ອາຣັບບີ ຊາອຸດິດ ໃຫ້ຄຳໝັ້ນບໍ່ໃຊ້ນ້ຳມັນ ເປັນຕົວປະກັນທາງການເມືອງ
ລັດຖະມົນຕີພະລັງງານອາຣັບບີ ຊາອຸດິດ ລະບຸວ່າ: ລັດຖະບານອາຣັບບີ ຊາອຸດິດ ຈະບໍ່ໃຊ້ນ້ຳມັນເປັນຕົວປະກັນທາງການເມືອງຄືໃນໄລຍະປີ 1973 ທີ່ອາຣັບບີ ຊາອຸດິດ ຢຸດການສົ່ງອອກນ້ຳມັນໃຫ້ປະເທດຕາເວັນຕົກ ທ່າມກາງບັນຫາການຄາດຕະກຳ “ຈາມາລ ຄາຊ໊ອກກີ” ນັກຂ່າວຊາວອາຣັບບີ ຊາອຸດິດ ຈາກວໍຊິງຕັນໂພສ.
ທ່ານ ຄາລິດ ອັລ-ຟາລິ ລັດຖະມົນຕີພະລັງງານຂອງອາຣັບບີ ຊາອຸດິດ ໃຫ້ສຳພາດສຳນັກຍ່າວທາສ ຂອງຣັດເຊຍ ໂດຍຢືນຢັນວ່າ: ລັດຖະບານອາຣັບບີ ຊາອຸດິດ ບໍ່ມີນະໂຍບາຍແບບນີ້ໃນການຮັບມືຕໍ່ແຮງກົດດັນຈາກປະຊາຄົມໂລກ ກໍລະນີການຄາດຕະກຳທ້າວ ຄາຊ໊ອກກີ ຢ່າງມີເງື່ອນງຳ.
ລັດຖະມົນຕີພະລັງງານອາຣັບບີ ຊາອຸດິດ ກ່າວວ່າ: ກະແສກົດດັນເລື່ອງນີ້ຈະຜ່ານພົ້ນໄປໃນທີ່ສຸດ, ແຕ່ອາຣັບບີ ຊາອຸດິດ ເປັນປະເທດທີ່ຮັບຜິດຊອບຫລາຍປະເທດໜຶ່ງ, ເປັນເວລາຫລາຍສິບປີມາແລ້ວ ທີ່ພວກເຮົາໃຊ້ນະໂຍບາຍນ້ຳມັນຂອງເຮົາເປັນເຄື່ອງມືທາງເສດຖະກິດຢ່າງຮັບຜິດຊອບ ແລະ ແຍກເລື່ອງນ້ຳມັນອອກຈາກການເມືອງຢ່າງສິ້ນເຊີງ.
ຄຳກ່າວຢືນຢັນຂອງລັດຖະມົນຕີພະລັງງານອາຣັບບີ ຊາອຸດິດ ມີຂຶ້ນຫລັງຈາກບັນດາ ສສ ແລະ ສວ ອາເມລິກາຫລາຍຄົນ ສະເໜີໃຫ້ລັດຖະບານໃຊ້ມາດຕະການຂວ້ຳບາດອາຣັບບີ ຊາອຸດິດ ແລະ ລັດຖະບານອາຣັບບີ ຊາອຸດິດ ໄດ້ອອກຖະແຫລງການວ່າ: ຈະຕອບໂຕ້ມາດຕະການຂວ້ຳບາດຂອງອາເມລິກາໃນລັກສະນະທີ່ຮຸນແຮງກວ່າ.
