ທ່ານ ທຣຳ ຕັດເງິນຊ່ວຍເຫລືອ 3 ປະເທດ ອາເມລິກາລາຕິນຈາກບັນຫາຜູ້ອົບພະຍົບ
ປະທານາທິບໍດີ ໂດນັລ ທຣຳ ສັ່ງຕັດງົບປະມານຊ່ວຍເຫລືອແອນຊານວາດໍ, ຮົງດູຣັດ ແລະ ກົວເຕມາລາ ເຊິ່ງເປັນສັນຊາດສ່ວນໃຫຍ່ຂອງຄາລາວານຜູ້ອົບພະຍົບ ທີ່ຜູ້ນຳອາເມລິກາປະກາດຈະບໍ່ມີທາງໃຫ້ເຂົ້າປະເທດເດັດຂາດ.
President Trump on migrant caravan: "You're going to find MS-13, you're going to find Middle Easterners, you're going to find everything. And guess what? We're not allowing them in our country." https://t.co/ZffW6NQQA0 pic.twitter.com/dmuqEOIyRy
— The Hill (@thehill) October 22, 2018
ສຳນັກຂ່າວຕ່າງປະເທດລາຍງານວ່າ: ປະທານາທິບໍດີ ໂດນັລ ທຣຳ ກ່າວໃນວັນທີ 22 ຕຸລາວ່າ: ທ່ານໄດ້ປຶກສາຫາລືຮ່ວມກັບເຈົ້າໜ້າທີ່ກອງກຳລັງລາດຕະເວນຊາຍແດນ ແລະ ກອງທັບແລ້ວວ່າ: ສະຖານະການຄາລາວານຜູ້ອົບພະຍົບເທື່ອໃໝ່ຈາກອາເມລິກາກາງທີ່ເຂົ້າໃກ້ຊາຍແດນທາງໃຕ້ຂອງອາເມລິກາຫລາຍຂຶ້ນນັ້ນ ຖືເປັນ “ວາລະສຸກເສີນແຫ່ງຊາດ”, ພ້ອມທັງສະແດງຄວາມຜິດຫວັງທີ່ເມັກຊິກບໍ່ສາມາດລະງັບການຫລັ່ງໄຫລຂອງຜູ້ອົບພະຍົບຄັ້ງນີ້ໄດ້.
ຂະນະດຽວກັນ, ຜູ້ນຳອາເມລິກາ ປະກາດເລີ່ມການຕັດ ຫລື ຫລຸດງົບປະມານການຊ່ວຍເຫລືອ ເຊິ່ງເຄີຍມອບໃຫ້ກົວເຕມາລາ, ຮົງດູຣັດ ແລະ ແອນຊານວາດໍ ເນື່ອງຈາກລັດຖະບານທັງສາມປະເທດບໍ່ສາມາດສະກັດກັ້ນຄວາມພະຍາຍາມຂອງປະຊາຊົນ ໃນການເດີນທາງຂ້າມປະເທດຢ່າງຜິດກົດໝາຍເຂົ້າມາອາເມລິກາ ໂດຍສະເພາະຮົງດູຣັດ ເຊິ່ງມີອັດຕາການເກີດອາຊະຍາກຳສູງທີ່ສຸດປະເທດໜຶ່ງຂອງໂລກ ຄື 43 ຄັ້ງຕໍ່ປະຊາກອນ 100.000 ຄົນ ແລະ ໄດ້ຮັບງົບປະມານຊ່ວຍເຫລືອຈາກລັດຖະບານວໍຊິງຕັນ 181,7 ລ້ານໂດລາສະຫະລັດ. ທ່ານ ທຣຳ ຍັງຢືນຢັນຄວາມພ້ອມຂອງທ່ານໃນການໃຊ້ “ມາດຕະການທາງທະຫານ” ເພື່ອປົກປ້ອງຊາຍແດນຈາກຄາລາວານຜູ້ອົບພະຍົບ ເຊິ່ງເປັນຄວາມພະຍາຍາມໂຍກຍ້າຍຖິ່ນຖານຄັ້ງໃຫຍ່ເປັນຄັ້ງທີ 2 ຕໍ່ຈາກເດືອນມີນາປີນີ້.
ເຖິງຢ່າງໃດກໍຕາມ, ງົບປະມານຊ່ວຍເຫລືອຈາກລັດຖະບານວໍຊິງຕັນຕໍ່ພາກພື້ນອາເມລິກາລາຕິນຫລຸດລົງຈາກ 750 ລ້ານໂດລາສະຫະລັດ ໃນປີ 2016 ເຫລືອ 655 ລ້ານໂດລາສະຫະລັດ ໃນປີຜ່ານມາ ແລະ ອາດຫລຸດລົງອີກເຫລືອ 615 ລ້ານໂດລາສະຫະລັດ ໃນປີນີ້. ຕາມການຕີລາຄາໂດຍສຳນັກງານກິດຈະການອາເມລິກາລາຕິນຂອງທຳນຽບຂາວ.
