ລາວກຽມສ້າງຫ້ອງກວດສອບຄຸນນະພາບ ແຮ່ທາດ-ວັດຖຸມີຄ່າ
ແຫລງຂ່າວ ຂປລ ລາຍງານວ່າ: ໃນວັນທີ 19 ຕຸລາຜ່ານມານີ້, ລັດຖະບານລາວຮ່ວມກັບພາກເອກະຊົນ ໄດ້ລົງນາມໃນບົດບັນທຶກຕົກລົງທີ່ຈະຮ່ວມກັນສ້າງຫ້ອງກວດສອບຄຸນນະພາບແຮ່ທາດ, ວັດຖຸມີຄ່າ ແລະ ອັນຍະມະນີ ໃຫ້ຮັບປະກັນຄຸນນະພາບ ແລະ ຖືກຕ້ອງຕາມມາດຕະຖານແຫ່ງຊາດ ແລະ ສາກົນ ຂຶ້ນທີ່ນະຄອນຫລວງວຽງຈັນ ລະຫວ່າງທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ, ທ່ານ ບຸນໂຮມ ພານຸວົງ ຫົວໜ້າສູນຢັ້ງຢືນມາດຕະຖານ ແລະ ກວດກາຄຸນນະພາບແຫ່ງຊາດ ກະຊວງວິທະຍາສາດ ແລະ ເຕັກໂນໂລຊີ ແລະ ທ່ານ ຄຳຜາຍ ສີລາຊາ ປະທານກຸ່ມບໍລິສັດ ດວງຈະເລີນພັດທະນາກໍ່ສ້າງ ຈຳກັດ, ໂດຍການເຂົ້າຮ່ວມເປັນສັກຂີພິຍານຂອງທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ. ເພື່ອຮ່ວມກັນສ້າງຄວາມເປັນໄປໄດ້ຂອງການຄຸ້ມຄອງ, ການກວດກາຄຸນນະພາບແຮ່ທາດ, ວັດຖຸມີຄ່າ ແລະ ອັນຍະມະນີຢູ່ໃນ ສປປ ລາວ ເພື່ອສ້າງພື້ນຖານໂຄງລ່າງດ້ານຄຸນນະພາບແຫ່ງຊາດ, ສະໜອງການບໍລິການກວດກາຄຸນນະພາບ, ກວດສອບຄຸນນະພາບແຮ່ທາດ, ວັດຖຸມີຄ່າ ແລະ ອັນຍະມະນີ, ທັງຮັບປະກັນຄຸນນະພາບຂອງຜະລິດຕະພັນ ຮັບປະກັນຄວາມປອດໄພ ແລະ ທັງເປັນການປັບປຸງມາດຕະຖານຂອງການຜະລິດໃຫ້ມີຄວາມສົມບູນ ແລະ ສອດຄ່ອງກັບການກຳນົດຂອງລະບຽບກົດໝາຍ.
