ການຢັ້ງຢືນມາດຕະຖານກະສິກໍາສະອາດຂອງລາວ ແມ່ນມີຄວາມຈໍາເປັນສູງ

ກອງປະຊຸມຄະນະກຳມະການຄຸ້ມຄອງລະບົບຄຸນນະພາບ ແລະ ການຢັ້ງຢືນມາດຕະຖານກະສິກຳສະອາດ ໄດ້ຈັດຂຶ້ນໃນວັນທີ 19 ຕຸລານີ້, ທີ່ເມືອງແກ້ວອຸດົມ, ແຂວງ ວຽງຈັນ, ໂດຍການເປັນປະທານຂອງທ່ານ ວິໄລສຸກ ເຄນນະວົງ ຫົວໜ້າກົມປູກຝັງ, ທັງເປັນປະທານຄະນະກຳມະການຄຸ້ມຄອງລະບົບຄຸນນະພາບ ແລະ ການຢັ້ງຢືນມາດຕະຖານກະສິກຳສະອາດ, ມີບັນດາຄະນະກຳມະການຈາກ ກະຊວງ ກະສິກຳ ແລະ ປ່າໄມ້, ກະຊວງ ສາທາລະນະສຸກ, ກະຊວງ ວິທະຍາສາດ ແລະ ເຕັກໂນໂລຊີ, ກະຊວງສຶກສາທິການ ແລະ ກິລາ ເຂົ້າຮ່ວມ, ເພື່ອທົບທວນຄືນ ການຈັດຕັ້ງປະຕິບັດວຽກງານຢັ້ງຢືນ​ມາດຕະຖານ​ການ​ຜະລິດ​ກະສິກຳ​ສະອາດໃນໄລຍະຜ່ານ, ພ້ອມທັງປຶກສາຫາລືບັນຫາ ຈຸດອ່ອນ ແລະ ຂໍ້ຂາດຕົກບົກຜ່ອງຕ່າງໆ ເພື່ອ ວິທີການແກ້ໄຂປັບປຸງລະບົບການຢັ້ງຢືນຂອງລາວໃຫ້ມີຄວາມເຂັ້ມແຂງ ຕາມກອບຂໍ້ກຳນົດ ແລະ ເງື່ອນໄຂມາດຕະຖານສາກົນ (ISO/IEC 17065) ເພື່ອສ້າງຄວາມເຊື່ອໝັ້ນໃຫ້ແກ່ຜູ້ບໍລິໂພກ ແລະ ເປັນທີ່ຍອມຮັບຂອງພາກພື້ນ ແລະ ສາກົນ.

ທ່ານ ວິໄລສຸກ ເຄນນະວົງ ໄດ້ມີຄໍາເຫັນວ່າ: ໃນປະຈຸບັນ ຜູ້ບໍລິໂພກມີຄວາມຫ່ວງຕໍ່ສຸຂະພາບຫຼາຍຂຶ້ນຈິ່ງມີຄວາມສົນໃຈກ່ຽວກັບແຫຼ່ງທີ່ມາຂອງສິນຄ້າກະສິກຳ ແລະ ອາຫານ, ເນື່ອງຈາກການບໍລິໂພກອາຫານທີ່ບໍ່ສະອາດ ຫຼືມີເຊື້ອພະຍາດ ແລະ ສານພິດຕົກຄ້າງປົນເປື້ອນ ຈະສົ່ງຜົນກະທົບຫຼາຍຢ່າງຕໍ່ສຸຂະພາບ. ດັ່ງນັ້ນ, ຄວາມປອດໄພຂອງອາຫານ ຈຶ່ງເປັນບັນຫາທີ່ໄດ້ຮັບຄວາມສົນໃຈຢ່າງກວ້າງຂວາງ.  ເພື່ອຮັບປະກັນດ້ານມາດຕະຖານ ແລະ ຄຸນນະພາບຂອງສິນຄ້າ, ການກວດກາ ແລະ ການຢັ້ງຢືນ, ຈຶ່ງກາຍເປັນເຄື່ອງມືໜຶ່ງ ທີ່ຜູ້ບໍລິໂພກໃຫ້ຄວາມເຊື່ອໝັ້ນ ແລະ ໄວ້ໃຈ, ເນື່ອງຈາກວ່າ ແຫຼ່ງຜະລິດ ແລະ ສະຖານທີ່ຈໍ່າໜ່າຍ ຫຼືແຫຼ່ງຜູ້ບໍລິໂພກ ມີຄວາມຫ່າງກັນ, ເຮັດໃຫ້ຜູ້ບໍລິໂພກບໍ່ເຊື່ອໝັ້ນຕໍ່ຂະບວນການຜະລິດ, ດັ່ງນັ້ນ, ຈຶ່ງອີງໃສ່ອົງກອນກວດກາ ແລະ ຢັ້ງຢືນມາດຕະຖານເປັນອົງກອນກາງ ເພື່ອສ້າງຄວາມເຊື່ອໝັ້ນໃຫ້ແກ່ ຜູ້ບໍລິໂພກ.

ເນື່ອງຈາກທ່າ​ແຮງ​ທີ່ໄດ້ປຽບທາງດ້ານທຳມະຊາດ ເປັນຕົ້ນແມ່ນ ດິນຍັງອຸດົມສົມບູນ, ນໍ້າ ແລະ ສະພາບແວດລ້ອມທີ່ຍັງສະອາດ ແລະ ບໍລິສຸດ, ໄປຄຽງຄູ່ກັບ ຂໍ້ໄດ້ປຽບດັ່ງກ່າວ ພວກເຮົາກໍກຳລັງປະເຊີນໜ້າກັບສິ່ງທ້າທ້າຍ ໂດຍສະເພາະແມ່ນ ການອະນຸລັກຮັກສາສະພາບຄວາມອຸດົມສົມບູນທາງດ້ານສິ່ງແວດລ້ອມ ໃຫ້ຄົງຢູ່ກັບພວກເຮົາຢ່າງ​ໝັ້ນຄົງ ແລະ ຍາວນານ, ການນຳໃຊ້ທ່າແຮງບົ່ມຊ້ອນເພື່ອສ້າງຂໍ້ໄດ້ປຽບ ຄວາມອາດສາມາດໃນການແຂ່ງຂັນດ້ານປະລິມານ ແລະ ຄຸນນະພາບ ກັບຕະຫລາດພາກພື້ນ ແລະ ສາກົນ, ທີ່ນັບມື້ນັບຮຽກຮ້ອງໃຫ້ການຜະລິດເຂົ້າສູ່ຕາມມາດຕະຖານ ສອດຄ່ອງຕາມຂໍ້ກໍານົດ, ເງື່ອນໄຂຂອງຕະຫລາດ, ດັ່ງນັ້ນ, ການຜະລິດກະສິກຳຂອງປະເທດເຮົາກໍຕ້ອງໄດ້ຍົກລະດັບການຜະລິດຈາກພໍກຸ້ມກິນກາຍເປັນສິນຄ້າ ແລະ ກ້າວຂຶ້ນສູ່ຄຸນນະພາບມາດຕະຖານ, ສະອາດ ແລະ ປອດໄພ ໃຫ້ໄປຕາມທ່າອ່ຽງ ຄວາມຕ້ອງການຂອງຕະຫຼາດ.

ທ່ານວິໄລສຸກ ເຄນນະວົງ ກ່າວຕື່ມວ່າ: ເຖິງວ່າໄລຍະຜ່ານມາ ພວກເຮົາໄດ້ມີການລິເລີ່ມ ຫັນລະບົບການຢັ້ງຢືນໄປໃນກອບມາດຕະຖານສາກົນແລ້ວກໍຕາມ, ແຕ່ການຈັດຕັ້ງປະຕິບັດກໍຍັງມີຂໍ້ຈຳກັດ, ຂໍ້ບົກພ່ອງ ແລະ ສິ່ງທ້າທາຍຫຼາຍຢ່າງ ເປັນຕົ້ນແມ່ນ ຄວາມຈຳກັດບຸກຄະລາກອນ, ການສ້າງຄວາມເຂັ້ມແຂງທາງດ້ານຄວາມຮູ້ ແລະ ຄວາມເຂົ້າໃຈກ່ຽວກັບການປະຕິບັດວຽກງານໄປຕາມກອບມາດຕະຖານສາກົນຍັງຈຳກັດ, ຄວາມເຊື່ອໝັ້ນຂອງສັງຄົມຕໍ່ກັບການຢັ້ງຢືນຍັງຕໍ່າ ເນື່ອງຈາກວ່າການເຜີຍແຜ່ ແລະ ການໂຄສະນາຍັງຈຳກັດ. ພ້ອມນັ້ນ, ບັນດາເຄື່ອງມືມະຫາພາກ ແລະ ດ້ານນິຕິກຳຕ່າງໆກໍຍັງບໍ່ທັນຄົບຖ້ວນ, ດັ່ງນັ້ນ, ຈຶ່ງຮຽກຮ້ອງໃຫ້ພາກສ່ວນກ່ຽວຂ້ອງ ຈົ່ງເພີ່ມທະວີຄວາມເອົາໃຈໃສ່ ເພື່ອສ້າງຄວາມເຂັ້ມແຂງໃຫ້ແກ່ລະບົບການຢັ້ງຢືນຂອງລາວ ໄປຕາມມາດຕະຖານ, ຂໍ້ກໍານົດ ແລະ ເງື່ອນໄຂຂອງມາດຕະຖານສາກົນ, ຍົກລະດັບຄຸນນະພາບການຢັ້ງຢືນ ໃຫ້ເປັນທີ່ຍອມຮັບຂອງທຸກພາກສ່ວນຢູ່ພາຍໃນປະເທດ ແລະ ເປັນທີ່ຍອມຮັບຈາກພາກພື້ນ ແລະ ສາກົນໄດ້.