ເຈົ້າໜ້າທີ່ຮຽກຮ້ອງຜູ້ມາທ່ຽວບຸນມີສະຕິຕ້ານສິ່ງຫຍໍ້ທໍ້ຕ່າງໆ
ປັດຈຸບັນ, ການຄົບງັນໃນງານບຸນອອກພັນສາປະວໍລະນາ ແລະ ບຸນຊ່ວງເຮືອທ່າວັດຈັນເມືອງຈັນທະບູລີ ໄດ້ເລີ່ມຂຶ້ນແລ້ວໃນວັນທີ 22-25 ຕຸລານີ້ ແລະ ພໍດີກັບການສົ່ງເສີມປີທ່ອງທ່ຽວລາວອີກດ້ວຍ, ໂດຍຈະມີມວນຊົນ ແລະ ນັກທ່ອງທ່ຽວເຂົ້າມາທ່ຽວຊົມເປັນຈຳນວນຫລາຍ, ດັ່ງນັ້ນຈຶ່ງຮຽກຮ້ອງໃຫ້ມີສະຕິຕໍ່ສະພາບປະກົດການຫຍໍ້ທໍ້ຕ່າງໆ ຄື: ການດຶງກະເປົາ, ແຫກກະເປົາ ແລະ ລັກຊັບ-ຊີງຊັບອື່ນໆ, ດັ່ງໃນປີຜ່ານມາ ທີ່ມີເຫດການດັ່ງກ່າວເກີດຂຶ້ນມາແລ້ວເປັນຈຳນວນຫລາຍ ສະນັ້ນ, ເຈົ້າໜ້າທີ່ຈຶ່ງໄດ້ເຕືອນໃຫ້ມີສະຕິຮັກສາຊັບສິນມີຄ່າຂອງຕົນໃຫ້ດີ. ດັ່ງທ່ານພັນໂທ ຢຸດຕະພົງ ສຸວັນນະສິງ ຮອງຫ້ອງຕຳຫລວດ ນະຄອນຫລວງວຽງຈັນ ໃຫ້ຮູ້ວ່າ: ການຈັດງານບຸນຊ່ວງເຮືອປີນີ້ ເຈົ້າໜ້າທີ່ໄດ້ເອົາໃຈໃສ່ໃນການປ້ອງກັນອຸປະຕິເຫດ ແລະ ກວດກາຄວາມເປັນລະບຽບຮຽບຮ້ອຍຕ່າງໆຢ່າງເຂັ້ມງວດ, ເພື່ອປ້ອງກັນບໍ່ໃຫ້ມີກຸ່ມຄົນບໍ່ດີສວຍໂອກາດກໍ່ເຫດບໍ່ດີຕ່າງໆ, ໂດຍໄດ້ຈັດກຳລັງເຈົ້າໜ້າທີ່ກ່ວາ 1 ພັນຄົນ ເພື່ອລົງເຮັດໜ້າທີ່ສະກັດກັ້ນອຸປະຕິເຫດ ແລະ ປະກົດການຫຍໍ້ທໍ້ຕ່າງໆ. ພ້ອມໄດ້ປຸກລະດົມທົ່ວປວງຊົນເປັນເຈົ້າການເອົາໃຈໃສ່ເວນຍາມສຳນັກງານອົງການ ແລະ ເຮືອນຊານ, ບ້ານຊ່ອງຂອງຕົນ ເພື່ອຮັບປະກັນບໍ່ໃຫ້ເກີດອັກຄີໄພ, ການຂີ້ລັກ-ງັດແງະ ກໍ່ອາດຊະຍາກຳຊີງຊັບ-ລັກຊັບ, ແຫກກະເປົາ ແລະ ອື່ນໆ ໃຫ້ຫລຸດຜ່ອນລົງ.
