7 ເຄັດລັບຊ່ວຍໃຫ້ທ່ານນອນຫລັບງ່າຍສະບາຍໝົດຄືນ
October 19, 2018 - 12:10 PM
- ກິນກ່ອນນອນ : ວຽກງານວິໄຈໜຶ່ງພົບວ່າການກິນອາຫານໃນປະລິມານໜ້ອຍທີ່ປະກອບໄປດ້ວຍຄາໂບໄຮເດຣດ ພ້ອມດ້ວຍທາດການຊຽມ ຫລື ໂປຣຕິນ ເຊິ່ງອຸດົມໄປດ້ວຍກົດອະມິໂນທຣິບໂຕແຟນ ຈະຊ່ວຍໃຫ້ທ່ານຫລັບສະບາຍຂຶ້ນໃນຕອນກາງຄືນໄດ້ ເພາະສານອາຫານເຫລົ່ານີ້ຈະຊ່ວຍເສີມສ້າງເຊໂຣໂທນິນ ສານເຄມີທາງສະໝອງທີ່ຊ່ວຍໃຫ້ຮູ້ສຶກສະຫງົບ ເຊິ່ງເວລາທີ່ເໝາະສົມໃນການກິນອາຫານກໍແມ່ນ 1 ຊົ່ວໂມງກ່ອນເຂົ້ານອນ.
- ຖ້າຫລັບບໍ່ລົງຈັກເທື່ອກໍຢ່າຝືນ : ເວົ້າກັນມາແຕ່ບູຮານວ່າ ຖ້າທ່ານນອນບໍ່ຫລັບກໍລຸກອອກມາຈາກຕຽງ ແຕ່ການນອນຫົ່ມຜ້າຢູ່ຕຽງທີ່ນຸ້ມສະບາຍຕໍ່ໄປກໍເປັນທາງເລືອກທີ່ດີຄືກັນ ເພາະສະນັ້ນ ຈົ່ງປິດໄຟນອນລົງ ແລະ ໝູນໝອນໃຫ້ສະບາຍ ຫາຍໃຈເຂົ້າ – ອອກເລິກໆ ຫລື ຄິດພາບວ່າກຳລັງອອກກຳລັງກາຍ ຈົນກ່ວາທ່ານຈະເຫງົານອນໄປເອງ.
- ສຳລັບການເຊືອບຫລັບໃນຕອນກາງເວັນ “coffee nap” ຊ່ວຍໄດ້ : ເຮົາມັກລຶ້ງເຄີຍກັບຄວາມຄິດທີ່ວ່າ ກາເຟອີນ ແມ່ນສັດຕູຂອງການນອນຫລັບ, ວຽກງານວິໄຈຂອງອັງກິດພົບວ່າ : ຄົນທີ່ດື່ມກາເຟແບບ “coffee nap” ເພື່ອໃຫ້ເຊືອບຫລັບກໍມີຄືກັນ ໂດຍການດື່ມກາເຟ 1 – 2 ຈອກ ແລ້ວຕໍ່ດ້ວຍການເຊືອບຫລັບເກືອບຈະທັນທີເປັນເວລາ 20 ນາທີ ໂດຍລະຫວ່າງນັ້ນ ຮ່າງກາຍຂອງເຮົາກໍໃຊ້ເວລາປະມານ 20 ນາທີຄືກັນໃນການດູດຊຶມກາເຟອີນໄປກະຕຸ້ນສະໝອງ ເຮັດໃຫ້ເມື່ອຕື່ນຂຶ້ນມາ ເຮົາຈຶ່ງມີຄວາມຮູ້ສຶກຫ້າວຫັນຫລາຍກ່ວາເກົ່ານັ້ນເອງ.
- ສືບກິ່ນແຫ່ງນິທາ : ກິ່ນບາງກິ່ນກໍຊ່ວຍໃຫ້ຄົນເຮົາຮູ້ສຶກຢາກນອນໄດ້ ເຊັ່ນ : ກິ່ນລາເວັນ , ຄາໂມມາຍ ມັນສາມາດສົ່ງຜົນ ໃຫ້ເກີດການເຮັດວຽກຂອງຄື້ນສະໝອງລະດັບອານຟ່າ ເຮັດໃຫ້ທ່ານຮູ້ສຶກຜ່ອນຄາຍ ແລະ ເຫງົານອນ ລອງຢອດນຳ້ມັນຫອມລະເຫີຍ 2 – 3 ຢອດ ລົງໃນນຳ້ລ້າ ແລ້ວພົມໃສ່ໝອນໜ້ອຍໜຶ່ງ.
- ເລືອກສີຫ້ອງນອນໃຫ້ເໝາະສົມ : ສີຂອງຝາຫ້ອງນອນມີຄວາມສຳຄັນຫລາຍກ່ວາການເຮັດໃຫ້ຫ້ອງຈົບງາມ ເພາະຖ້າ ທ່ານເລືອກສີຢ່າງສະຫລາດ ມັນສາມາດເນລະມິດໃຫ້ຫ້ອງນອນຂອງທ່ານເປັນສະຫວັນແຫ່ງການນອນໄດ້ເລີຍ. ສີບາງສີຊ່ວຍໃຫ້ ສົດຊື່ນຫ້າວຫັນ ແລະ ສີບາງສີກໍເຮັດໃຫ້ງ່ວງນອນ ເຊັ່ນ : ສີຂາວ ເປັນຕົ້ນ. ບັນດາຜູ້ຊ່ຽວຊານກ່າວວ່າ ສີຂາວເປັນສີທີ່ໄປລະງັບສານເມລາໂທນິນ ຮໍໂມນທີ່ຊ່ວຍໃຫ້ຮ່າງກາຍກຳນົດຂະບວນການຫລັບ – ການຕື່ນ ດັ່ງນັ້ນ ຈຶ່ງຄວນເລືອກສີນຳ້ຕານ ຫລື ສີກົມ ເຊິ່ງຊ່ວຍເສິມສ້າງການຫລັ່ງສານເມລາໂທນິນແທນ.
- ຢຸດດື່ມນົມອຸ່ນ ແລ້ວຫັນມາດື່ມນຳ້ໝາກເຊີຣີແທນຈະດີກ່ວາ : ຜົນການວິໄຈຫລວງຫລາຍສະແດງໃຫ້ເຫັນວ່າ ການດື່ມນຳ້ໝາກເຊີຣີຈະຊ່ວຍພັດທະນາການນອນຫລັບ ເພາະມັນແມ່ນແຫລ່ງຂອງເມລາໂທນິນ ແລະ ທຣິບໂຕແຟນທາງທຳມະຊາດ ສະນັ້ນ ຄວນດື່ມນຳ້ໝາກເຊີຣີທຸກມື້.
- ຫລິ້ນເກມຈິດຕະວິທະຍາ : ຢ່າດູໝິ່ນພະລັງແຫ່ງສະຕິປັນຍາ ແລະ ຈິນຕະນາການຂອງຕົນເອງເກີນໄປ ເພາະ 2 ສິ່ງນີ້ສາມາດຊ່ວຍໃຫ້ທ່ານນອນຫລັບສະບາຍໄດ້ແທ້ໆ. ຈິນຕະນາການວ່າຊ່ວງເວລາແຫ່ງການນອນຫລັບໝົດລົງແລ້ວ ເຖິງເວລາທີ່ທ່ານຈະຕ້ອງລຸກອອກຈາກຕຽງ ອາບນຳ້ ແຕ່ງໂຕ ແລະ ອອກໄປເຮັດວຽກ ໃນມື້ທີ່ອາກາດທັງໜາວ ແລະ ປຽກຊຸ່ມ ພຽງແຕ່ພາບຄວາມແຕກຕ່າງລະຫ່ວາງບັນຍາກາດອັນໜາວເຢັນກັບຕຽງທີ່ທັງນຸ້ມ, ອຸ່ນ, ສະບາຍ ກໍໜ້າຈະກະຕຸ້ນໃຫ້ທ່ານຢາກຈະຮີບຟ້າວເຂົ້ານອນໄດ້ແລ້ວ.
