ຈີນເປີດຂົວຂ້າມທະເລຍາວທີ່ສຸດໃນໂລກ
ປະທານປະເທດ ສີ ຈິ້ນຜິງ ຂອງຈີນ ຈັດພິທີເປີດຂົວຂ້າມທະເລຍາວທີ່ສຸດໃນໂລກ ເຊື່ອມລະຫວ່າງຮົງກົງ, ເມືອງຈູໄຫ່ ແຂວງກວາງຕຸ້ງ ແລະ ມາເກົາ ໜຶ່ງໃນໂຄງການສຳຄັນຂອງລັດຖະບານປັກກິ່ງ ເພື່ອການພັດທະນາເຂດເສດຖະກິດພິເສດບໍລິເວນສາມຫລ່ຽມລຸ່ມນ້ຳເຟິຣ.
ສຳນັກຂ່າວຕ່າງປະເທດລາຍງານວ່າ: ປະທານປະເທດ ສີ ຈິ້ນຜິງ ລົງພື້ນທີ່ເມືອງຈູໄຫ່ ຕັ້ງຢູ່ບໍລິເວນສາມຫລ່ຽມປາກແມ່ນ້ຳຈູຈຽງ ຫລື ແມ່ນ້ຳເພິຣ ແຂວງກວາງຕຸ້ງ ທາງຕອນໃຕ້ຂອງຈີນ ໃນວັນທີ 23 ຕຸລານີ້ ເພື່ອເປັນປະທານໃນພິທີເປີດຂົວຂ້າມທະເລຄວາມຍາວທີ່ສຸດໃນໂລກ ໄລຍະທາງ 55 ກິໂລແມັດ ຫລຸດໄລຍະເວລາເດີນທາງລະຫວ່າງເກາະລັນເຕົາຂອງຮົງກົງ ກັບເມືອງຈູໄຫ່ ແລະ ເຂດບໍລິຫານພິເສດມາເກົາ ຈາກ 3 ຊົ່ວໂມງ ເຫລືອພຽງ 30 ນາທີ.
https://www.facebook.com/NewsContent.CCTVPLUS/videos/348082405964433/
ທັງນີ້, ໂຄງສ້າງຫລັກຂອງຂົວເປັນຮູບຕົວອັກສອນວາຍ “Y” ຂອງພາສາອັງກິດ ມີຄວາມຄົງທົນຕໍ່ແຜ່ນດິນໄຫວຮຸນແຮງສູງສຸດ 8,0 ແມກນິຈູດ, ອຸໂມງລອດໃຕ້ທະເລ ແລະ ເກາະທຽມຂະໜາດໃຫຍ່ເຊື່ອມກັບຂົວຫລັກ ໂດຍໂຄງການດັ່ງກ່າວເລີ່ມການກໍ່ສ້າງໃນປີ 2009 ດ້ວຍງົບປະມານມະຫາສານ 15.730 ລ້ານຢວນ. ຕາມແຜນຍຸດທະສາດຂອງລັດຖະບານປັກກິ່ງໃນການພັດທະນາພື້ນທີ່ບໍລິເວນນີ້ ຄື ອ່າວກວາງຕຸ້ງ, ຮົງກົງ ແລະ ມາເກົາໃຫ້ເປັນເຂດເກຣດເຕີ ເບ (Greater Bay Area) ໃຫ້ເປັນລະບົບນິເວດທາງເສດຖະກິດທີ່ມີຄວາມສົມບູນແບບ ດ້ວຍການຂັບເຄື່ອນຈາກລະບົບການຄົມມະນາຄົມທີ່ມີການບູລະນະຢ່າງລົງຕົວ.
