23 ຕຸລານີ້ ຈີນຈະເປີດຂົວ ຂ້າມທະເລຍາວທີ່ສຸດໃນໂລກ
ໃນທີ່ສຸດ ລັດຖະບານຈີນກໍປະກາດກຳນົດວັນເປີດ ຂົວຂ້າມທະເລຍາວທີ່ສຸດໃນໂລກ ເຊື່ອມຕໍ່ຮົງກົງ, ມາເກົາ ແລະ ຈີນ ເປັນວັນທີ 23 ຕຸລານີ້ ຫລັງຈາກເລື່ອນມາດົນ.
ສຳນັກຂ່າວ AFP ລາຍງານວ່າ: ການກໍ່ສ້າງເລີ່ມແຕ່ວັນທີ 15 ທັນວາ 2009 ມີຄວາມຍາວ 55 ກິໂລແມັດ ເຊິ່ງລວມທັງຂົວ ແລະ ອຸໂມງ ເຊື່ອມຕໍ່ເກາະລັນເຕົາຂອງຮົງກົງ ໄປເມືອງຈູໄຫ່ໃນແຂວງກວາງຕຸ້ງ ແລະ ມາເກົາ ດິນແດນກາສິໂນ ໂດຍຂ້າມທະເລບໍລິເວນປາກແມ່ນ້ຳຈູຈຽງ.
ສື່ທ້ອງຖິ່ນໄດ້ຮັບເຊີນຈາກສຳນັກງານປະສານງານປັກກິ່ງໃນຮົງກົງ ໃນວັນທີ 17 ຕຸລາ ເພື່ອໄປຮ່ວມງານ “ພິທີເປີດ” ຢູ່ເມືອງຈູໄຫ່ ໃນວັນທີ 23 ຕຸລານີ້ ໂດຍບໍ່ໃຫ້ລາຍລະອຽດເພີ່ມຕື່ມ ແລະ ມີລາຍງານວ່າ: ປະທານປະເທດ ສີ ຈິ້ນຜິງ ຜູ້ນຳຈີນ ຈະເດີນທາງມາເປັນປະທານໃນພິທີ, ແຕ່ຍັງບໍ່ມີການຢືນຢັນຢ່າງເປັນທາງການ.
ແຕ່ໜັງສືພິມໄຊນາ ເດລີ ຂອງຈີນ ລາຍງານໂດຍອ້າງການເປີດເຜີຍຂອງເຈົ້າໜ້າທີ່ຈີນທີ່ກ່ຽວຂ້ອງກັບໂຄງການວ່າ: ຂົວຈະເປີດໃຫ້ລົດແລ່ນໃນວັນດຽວກັນ ຫລັງສຳເລັດພິທີເປີດຢ່າງເປັນທາງການ.
