ກອງທັບ 1 ຄວ້າແຊ້ມປະເພດທີມແຂ່ງຂັນກ໋ອບ ລາວກ໋ອບ ຄັບ ແຊມປ້ຽນຊິບ 2018


ກອງທັບ 1 ຄວ້າແຊ້ມປະເພດທີມແຂ່ງຂັນກ໋ອບ ລາວກ໋ອບ ຄັບ ແຊມປ້ຽນຊິບ 2018 ເຊິ່ງພິທີປິດໄດ້ຈັດຂຶ້ນວັນທີ 21 ຕຸລາຜ່ານມາ ທີ່ສະໜາມກ໋ອບຄັນທຣີຄຣັບ ໂດຍໃຫ້ກຽດເຂົ້າຮ່ວມ ແລະ ມອບຂອງທ່ານ ເລັດ ໄຊຍະພອນ ເຈົ້າແຂວງອັດຕະປື ແລະ ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ, ມີຄະນະບໍລິຫານງານສະຫະພັນກິລາກ໋ອບແຫ່ງຊາດ, ຜູ້ຕາງໜ້າຈາກບໍລິສັດຜູ້ໃຫ້ການສະໜັບສະໜູນ, ຄະນະຮັບຜິດຊອບຈັດການແຂ່ງຂັນ ແລະ ພາກສ່ວນທີ່ກ່ຽວຂ້ອງ.
ການແຂ່ງຂັນກ໋ອບ “ລາວກ໋ອບ ຄັບ ແຊມປ້ຽນຊິບ 2018” ໄດ້ຈັດຂຶ້ນເປັນເວລາ 2 ວັນ ລະຫວ່າງວັນທີ 20-21 ຕຸລາ 2018 ເປັນການແຂ່ງຂັນ 2 ຮອບ ໃນ 36 ຂຸມ, ມີນັກກິລາເຂົ້າຮ່ວມທັງໝົດ 138 ຄົນ, ມີ 21 ທີມ ທີ່ມາຈາກບັນດາແຂວງ ແລະ ສະໂມສອນກ໋ອບຕ່າງໆອ້ອມຂ້າງສູນກາງ.
ຜ່ານການແຂ່ງຂັນ ປະເພດທີມຊາຍ ອັນດັບ 1 ກະຊວງປ້ອງກັນປະເທດ 1, ອັນດັບ 2 ສະໂມສອນກ໋ອບສິງລາວ 1 ແລະ ອັນດັບ 3 ສະຫະພັນກິລາກ໋ອບແຂວງອຸດົມໄຊ; ປະເພດບຸກຄົນຊາຍ ອັນດັບ 1 ທ່ານ ສີປະເສີດ ແພງພັນດີ, ອັນດັບ 2 ທ່ານ ສາຍຊົນ ວິສີສົມບັດ ແລະ ອັນດັບ 3 ທ່ານ ໄຊຍິ່ງ ຕົງເຢີທໍ; ປະເພດເຍົາວະຊົນຊາຍ ອັນດັບ 1 ທ້າວ ແດງ ຄຳມະວົງ ຈາກສະໂມສອນກ໋ອບເລັກວິວ; ອັນດັບ 2 ທ້າວ ວຽງສະຫວັນ ສົມຫວັງ ຈາກສະໂມສອນກ໋ອບເລັກວິວ ແລະ ອັນດັບ 3 ທ້າວ ແສງເພັດ ເມືອງວົງ; ລາງວັນຊົມເຊີຍຕີໃກ້ທຸງທີ່ສຸດຂຸມ 13 ພາສາມ ທ່ານ ທຳມະລັກ ບົວຫອມ; ລາງວັນຊົມເຊີຍຕີໃກ້ທຸງທີ່ສຸດຂຸມ 3 ພາສາມ ທ່ານ ສິນທະໜອງສັກ ຈັນທະສົມບັດ; ລາງວັນຊົມເຊີຍນັກກິລາສູ້ຊົນດີເດັ່ນ 1 ທ່ານ ພັນທະ ອຸທິດ ຈາກສະໂມສອນກ໋ອບມິດຕະພາບ; ລາງວັນຊົມເຊີຍນັກກິລາສູ້ຊົນດີເດັ່ນ 2 ທ້າວ ແສງເພັດ ເມືອງວົງ.