ເມືອງໂຂງແຕ່ງຕັ້ງຄະນະຮັບຜິດຊອບການທົດແທນຄ່າເສຍຫາຍ ແລະ ການຈັດສັນຍົກຍ້າຍປະຊາຊົນເຂດໂຄງການພັດທະນາສີທັນດອນ
ວັນທີ 17 ຕຸລານີ້, ຫ້ອງວ່າການປົກຄອງເມືອງໂຂງແຂວງຈຳປາສັກ ໄດ້ຈັດກອງປະຊຸມເຜີຍແຜ່ຂໍ້ຕົກລົງຂອງທ່ານນາຍົກລັດຖະມົນຕີເລກທີ 59/ນຍ, ລົງວັນທີ 30 ສິງຫາ 2018 ແລະ ຂໍ້ຕົກລົງຂອງທ່ານເຈົ້າແຂວງຈຳປາສັກເລກທີ 969/ຈຂ.ຈສ, ລົງວັນທີ 24 ກັນຍາ 2018 ວ່າດ້ວຍການແຕ່ງຕັ້ງຄະນະຮັບຜິດຊອບການທົດແທນຄ່າເສຍຫາຍ ແລະ ການຈັດສັນຍົກຍ້າຍປະຊາຊົນໃນເຂດໂຄງການພັດທະນາເຂດເສດຖະກິດໃໝ່ສີທັນດອນ, ໂດຍການເຂົ້າຮ່ວມຂອງທ່ານ ບຸນຖອງ ດີວີໄຊ ເຈົ້າແຂວງຈຳປາສັກ, ມີຜູ້ຕາງໜ້າກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ອໍານາດການປົກຄອງບ້ານໃນເຂດດັ່ງກ່າວເຂົ້າຮ່ວມຢ່າງພ້ອມພຽງ.
ໃນພິທີ, ພາຍຫຼັງທີ່ໄດ້ຮັບຟັງການຜ່ານເອກະສານຂອງນາຍົກລັດຖະມົນຕີ ແລະ ເຈົ້າແຂວງຈຳປາສັກ ເປັນທີ່ຮຽບຮ້ອຍແລ້ວ ກໍໄດ້ຮັບຟັງການເຜີຍແຜ່ແຜນພັດທະນາ ແລະ ນະໂຍບາຍຂອງໂຄງການດັ່ງກ່າວເພື່ອແນໃສ່ດຶງດູດນັກທ່ອງທ່ຽວ ແລະ ສ້າງລາຍຮັບໃນການພັດທະນາເສດຖະກິດ-ສັງຄົມຂອງທ້ອງຖິ່ນ ແລະ ປະເທດຊາດ, ສ້າງວຽກເຮັດງານທຳໃຫ້ປະຊາຊົນຊາວເມືອງໂຂງ ແລະ ເມືອງໃກ້ຄຽງໂດຍທາງກົງ ແລະ ທາງອ້ອມ, ຊ່ວຍພັດທະນາພື້ນຖານໂຄງລ່າງ, ຖະໜົນຫົນທາງ, ໂຮງຮຽນ, ໂຮງໝໍ, ສູນຝຶກວິຊາຊີບອື່ນໆ ແນໃສ່ປັບປຸງຊີວິດການເປັນຢູ່ຂອງປະຊາຊົນຊາວເມືອງໂຂງໄດ້ຮັບການປັບປຸງຍົກລະດັບດີຂຶ້ນກວ່າເກົ່າ. ໂອກາດນີ້, ທ່ານເຈົ້າແຂວງຈຳປາສັກ ກໍໄດ້ໂອລົມ ແລະ ເນັ້ນໃຫ້ອຳນາດການປົກຄອງທຸກຂັ້ນຕ້ອງໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ປະຊາຊົນໄດ້ຮັບຮູ້ ແລະ ເຂົ້າໃຈຕໍ່ກັບການພັດທະນາໂຄງການດັ່ງກ່າວໄດ້ດໍາເນີນໄປຢ່າງມີຜົນສໍາເລັດ.
