອນ ລາວໂຕໂຢຕ້າ ເອັຟຊີ ຄັດເລືອກນັກກິລາລຸ້ນອາຍຸ 15 ປີ ຫລື U15 ເພື່ອກຽມເຂົ້າຮ່ວມການແຂ່ງຂັນບານເຕະລຸ້ນອາຍຸບໍ່ເກີນ 15 ປີ ທີ່ສະຫະພັນບານເຕະແຫ່ງຊາດລາວ (ສຕລ) ຈັດຂຶ້ນລະຫວ່າງຕົ້ນເດືອນພະຈິກນີ້.
ທ່ານ ກິດສະດາ ທອງເຄນ ຄູຝຶກສະໂມສອນ ລາວໂຕໂຢຕ້າ ເອັຟຊີ ໃຫ້ສໍາພາດວ່າ: ການຄັດເລືອກຄັ້ງນີ້ ພວກເຮົາຕັ້ງເປົ້າໝາຍເອົານັກກິລາຈໍານວນ 18 ຄົນ ເພື່ອບັນຈຸເຂົ້າສະໂມສອນຂອງພວກເຮົາ ເຊິ່ງການຄັດເລືອກໄດ້ຈັດຂຶ້ນໃນວັນທີ 23 ຕຸລາຜ່ານມາ ໂດຍມີນັກກິລາເຂົ້າຮ່ວມທັງໝົດ 60 ກວ່າຄົນ, ໃນນັ້ນ ມີນັກກິລາທີ່ມາຈາກຕ່າງແຂວງຈໍານວນ 5 ຄົນ. ສໍາລັບການຄັດເລືອກຄັ້ງນີ້ເພື່ອກຽມຄວາມພ້ອມເຂົ້າຮ່ວມການແຂ່ງຂັນຊີງຂັນລຸ້ນອາຍຸບໍ່ເກີນ 15 ປີ ທີ່ ສຕລ ຈະຈັດຂຶ້ນໃນວັນທີ 3 ພະຈິກນີ້. ສ່ວນລາຍຊື່ທີ່ຖືກຄັດເລືອກແມ່ນຈະປະກາດວັນທີ 29 ຕຸລານີ້.
