ງານຄຣີນິກການກວດກາ ແລະ ຮັກສາລົດຟອດມີລູກຄ້າເຂົ້າຮ່ວມຈໍານວນຫຼາຍ

ໃນວັນທີ 20 ຕຸລານີ້, ບໍລິສັດ ລາວຟອດຊີຕີ ໄດ້ຈັດງານຄຣີນິກການກວດກາ ແລະ ຮັກສາລົດ, ຂຶ້ນທີ່ນະຄອນຫຼວງວຽງຈັນ, ເພື່ອໃຫ້ລູກຄ້າຮັບຮູ້ວິທີການນຳໃຊ້ລົດ ແລະ ການບໍາລຸງຮັກສາລົດດ້ວຍຕົນເອງ, ພ້ອມທັງໃຫ້ລູກຄ້າມາເຊັກສະພາບລົດທຸກໆ 1 ພັນກິໂລແມັດ ແລະ 5 ພັນກິໂລແມັດ ໃນສູນ, ທີ່ມີຄວາມຮັບປະກັນດ້ານອາໄຫຼ່ ແລະ ຕົວເຄື່ອງຈັກ ທີ່ໄດ້ມາດຕະຖານ ຊຶ່ງມີລູກຄ້າເຂົ້າຮ່ວມຈໍານວນຫຼາຍ.

ພາຍໃນງານບັນດາລູກຄ້າລາວຟອດທີ່ເຂົ້າຮ່ວມ ໄດ້ຮຽນຮູ້ກ່ຽວກັບການນໍາໃຊ້ລົດໃໝ່ ເປັນຕົ້ນແມ່ນ: ເຄື່ອງໝາຍແຈ້ງເຕືອນເທີງໜ້າປັດລົດ, ການໃຊ້ງານຂອງປຸ່ມຄວບຄຸມ ແລະ ແນະນຳວິທີບໍາລຸງຮັກສາລົດຕາມໄລຍະ ເພື່ອເປັນຄວາມຮູ້ພື້ນຖານໃຫ້ແກ່ລູກຄ້າທີ່ຊື້ລົດໃໝ່. ນອກນີ້, ຍັງມີຫຼາກຫຼາຍກິດຈະກໍາໃຫ້ລູກຄ້າໄດ້ຮ່ວມມ່ວນຊື່ນ ເປັນຕົ້ນແມ່ນ ການຖາມ-ຕອບ ເພື່ອຮັບລາງວັນພິເສດຈາກສູນບໍລິການຫຼັງການຂາຍ, ການລະບາຍສີສຳລັບເດັກ ເພື່ອປະກວດຮັບຊຸດອຸປະກອນການຮຽນ, ນອກນີ້ຍັງມີການມອບຂອງທີ່ລະນຶກ, ບັດປ່ຽນນໍ້າມັນເຄື່ອງໃຫ້ແກ່ລູກຄ້າຜູ້ໂຊກດີ ແລະ ພິເສດໄດ້ມີການຈັບສະຫຼາກລຸ້ນຮັບເຄື່ອງໄຟຟ້າຈໍານວນ 10 ລາງວັນ ລວມມີ: ໂທລະພາບ 32 ນິ້ວ, ເຄື່ອງສຽງ, ເຕົາໄມໂຄເວັບ, ເຕົາປີ້ງ, ໝໍ້ຫຸງເຂົ້າ, ໝໍ້ຕົ້ມນໍ້າ, ໝໍ້ແດງ, ເຄື່ອງປີ້ງເຂົ້າໜົມປັງ, ເຄື່ອງປັ່ນໝາກໄມ້ ແລະ ພັດລົມ ລວມມີມູນຄ່າຫຼາຍກວ່າ 30 ລ້ານກີບ.