ລາວມີຄວາມພະຍາຍາມສູງດ້ານໂພຊະນາການ ແລະ ສຸຂະອະນາໄມທີ່ດີຂອງເດັກ
ກອງປະຊຸມປຶກສາຫາລືການຕິດຕາມ, ຊຸກຍູ້ການໂຄສະນາວຽກງານໂພຊະນາການ, ການສັກຢາກັນພະຍາດ, ສຸຂະອະນາໄມ, ການຕ້ານການໃຊ້ຄວາມຮຸນແຮງຕໍ່ເດັກ, ການຕ້ານການ ຄ້າມະນຸດ ແລະ ການສຶກສາສໍາລັບເດັກໃນໄວຮຽນ ໄດ້ຈັດຂຶ້ນເມື່ອບໍ່ດົນມານີ້, ທີ່ແຂວງຜົ້ງສາລີ, ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ, ມີຜູ້ຕາງໜ້າອົງການອຸຍນິີເຊັບປະຈໍາລາວເຂົ້າຮ່ວມນໍາດ້ວຍ.
ທ່ານປະທານສູນກາງແນວລາວ ໄດ້ຍົກໃຫ້ເຫັນວ່າ: ໃນຜ່ານມາ, ພັກ-ລັດຖະບານ ໄດ້ເອົາໃຈໃສ່ການຮັບປະກັນຄວາມໝັ້ນຄົງທາງດ້ານສະບຽງອາຫານ ແລະ ໂພຊະນາການທີ່ດີ ແລະ ປອດໄພຕໍ່ສຸຂະພາບ ຂອງຜູ້ບໍລິໂພກ, ໂດຍສະເພາະສຸມໃສ່ແກ້ໄຂບັນຫາການຂາດສານອາຫານໃນກຸ່ມຜູ້ດ້ອຍໂອກາດ, ເດັກນ້ອຍໃນເຂດຫ່າງໄກສອກຫລີກ ໃຫ້ໄດ້ຮັບບໍລິການດ້ານສາທາລະນະສຸກຢ່າງທົ່ວເຖິງ ແລະ ມີຄຸນນະພາບ, ເອົາໃຈໃສ່ວຽກງານສຸຂະອະນາໄມ ໂດຍສະເພາະປຸກລະດົມການນໍາໃຊ້ວິດຖ່າຍ, ການລ້າງມືໃສ່ສະບູ, ການດື່ມນໍ້າສະອາດ, ການສົ່ງເສີມ ແລະ ພັດທະນາລະບົບການສຶກສາກວ້າງຂວາງທົ່ວເຖິງ ນັບແຕ່ຂັ້ນອະນຸບານຈົນຮອດລະດັບອາຊີວະສຶກສາ ແລະ ມະຫາວິທະຍາໄລ, ຄຽງຄູ່ກັນນັ້ນກໍໄດ້ສົ່ງເສີມແມ່ຍິງ, ເຍົາວະຊົນ ແລະ ໄວໜຸ່ມ ໄດ້ຮັບປະກັນສິດ ແລະ ການພັດທະນາທີ່ສະເໝີພາບລະຫວ່າງຍິງ-ຊາຍ, ເອົາໃຈໃສ່ປົກປ້ອງຊ່ວຍເຫລືອເດັກ ແລະ ຕ້ານການຄ້າມະນຸດທຸກຮູບແບບຢ່າງແຂງແຮງ.
ໃນໂອກາດນີ້, ທ່ານປະທານສູນກາງແນວລາວສ້າງຊາດ ໄດ້ໃຫ້ກຽດເຂົ້າຮ່ວມເປີດຂະບວນການບໍລິການສຸຂະພາບແມ່ ແລະ ເດັກ, ພ້ອມທັງໄດ້ຢອດຢາກັນພະຍາດໃຫ້ເດັກນ້ອຍຢູ່ທີ່ເທສະບານແຂວງດັ່ງກ່າວອີກດ້ວຍ.
