ວຽງຈັນປະກັນໄພເນັ້ນບໍລິການຫລັງການຂາຍ

ບໍລິສັດວຽງຈັນປະກັນໄພ ເປັນບໍລິສັດທີ່ລົງທຶນ ໂດຍນັກທຸລະກິດລາວ ເຊິ່ງເປັນ ບໍລິສັດ ໃນເຄືອຂອງທະນາຄານຮ່ວມພັດທະນາ (JDB)ແລະ ສີເມືອງກຣຸບ ເຊິ່ງເປັນການລົງທຶນຂອງນັກທຸລະກິດລາວ 100% ແລະ ເປັນບໍລິສັດທຳອິດ ຂອງລາວທີ່ໄດ້ຮັບອະນຸຍາດດຳເນີນທຸລະກິດປະກັນໄພ 2 ປະເພດໃຫຍ່ຄື: ປະກັນໄພຊີວິດ, ປະກັນໄພທົ່ວໄປ ເຊິ່ງມີທຶນຈົດທະບຽນທັງໝົດ 10 ລ້ານໂດລາສະຫະລັດ ຫຼື ປະມານ 80 ຕື້ກີບ.

ໃນວັນທີ 18 ຕຸລານີ້ ທ່ານ ພຸດທະສັກ ສຸວັນນະສາວ ຜູ້ອຳນວຍການໃຫຍ່ ບໍລິສັດ ວຽງຈັນ ປະກັນໄພ, ທັງເປັນເລຂາທິການໃຫຍ່ ຂອງສະມາຄົມປະກັນໄພແຫ່ງ ສປປ ລາວ ໃຫ້ຮູ້ວ່າ: ປັດຈຸບັນບໍລິສັດປະກັນໄພຢູ່ລາວມີທັງໝົດ 25 ບໍລິສັດ ເຊິ່ງບໍລິສັດ ວຽງຈັນ ປະກັນໄພ ໄດ້ເປີດເປັນທາງການໃນວັນທີ 1 ເມສາ 2017 ຜ່ານມານີ້, ໂດຍສຸມ ໃສ່ປະກັນໄພທົ່ວໄປ (ປະການໄພລົດ, ອັກຄີໄພ, ສຸ ຂະພາບ, ອຸບັດຕິເຫດທາງ ດ້ານຮ່າງກາຍ ແລະ ການ ເດີນທາງ) ພ້ອມທັງເນັ້ນໜັກ ການແກ້ອຸບັດຕິເຫດ ແລະ ການບໍລິການຫຼັງການຂາຍ ເປັນຫຼັກໂດຍຖືສຳຄັນການຕອບສະໜອງຄວາມຕ້ອງການຕ່າງໆຂອງລູກຄ້າໃຫ້ວ່ອງໄວທັນໃຈ, ເຊິ່ງໃນກໍລະນີເກີດອຸບັດຕິເຫດທາງບໍລິສັດ ຈະເນັ້ນບໍລິການໃຫ້ ທ່ວງທັນເວລາພ້ອມທັງໃຫ້ ອິດສະຫຼະໃນການເຂົ້າຮັບປິ່ນປົວຕາມໂຮງໝໍ ຫຼື ຄລີນິກຕ່າງໆ ແລະ ການປົວແປງ ສິ່ງເປເພເສຍຫາຍອື່ນໆ ໂດຍສະເພາະແມ່ນພາຫະນະຈາກຫ້າງຮ້ານຕ່າງໆໄດ້ ໂດຍທາງບໍລິສັດຍິນດີຈ່າຍຄ່າໃຊ້ຈ່າຍທັງໝົດພຽງ ແຕ່ມີໃບບິນຢັ້ງຢືນຢ່າງຖືກຕ້ອງ, ສ່ວນລູກຄ້າທີ່ໄດ້ຊື້ປະ ກັນໄພຈາກບໍລິສັດ ໄປແຕ່ບໍ່ເຄີຍເກີດເຫດໃດໆທາງບໍລິສັດຈະມີສ່ວນຫຼຸດໃຫ້ແກ່ລູກຄ້າແຕ່ 5-10% ແລະ ເຖິງ ວ່າເປັນບໍລິສັດປະກັນໄພສ້າງຂຶ້ນໃໝ່ພຽງ 1 ປີ ຜ່ານມາ ແຕ່ບໍລິສັດກໍມີປະ ສົບການໃນການເຮັດວຽກ ປະກັນໄພມາແລ້ວເກືອບ 20 ປີ, ເພາະວ່າໃນເວລານັ້ນໄດ້ ເປັນຕົວແທນຂາຍປະກັນໄພລາວ ໂດຍຜ່ານທະນາຄານ JDB ຕາມສາຂາຕ່າງໆໃນທົ່ວປະເທດ, ເຊິ່ງໃນນັ້ນກໍມີຖານລູກຄ້າເປັນຈຳນວນຫຼາຍທັງລົດຈັກ ແລະ ລົດໃຫຍ່, ກວມອັດຕາການຂາຍ 60% ແມ່ນມາຈາກທະນາຄານ JDB. ສຳລັບແຜນງານໃນຕໍ່ບໍລິສັດໄດ້ຕັ້ງເປົ້າໝາຍໄວ້ວ່າຈະເນັ້ນຂາຍປະ ກັນໄພການບິນ-ການເດີນທາງ, ຂາຍປະກັນໄພຜ່ານໂທລະສັບມືຖື (ແອັບພິເຄ ຊັນ), ຂາຍປະກັນໄພລົດໃຫຍ່ແບບລົດຫຼູທີ່ມີລາຄາແພງ ແລະ ຈະຫຼຸດຜ່ອນການຂາຍແບບເປັນປີມາເປັນລາຍລາຍວັນໃຫ້ຫຼາຍຂຶ້ນ.

ດັ່ງນັ້ນກ່ອນລູກຄ້າຈະຊື້ປະກັນໄພຈາກບໍລິສັດໃດໜຶ່ງຄວນຄຳນຶງເຖິງເງື່ອນໄຂຂອງບໍລິສັດ, ກວດສັນຍາຈາກບໍລິສັດ ແລະ ກວດ ວົງເງິນຄຸ້ມກັນໃຫ້ລະອຽດຖີ່ຖ້ວນເສຍກ່ອນຈຶ່ງຕິດສິນໃຈແມ່ນເປັນການດີທີ່ສຸດ.