ສຸຂະພາບ ແລະ ຊີວິດດີຂຶ້ນໄດ້ເລີ່ມຕົ້ນຈາກການນອນຕື່ນເຊົ້າ
– ເຮັດໃຫ້ໄດ້ເຫັນແສງຕາເວັນຍາມເຊົ້າທຸກມື້ : ການຕື່ນເຊົ້າທັນແສງຕາເວັນອ່ອນໆຈະເຮັດໃຫ້ເຮົາຮູ້ສຶກສົດຊື່ນ ແລະ ມີແຮງໃນການເຮັດວຽກຫລາຍຂຶ້ນ. ໃນຂະນະທີ່ຄົນທີ່ນອນຕື່ນສວາຍໆຈະບໍ່ຄ່ອຍມີແຮງ ທັງຍັງເຮັດໃຫ້ຮູ້ສຶກບໍ່ສົດຊື່ນຫ້າວຫັນນຳອີກ.
– ເຮັດໃຫ້ທ່ານຕິດນິໄສຕື່ນເຊົ້າ : ການຕື່ນເຊົ້າຕິດຕໍ່ກັນເປັນເວລາດົນຈະເຮັດໃຫ້ທ່ານສາມາດຕື່ນເຊົ້າໄດ້ເອງໂດຍອັດຕະໂນມັດ ບໍ່ວ່າຈະເປັນມື້ເຮັດວຽກທີ່ຕ້ອງຕື່ນເຊົ້າ ຫລື ມື້ພັກກໍຕາມ ເຊິ່ງແນ່ນອນວ່າມັນເປັນຂໍ້ດີທີ່ສຸດ ເພາະທ່ານຈະບໍ່ຕ້ອງມານັ່ງເຄັ່ງຄຽດໄປກັບການຕື່ນສວາຍ.
– ຊ່ວຍໃຫ້ກາເຟລົດຊາດດີຂຶ້ນ : ການຕື່ນເຊົ້າກ່ອນທີ່ຕາເວັນຈະຂຶ້ນ ແລ້ວລຸກມານັ່ງດື່ມກາເຟເບິ່ງແສງຕາເວັນໃນຕອນເຊົ້າເຮັດໃຫ້ລົດຊາດກາເຟແຊບຂຶ້ນຫລາຍ ທັງຍັງຮູ້ສຶກເພີດເພີນນຳອີກ.
– ໄດ້ເບິ່ງເຫັນແງ່ມຸມໃໝ່ໆ : ສຳລັບຄົນທີ່ບໍ່ຄ່ອຍໄດ້ຕື່ນເຊົ້າຈະຮູ້ສຶກວ່າການຕື່ນເຊົ້າເຮັດໃຫ້ເບິ່ງເຫັນແງ່ມຸມໃໝ່ໆທີ່ບໍ່ເຄີຍໄດ້ເຫັນ ບໍ່ວ່າຈະແມ່ນອາກາດດີໆ ຫລື ບັນຍາກາດທີ່ມິດງຽບໃນຕອນເຊົ້ານີ້ ຍັງບໍ່ລວມເຖິງວິຖີຊີວິດຂອງຜູ້ຄົນທີ່ຕື່ນເຊົ້າທີ່ຈະເຮັດໃຫ້ທ່ານຮູ້ສຶກດີໄປນຳ.
– ມີເວລາຫລາຍຂຶ້ນ : ການຕື່ນເຊົ້າຈະເຮັດໃຫ້ທ່ານມີເວລາເຮັດຫຍັງໄດ້ຫລາຍຂຶ້ນໂດຍບໍ່ຮູ້ໂຕ ເຊິ່ງອາດເຮັດໃຫ້ວຽກຫລາຍໆອັນທີ່ຍັງຄ້າງຢູ່ສຳເລັດຮຽບຮ້ອຍໄດ້ ທັງຍັງຊ່ວຍເຮັດໃຫ້ປະສິດທິພາບຂອງວຽກດີຂຶ້ນນຳອີກ. ດັ່ງນັ້ນໃຜທີ່ກຳລັງມີວຽກທັບຖົມຢູ່ຫລາຍ ຈົນເຮັດບໍ່ທັນລອງຕື່ນເຊົ້າມາສະສາງ ຮັບຮອງວ່າທ່ານຈະແປກໃຈກັບປະລິມານຂອງວຽກທີ່ເຮັດສຳເລັດຮຽບຮ້ອຍໃນມື້ນັ້ນ.
– ໄດ້ກິນເຂົ້າເຊົ້າ : ເຂົ້າເຊົ້າເປັນຄາບສຳຄັນທີ່ສຸດຂອງມື້ ເຊິ່ງຈະເຮັດໃຫ້ທ່ານມີພະລັງງານໃນການເຮັດວຽກໄດ້ໝົດມື້ ທັງຍັງດີສຳລັບຄົນທີ່ກຳລັງຫລຸດຄວາມຕຸ້ຍ ເຊິ່ງການຕື່ນເຊົ້າຈະເຮັດໃຫ້ທ່ານກິນເຂົ້າເຊົ້າທັນໄດ້ໂດຍບໍ່ຕ້ອງຟ້າວຟັ່ງໄປເຮັດວຽກ.
– ໄດ້ອອກກຳລັງກາຍຫລາຍຂຶ້ນ : ອອກກຳລັງກາຍຕອນເຊົ້າດີຕໍ່ຮ່າງກາຍ ແລະ ເຮັດໃຫ້ເຮົາແຂງແຮງຫລາຍຂຶ້ນ ເຊິ່ງການຕື່ນເຊົ້າຈະເຮັດໃຫ້ໄດ້ອອກກຳລັງກາຍຫລາຍຂຶ້ນ ແລະ ເຮັດໃຫ້ຮູ້ສຶກສົດຊື່ນຫ້າວຫັນໄດ້ໝົດມື້.
– ໄດ້ຮູ້ຂ່າວສານກ່ອນຄົນອື່ນ : ບໍ່ວ່າຈະເປັນຂ່າວສານຈາກໜັງສືພິມທີ່ສົ່ງມາທຸກເຊົ້າ ຫລື ຈະເປັນການລາຍງານຂ່າວໃນຕອນເຊົ້າ.
– ບໍ່ຕ້ອງຟ້າວຟັ່ງ : ການຕື່ນແຕ່ເຊົ້າຈະເຮັດໃຫ້ທ່ານສາມາດເຮັດກິດຈະວັດຕ່າງໆໄດ້ຢ່າງບໍ່ຕ້ອງຟ້າວ ທັງຍັງບໍ່ຕ້ອງກັງວົນວ່າຈະໄປເຮັດວຽກ ຫລື ໄປໂຮງຮຽນບໍ່ທັນ ເພາະຍິ່ງຕື່ນເຊົ້າກໍຍິ່ງເດີນທາງສະດວກ ລືມໄປໄດ້ເລີຍເລື່ອງການປຳ້ບັດ ຫລື ສະແກນນິ້ວມື້ເຂົ້າວຽກບໍ່ທັນ.
– ເຮັດຫລາຍຢ່າງແລ້ວໄວຂຶ້ນ : ມີຫລາຍໆຢ່າງທີ່ຕ້ອງໃຊ້ເວລາດົນໃນການເຮັດໃຫ້ແລ້ວ, ແຕ່ຖ້າທ່ານຕື່ນເຊົ້າ ແລະ ເລີ່ມເຮັດໄປເທື່ອລະຢ່າງ ຫລາຍໆຢ່າງກໍແລ້ວໄປໄດ້ໂດຍບໍ່ຕ້ອງກັງວົນຫລາຍ.
– ບໍ່ຕ້ອງອາໄສໂມງປຸກ : ການຕື່ນເຊົ້າຈະເຮັດໃຫ້ທ່ານຕິດເປັນນິໄສຈົນລືມໂມງປຸກໄປເລີຍ ຮ່າງກາຍຈະປຸກໃຫ້ທ່ານຕື່ນໃນເວລາເກົ່າ ເຊິ່ງເປັນເວລາໃນຕອນເຊົ້າບໍ່ຕ້ອງເປັນຫ່ວງເລື່ອງຕື່ນສວາຍ ຫລື ລຳຄານສຽງໂມງປຸກ.
– ປ່ຽນຈາກໃຫ້ຄົນອື່ນຖ້າ ໄປເປັນຄົນທີ່ໄປຖ້າຄົນອື່ນ : ການໃຫ້ຄົນອື່ນຖ້າອາດຈະບໍ່ເປັນເລື່ອງດີປານໃດ ຍິ່ງຖ້າເປັນມື້ທີ່ມີວຽກທີ່ຕ້ອງເດີນທາງຕະຫລອດ ແຕ່ຕ້ອງໃຫ້ຄົນອື່ນມາຖ້າ ກໍອາດຈະສ້າງຄວາມໝຸດໝັດໃຫ້ຄົນຖ້າໄດ້. ສະນັ້ນຢ່າໃຫ້ຄົນອື່ນຖ້າ ປ່ຽນໂຕເອງໃຫ້ຕື່ນເຊົ້າຂຶ້ນແລ້ວໄປໃຊ້ເວລາຖ້າຄົນອື່ນດີກ່ວາຈະໄດ້ບໍ່ຕ້ອງຟ້າວ.
– ບໍ່ພົບບັນຫາລົດຕິດ : ລົດຕິດເປັນບັນຫາທີ່ໜ້າເບື່ອຂອງຄົນທີ່ຕື່ນສວາຍ ເພາະຍິ່ງຕື່ນສວາຍເທົ່າໃດ ການສັນຈອນຍິ່ງຕິດຂັດ.
– ໄດ້ເລີ່ມຕົ້ນມື້ໃໝ່ກ່ອນຄົນອື່ນ : ສຳລັບຄົນທີ່ຕື່ນເຊົ້າ ແລະ ໄປຮອດບ່ອນເຮັດວຽກແຕ່ເຊົ້າ ຈະຕ້ອງຮູ້ສຶກດີທີ່ຈະໄດ້ເລີ່ມເຮັດວຽກກ່ອນຄົນອື່ນ ເພາະມັນເຮັດໃຫ້ວຽກຂອງເຮົາແລ້ວກ່ອນໝູ່ ທັງຍັງບໍ່ມີໃຜມາລົບກວນຈົນເຮັດໃຫ້ວຽກຊ້ານຳອີກ.
– ເຂົ້ານອນໄວຂຶ້ນ : ການນອນຕື່ນເຊົ້າຈະສົ່ງຜົນເຮັດໃຫ້ເຮົາເຂົ້ານອນໄວຂຶ້ນ ແລະ ເຮັດໃຫ້ເຮົາພັກຜ່ອນໄດ້ຢ່າງພຽງພໍ. ໃນຂະນະທີ່ການຕື່ນສວາຍຈະເຮັດໃຫ້ເຮົາເຂົ້ານອນເດິກ ແລະ ເຮັດໃຫ້ຕື່ນສວາຍໄປເລື້ອຍໆຈົນຮູ້ສຶກເຫງົານອນໄປໝົດມື້.
