ນະຄອນຫລວງຈະເລັ່ງຍົກສູງຄຸນນະພາບການປຸງແຕ່ງຜະລິດຕະພັນຈາກຊີ້ນ
ພະແນກອຸດສາຫະກຳ ແລະ ການຄ້ານະຄອນຫລວງວຽງຈັນ ໄດ້ຈັດສຳມະນາໃນຫົວຂໍ້ “ໂຄງການປຸງແຕ່ງຜະລິດຕະພັນຈາກຊີ້ນ” ຂຶ້ນໃນວັນທີ 19 ຕຸລານີ້, ເພື່ອສ້າງຄວາມເຂົ້າໃຈໃນການຈັດຕັ້ງປະຕິບັດໂຄງການປຸງແຕ່ງຜະລິດຕະພັນຈາກຊີ້ນ ເພື່ອຍົກລະດັບສິນຄ້າໃຫ້ມີມາດຕະຖານກ້າວໄປເຖິງການມີຫຍີ່ຫໍ້ສິນຄ້າຂອງຕົນ, ທັງສືບຕໍ່ຊຸກຍູ້ສົ່ງເສີມໃຫ້ບັນດາໂຮງງານຂ້າສັດຕ່າງໆປຸງແຕ່ງຊີ້ນໃຫ້ໄດ້ມາດຕະຖານ ແລະ ພຽງພໍກັບຄວາມຕ້ອງການທັງຢູ່ພາຍໃນ ແລະ ສາມາດສົ່ງອອກຈຳໜ່າຍໄປຕ່າງປະເທດໄດ້.
ທ່ານ ເບີລິນ ເພັດຈັນທະຣາດ ຫົວໜ້າພະແນກອຸດສາຫະກຳ ແລະ ການຄ້ານະຄອນຫລວງວຽງຈັນ ມີຄໍາເຫັນວ່າ: ການສຳມະນາດັ່ງກ່າວເນັ້ນໃສ່ຍົກລະ ດັບຄວາມຮູ້ທາງດ້ານເຕັກນິກວິຊາການ ແລະ ສືບຕໍ່ປັບປຸງໂຮງງານເປົ້າໝາຍ ເພື່ອຄັດເລືອກເປັນໂຮງງານຕົວແບບໃນນະຄອນຫລວງວຽງຈັນ. ພ້ອມດຽວກັນນີ້, ຍັງໄດ້ຮັບຟັງການນຳສະເໜີບັນດາມາດຕະຖານຂອງໂຮງງານຂ້າສັດ, ການເຄື່ອນໄຫວດຳເນີນທຸລະກິດ, ບົດຮຽນດ້ານເຕັກນິກການປຸງແຕ່ງຊີ້ນ ແລະ ມາດຕະຖານຂອງຜະລິດຕະພັນ ແລະ ອື່ນໆ.
ໃນໂອກາດເຂົ້າຮ່ວມກອງປະຊຸມສໍາມະນາດັ່ງກ່າວ, ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ ໄດ້ເນັ້ນໃຫ້ບັນດາຜູ້ປະກອບການ ຈົ່ງພ້ອມກັນເອົາໃຈຜະລິດສິນຄ້າໃຫ້ໄດ້ທັງດ້ານປະລິມານ ແລະ ຄຸນນະພາບ ໂດຍສະເພາະແມ່ນການປຸງແຕ່ງຜະລິດຕະພັນຈາກຊີ້ນຕ້ອງຮັບປະກັນຄຸນນະພາບ, ຄວາມສະອາດ ແລະ ໃສ່ໃຈຄວາມປອດໄພຂອງຜູ້ບໍລິໂພກ.
