ຈັດຝຶກອົບຮົມວາງລະບົບເຕືອນໄພລ່ວງໜ້າທາງທຳມະຊາດ

     ໃນວັນທີ 22 ຕຸລານີ້, ກົມອຸຕຸນິຍົມ ແລະ ອຸທົກກະສາດ ກະຊວງຊັບພະຍາກອນທຳມະຊາດ ແລະ ສິ່ງແວດລ້ວມ ໄດ້ຈັດຊຸດຝຶກອົບຮົມດ້ານວິຊາການ ວ່າດ້ວຍການວາງລະບົບເຕືອນໄພລ່ວງໜ້າທາງດ້ານທຳມະຊາດຂຶ້ນທີ່​ນະຄອນຫລວງ​ວຽງ​ຈັນ ໂດຍການເຂົ້າຮ່ວມຂອງຮອງຫົວໜ້າກົມອຸຕຸນິຍົມ ແລະ ອຸທົກກະສາດ ​ແລະ ຄູຝຶກຈາກອົງການອຸຕຸນິຍົມໂລກ ພ້ອມດ້ວຍພະນັກງານວິຊາການຈາກພາກສ່ວນຕ່າງໆ​ເຂົ້າຮ່ວມ.

ໃນໂອກາດກ່າວເປີດຊຸດຝຶກອົບຮົມ, ທ່ານ ນາງ ອຸທອນ ເພັດຫຼວງສີ ຮອງຫົວໜ້າກົມອຸຕຸນິຍົມ ແລະ ອຸທົກກະສາດ ​ໃຫ້​ຮູ້ວ່າ: ວຽກງານອຸຕຸນິຍົມ ແລະ ອຸທົກກະສາດ ແມ່ນວຽກງານວິທະຍາສາດໜຶ່ງທີ່​ໄດ້ຈັດຕັ້ງປະຕິບັດຢ່າງເປັນເອກະພາບໃນຂອບເຂດທົ່ວປະເທດ ແລະ ມີຄວາມຈຳ ເປັນຮອບດ້ານໃນການປະກອບສ່ວນເຂົ້າໃນວຽກງານພັດທະນາເສດຖະກິດ-ສັງ ຄົມ ໂດຍສະເພາະການກໍ່ສ້າງພື້ນຖານໂຄງລ່າງ ທັງເປັນການແຈ້ງເຕືອນໄພລ່ວງໜ້າແກ່ສັງຄົມໃຫ້ທັນກັບສະພາບການ ເພື່ອຫຼຸດຜ່ອນຜົນເສຍຫາຍທີ່ເກີດຂຶ້ນຈາກໄພທຳມະຊາດ.

ປັດຈຸບັນ, ສະພາບອາກາດໄດ້ມີການປ່ຽນແປງ ເຮັດໃຫ້ເກີດມີນໍ້າຖ້ວມຫຼາຍ ຫຼື ແຫ້ງແລ້ງຫຼາຍ, ທັງເກີດລົມພາຍຸ, ໄພໜາວ ແລະ ອື່ນໆ ນັບມື້ນັບຮຸນແຮງ ແລະ ຖີ່ຂຶ້ນເລື້ອຍໆ ຄືດັ່ງທຸກມື້ນີ້, ທີ່ປະເທດເຮົາ ກໍຄືບັນດາປະເທດໃນໂລກພວມຜະເຊີນໜ້າກັບໄພຂົ່ມຂູ່ຈາກໄພທຳມະຊາດ ນັບມື້ນັບຫຼາຍຂຶ້ນ.

ສຳລັບລະບົບແຈ້ງເຕື່ອນໄພທາງທຳມະຊາດນັ້ນ, ແມ່ນເຫັນວ່າມີຄວາມຈຳເປັນ ແລະ ທັງເປັນບຸລິມະສິດສຳຄັນຂອງວຽກງານອຸຕຸນິຍົມ ແລະ ອຸທົກກະ ສາດ ເຊິ່ງໄດ້ມີການພັດທະນາຢ່າງຕໍ່ເນື່ອງຄື: ໃນໄລຍະຜ່ານມາໄດ້ສຳເລັດການສ້າງສູນເຕືອນໄພລ່ວງໜ້າແຫ່ງຊາດ, ປະກອບວັດຖຸອຸປະກອນ ແລະ ລະ ບົບຕິດຕາມສະພາບ ແລະ ປາກົດການຕ່າງໆຂອງອາກາດ. ນອກຈາກນີ້, ຍັງໄດ້ສຳເລັດການສ້າງກົດໝາຍ ວ່າດ້ວຍອຸຕຸນິຍົມ ແລະ ອຸທົກກະສາດ ເຊິ່ງເປັນນິຕິກຳທີ່ສຳຄັນໃນການສະໜັບສະໜູນແກ່ວຽກງານເຕືອນໄພ. ເຖິງຢ່າງໃດກໍຕາມ, ສຳລັບວຽກງານນີ້ ຍັງເຫັນວ່າຕ້ອງໄດ້ມີການພັດທະນາໄປເລື້ອຍໆ ບໍ່ວ່າຈະເປັນທາງດ້ານຊັບພະຍາກອນມະນຸດ ກໍຄືທາງດ້ານວັດຖຸອຸປະກອນອື່ນໆ ເພື່ອຮັບປະກັນໃຫ້ແກ່ການຈັດຕັ້ງປະຕິບັດໃນວຽກງານແຈ້ງເຕືອນໄພລ່ວງໜ້າມີປະສິດທິຜົນສູງ.

ປະເທດລາວໄດ້ເຂົ້າເປັນສະມາຊິກຂອງອົງການອຸຕຸນິຍົມໂລກໃນປີ 1955 ແລະ ໃນໄລຍະຜ່ານມາ ກໍໄດ້ຮັບການສະໜັບສະໜູນຫຼາຍດ້ານຈາກອົງ ການສາກົນຕ່າງໆເຊັ່ນ: ການພັດທະນາຊັບພະຍາກອນມະນຸດ, ການສ້າງສະຖາ ນີອຸຕຸນິຍົມ ແລະ ອຸທົກກະສາດໃນທົ່ວປະເທດ ເພື່ອສະໜອງໃຫ້ແກ່ການພະຍາ ກອນອາກາດ ແລະ ແຈ້ງເຕືອນໄພໄດ້ຢ່າງຖືກຕ້ອງ ແລະ ຊັດເຈນກວ່າເກົ່າ.
ໃນການຝຶກອົບຮົມຄັ້ງນີ້, ຄູຝຶກຈາກອົງການອຸຕຸນິຍົມໂລກ ໄດ້ນຳເອົາບົດຮຽນການແຈ້ງເຕືອນໄພລ່ວງໜ້າທາງທຳມະຊາດມານຳສະ ເໜີໃຫ້ຜູ້ເຂົ້າຮ່ວມໄດ້ເຂົ້າໃຈ ແລະ ໄປນຳໃຊ້ກັບວຽກງານຕົວຈິງຂອງກົມກອງດີ​ຂຶ້ນກວ່າ​ເກົ່າ.