ບັນຫາສິວທີ່ເກີດຈາກການໃຊ້ຄຣີມຮອງພື້ນແກ້ໄຂໄດ້

ເປັນບັນຫາຕົ້ນຕໍທີ່ແມ່ຍິງສ່ວນຫລາຍມັກຕ້ອງພົບນັ້ນກໍຄື ທາຄຣີມຮອງພື້ນແລ້ວເກີດສິວຂຶ້ນເທິງໃບໜ້າ ຖ້າຈະເຊົາໃຊ້ໄປເລີຍ ກໍຄົງເປັນເລື່ອງຍາກ ເນື່ອງຈາກຄຣີມຮອງພື້ນມີຄຸນສົມບັດຊ່ວຍປົກປ້ອງການຮອຍຫ່ຽວ ແລະ ຈຸດດ່າງດຳໄດ້ ຕື່ມຄວາມໝັ້ນໃຈໃຫ້ແມ່ຍິງເຮົາໃນແຕ່ລະມື້ທີ່ຕ້ອງໄປເຮັດວຽກພົບກັບຜູ້ຄົນ. ດັ່ງນັ້ນ, ເພື່ອເປັນການເຮັດຄວາມເຂົ້າໃຈໂຕການທີ່ເຮັດໃຫ້ເກີດສິວຈາກຄຣີມຮອງພື້ນ ອາດມາຈາກສິ່ງເຫລົ່ານີ້ທີ່ທ່ານຖືເບົາ ພຽງແຕ່ປັບປ່ຽນຈັກໜ້ອຍກໍຈະຊ່ວຍຫລຸດຄວາມສ່ຽງຕໍ່ການເກີດສິວໄດ້.

     – ເລືອກຄຣີມຮອງພື້ນທີ່ບໍ່ເໝາະສົມກັບສະພາບຜິວຂອງຕົນເອງ : ນີ້ກໍແມ່ນສາເຫດສຳຄັນ ຫາກຜິວມັນແຕ່ເລືອກໃຊ້ຄຣີມ ຮອງພື້ນທີ່ມີສ່ວນປະສົມຂອງນຳ້ມັນ ເຊິ່ງບໍ່ແມ່ນກຸ່ມ Oil-Free ກໍຈະຍິ່ງເຮັດໃຫ້ຜິວໜ້າຍິ່ງມັນ ແລະ ເກີດການອັດຕັນຈົນກໍ່ໃຫ້ເກີດສິວໄດ້. ດັ່ງນັ້ນ, ຫາກທ່ານເປັນຄົນຜິວມັນກໍຄວນເລືອກໃຊ້ຄຣີມຮອງພື້ນຊະນິດທີ່ຊ່ວຍຄວບຄຸມຄວາມມັນຈຶ່ງຈະເໝາະສົມຕໍ່ສະພາບຜິວ. ສ່ວນໃຜທີ່ມີຜິວປະສົມກໍໃຫ້ເລືອກຊະນິດທີ່ໃຫ້ຄວາມຊຸ່ມຊື່ນກັບຜິວໃນລະດັບກາງໆ ແລະ ຄວນທາໂດຍເນັ້ນໃສ່ບໍລິເວນທີ່ຜິວແຫ້ງໃຫ້ຫລາຍກ່ວາບໍລິເວນຜິວທີ່ມັນ.

     – ການເຮັດຄວາມສະອາດທີ່ບໍ່ພຽງພໍ : ຄຣີມຮອງພື້ນນັ້ນມີຄວາມໜາ ແລະ ມີສານເຄມີປະສົມຢູ່ ດັ່ງນັ້ນ ຫລາຍຄົນທີ່ໃຊ້ ຄຣີມຮອງພື້ນຢູ່ເປັນປະຈຳ ເລ້ວເຮັດຄວາມສະອາດໃບໜ້າພຽງແຕ່ໃຊ້ນຳ້ລ້າ ຫລື ພຽງແຕ່ໂຟມລ້າງໜ້າທຳມະດາກໍຄິດວ່າທຸກ ຢ່າງຖືກກຳຈັດອອກໄປໝົດແລ້ວ ນັ້ນເປັນຄວາມເຂົ້າໃຈຜິດ. ຜິວທີ່ເບິ່ງບໍ່ເຫັນສານເຄມີດ້ວຍຕາເປົ່າອາດອັດຕັນຢູ່ຕາມຮູຂຸມຂົນຂະໜາດນ້ອຍ ບໍ່ສາມາດລ້າງຄຣີມທີ່ຢູ່ເທິງໃບໜ້າໄດ້ຢ່າງສະອາດໃນຂັ້ນຕອນດຽວ ດັ່ງນັ້ນ ຄວນໃຊ້ຄລີນຊິ່ງ ແລະ ໂຟມລ້າງໜ້າຄຽງຄູ່ກັນໄປນຳ ຈຶ່ງຈະສາມາດຫລຸດບັນຫາຂອງການເກີດສິວຈາກການໃຊ້ຄຣີມຮອງພື້ນໄດ້ຫລາຍຂຶ້ນ.

ພຽງເທົ່ານີ້ ກໍຈະຊ່ວຍໃຫ້ທ່ານກາຍເປັນຜູ້ຍິງທີ່ບໍ່ຕ້ອງມີບັນຫາເລື່ອງສິວຍ້ອນການໃຊ້ຄຣີມຮອງພື້ນແບບຜິດວິທີອີກຕໍ່ໄປ, ແຕ່ຫາກແນະນຳໃຫ້ຫລາຍກ່ວານີ້ກໍຢ່າລືມຫາຊ່ວງເວລາພັກຜ່ອນໃບໜ້າຈາກເຄື່ອງສຳອາງແດ່ ເພື່ອຫລຸດການສະສົມຂອງສານເຄມີ ເຊິ່ງກໍເປັນໜຶ່ງການຊ່ວຍຟື້ນຟູຜິວໜ້າໃຫ້ກັບມາສຸຂະພາບດີໄດ້.