ມວນຊົນເມືອງຊຳເໜືອຕ້ອນຮັບຂະບວນຄາລາວານສະຫະພັນກຳມະບານລາວຫວນຄືນສູ່ເມືອງວຽງໄຊດ້ວຍບັນຍາກາດຟົດຟື້ນ

ໃນວັນທີ 17 ຕຸລານີ້, ມວນຊົນຊາວເມືອງຊໍາເໜືອນຳໂດຍທ່ານ ລຽນໄຊ ບຸນມະນີວັນ ເຈົ້າເມືອງຊໍາເໜືອ ໄດ້ຈັດພິທີຕ້ອນຮັບຂະບວນຄາລາວານຂອງສະຫະພັນກຳມະບານລາວຫວນຄືນສູ່ເມືອງວຽງໄຊຖານທີ່ໝັ້ນຂອງການປະຕິວັດລາວຢ່າງສົມກຽດ ຢູ່ທີ່ເດີນສວນແກ້ວຫລັກເມືອງ, ຊຶ່ງນໍາໂດຍທ່ານ ປ້ານ ນ້ອຍມະນີ ປະທານສູນກາງສະຫະພັນກຳມະບານລາວ, ພ້ອມດ້ວຍສະມາຊິກກຳມະບານຈາກກະຊວງທະບວງກົມ, ອົງການຈັດຕັ້ງຂອງລັດ ແລະ ແຂວງຕ່າງໆໃນຂອບເຂດທົ່ວປະເທດເຂົ້າຮ່ວມໃນຂະບວນລົດທັງໝົດ 76 ຄັນ ເພື່ອຫວນຄືນສູ່ມູນເຊື້ອປະຕິວັດ ແລະ ທັງເປັນການປະກອບສ່ວນສ້າງຂະບວນການ ໃຫ້ແກ່ງານສະເຫລີມສະຫລອງວັນສ້າງຕັ້ງເມືອງວຽງໄຊຄົບຮອບ 50 ປີທີ່ຈະຈັດຂຶ້ນໃນທ້າຍເດືອນພະຈິກ 2018 ນີ້ ໃຫ້ມີຄວາມໝາຍ, ທັງຕິດພັນກັບກິດຈະກຳປີທ່ອງທ່ຽວລາວ 2018.

ໃນໂອກາດນີ້, ຂະບວນຄາລາວານດັ່ງກ່າວຍັງໄດ້ທ່ຽວຊົມບັນດາຖໍ້າທ່ານຜູ້ນຳ ທີ່ເມືອງວຽງໄຊ, ງານຕະຫລາດນັດວາງສະແດງສິນຄ້າ ແລະ ຈັດກອງປະຊຸມເປີດກວ້າງຄົບຄະນະບໍລິຫານງານຄັ້ງທີ 4 ສະໄໝທີ 7 ຂອງສະຫະພັນກຳມະບານລາວຢູ່ທີ່ຖໍ້າຊ້າງຫລອດເມືອງວຽງໄຊແຂວງຫົວພັນອີກດ້ວຍ.