5 ສິ່ງທີ່ມີຜົນຕໍ່ທ່ານ ແລະ ທັງໝົດຂອງຊີວິດທ່ານ
“ຊີວິດທີ່ດີທີ່ສຸດແມ່ນຊີວິດທີ່ມີການວາງແຜນ” ການຕັ້ງເປົ້າໝາຍ ຫລື ການຮູ້ຈັກອອກແບບອະນາຄົດຂອງຕົນເອງ ເປັນທັກ ສະທີ່ດີສຸດທີ່ທ່ານຄວນມີ, ຊີວິດທີ່ດີສຸດແມ່ນຊີວິດທີ່ມີການວາງແຜນ ການໃຊ້ຊີວິດໄປເລື້ອຍໆຢ່າງບໍ່ມີເປົ້າໝາຍບໍ່ແມ່ນເລື່ອງທີ່ບໍ່ດີພໍເທົ່າໃດ, ແຕ່ຖ້າທ່ານເລີ່ມສ້າງມິຕິໃໝ່ໆ, ສ້າງສີສັນ ແລະ ວັດຖຸປະສົງໃຫ້ກັບຊີວິດ ທ່ານຈະຕ້ອງປະຫລາດໃຈກັບຜົນຕອບຮັບທີ່ຕາມມາຢ່າງແນ່ນອນ.
ການຕັ້ງເປົ້າໝາຍສ້າງໂອກາດທ່ານໃຫ້ໄດ້ສຳຜັດກັບພະລັງແຫ່ງຈິນຕະນາໃນໂຕເອງ ລອງຄິດເບິ່ງວ່າການຈິນຕະນາການ ເປັນຈຸດກຳເນີດຂອງເມືອງຕ່າງໆຢ່າງຫລວງຫລາຍ, ການຈິນຕະນາການນຳມາເຊິ່ງວິທີການເອົາຊະນະພະຍາດຮ້າຍ, ຄວາມກ້າວໜ້າ, ຄວາມກ້າວໜ້າໃນອາຊີບ ແລະ ຄວາມສຳພັນ. ການຈິນຕະນາການແມ່ນຈຸດເລີ່ມຕົ້ນຂອງຄວາມຈິງ. ດັ່ງນັ້ນ, ຈົ່ງໃຊ້ພະລັງບ່ອນນີ້ເປັນແຮງຊຸກຍູ້ໃຫ້ທ່ານກ້າວໄປຂ້າງໜ້າ. ຈິນຕະນາການສິ່ງທີ່ທ່ານຫວັງໃນອະນາຄົດ, ສິ່ງທີ່ຈະເຮັດໃຫ້ມື້ອື່ນໃນປີນີ້ ຫລື ແມ່ນແຕ່ທັງ 5 ແລະ 10 ປີຂ້າງໜ້າ ໂດຍທີ່ທ່ານຕ້ອງຄິດເຖິງສິ່ງທີ່ເປັນໄປໄດ້ສຳລັບທ່ານນຳ.
ແຕ່ກ່ອນທີ່ທ່ານຈະສາມາດເຮັດແບບນີ້ໄດ້ ທ່ານຈຳເປັນຕ້ອງຮູ້ 5 ປັດໄຈທີ່ສົ່ງຜົນກະທົບຕໍ່ຊີວິດ ແລະ ເປົ້າໝາຍຂອງທ່ານສາກ່ອນ.
– ປັດໄຈດ້ານສະພາບແວດລ້ອມ : ການມີສ່ວນຮ່ວມໃນການສ້າງສະພາບແວດລ້ອມໃຫ້ໜ້າຢູ່ບໍ່ແມ່ນເລື່ອງຍາກ ກໍພຽງແຕ່ເກັບຂີ້ເຫຍື້ອຈັກອັນທີ່ຕົກຢູ່ຕາມພື້ນແລ້ວຖິ້ມມັນລົງຖັງຂີ້ເຫຍື້ອ ເຊິ່ງຖ້າທຸກຄົນເຮັດແນວນັ້ນໄດ້ ໂລກຄົງຈະໜ້າຢູ່ຂຶ້ນຫລາຍ ການມີສ່ວນຮ່ວມນ້ອຍໆທີ່ບໍ່ເສຍຄ່າໃຊ້ຈ່າຍໃດໆ ຖ້າທຸກຄົນມີສ່ວນຮ່ວມລອງຄິດເບິ່ງວ່າມັນຈະສ້າງຄວາມປ່ຽນແປງໄດ້ຫລາຍປານໃດ.
– ປັດໄຈດ້ານເຫດການ : ເຫດການສົ່ງຜົນກະທົບຕໍ່ເຮົາສະເໝີ ບໍ່ວ່າຈະເປັນເລື່ອງນ້ອຍ, ເລື່ອງ ໃຫຍ່, ເລື່ອງສ່ວນໂຕ, ເລື່ອງລະດັບຊາດ ໄປຈົນເຖິງເລື່ອງລະດັບໂລກ ບໍ່ວ່າເຮົາຈະພົບເຫດການທີ່ນ້ອຍ ຫລື ໃຫຍ່ ທຸກເຫດການລ້ວນແຕ່ສົ່ງຜົນກະທົບຕໍ່ເຮົາໝົດ.
– ປັດໄຈດ້ານຄວາມຮູ້ : ເຮົາທຸກຄົນລ້ວນແຕ່ໄດ້ຮັບຜົນກະທົບຈາກທັງສິ່ງທີ່ໄດ້ຮັບຮູ້ ແລະ ສິ່ງທີ່ເຮົາບໍ່ຮູ້. ມີຄຳກ່າວວ່າ : “ຄວາມບໍ່ຮູ້ບໍ່ແມ່ນເລື່ອງໜ້າຍິນດີ ແຕ່ຊຳ້ພັດເປັນຂຸມສົບ, ຄວາມບໍ່ຮູ້ເປັນຫາຍະນະ, ຄວາມບໍ່ຮູ້ນຳມາເຊິ່ງຄວາມລຳບາກ ແລະ ພະຍາດຮ້າຍ, ຄວາມບໍ່ຮູ້ຈະເຮັດໃຫ້ຊີວິດຂອງທ່ານສັ້ນລົງ, ໄຮ້ຄ່າ ແລະ ວ່າງເປົ່າ” ເຊິ່ງແມ່ນແທ້ດັ່ງຄຳກ່າວ ເພາະການບໍ່ມີຄວາມຮູ້ແນວໃດກໍບໍ່ແມ່ນເລື່ອງທີ່ດີແນ່ນອນ.
– ປັດໄຈດ້ານຜົນຕອບຮັບ : ເຮົາຈະໄດ້ຮັບຜົນກະທົບຈາກຜົນຕອບຮັບຂອງສິ່ງຕ່າງໆ ບໍ່ວ່າຈະເປັນທາງການເງິນ, ຜົນຕອບຮັບຈາກການກະທຳຂອງຕົນເອງ ຫລື ຈາກການເຂົ້າສັງຄົມ ເຮົາກໍຈະໄດ້ຮັບຜົນກະທົບຈາກຜົນຕອບຮັບທີ່ເກີດຂື້ນທັງໝົດ ເຊິ່ງແນ່ນອນວ່າທ່ານບໍ່ສາມາດຄາດເດົາສິ່ງທີ່ຍັງບໍ່ເກີດໄດ້. ດັ່ງນັ້ນ, ການມີວິໄນທີ່ດີຈະຊ່ວຍຈັດການສິ່ງຕ່າງໆໃຫ້ຜົນຕອບຮັບອອກມາດີຂຶ້ນໄດ້.
– ປັດໄຈດ້ານຄວາມຝັນຂອງເຮົາ : ເຮົາທຸກຄົນລ້ວນໄດ້ຮັບຜົນກະທົບຈາກຄວາມຝັນ ຫລື ວິໄສທັດທີ່ເຮົາມີຕໍ່ອະນາຄົດທັງໝົດ ເພາະຊີວິດເຮົາຂຶ້ນຢູ່ກັບສິ່ງທີ່ເຮົາຄິດ, ສິ່ງທີ່ເຮົາຝັນ ແລະ ສິ່ງທີ່ເຮົາຕັ້ງໃຈນັ້ນເອງ.
5 ປັດໄຈທີ່ກ່າວມານີ້ລ້ວນແຕ່ມີຜົນກະທົບຕໍ່ຊີວິດຂອງທ່ານທັງໝົດ ບໍ່ວ່າຈະເປັນຜົນກະທົບທາງດ້ານລົບ ຫລື ບວກ ຊີວິດທີ່ມີການວາງແຜນກໍແມ່ນຊີວິດທີ່ດີທີ່ສຸດ.
