ລັດເລັ່ງຊ່ວຍເຫລືອເດັກທີ່ປະສົບໄພນໍ້າຖ້ວມຢູ່ເມືອງສະໜາມໄຊໃຫ້ໄດ້ຮັບການສຶກສາ.

ຄະນະກໍາມະການແກ້ໄຂໄພພິບັດລະດັບຊາດ ໃຫ້ຮູ້ວ່າ: ລັດຖະບານໄດ້ຊີ້ນໍາໃຫ້ກະຊວງສຶກສາທິການ ແລະ ກິລາ ເລັ່ງຊ່ວຍເຫລືອເດັກນ້ອຍ-ເຍົາວະຊົນ ທີ່ປະສົບໄພນໍ້າຖ້ວມຢູ່ເມືອງສະໜາມໄຊແຂວງອັດຕະປື ໃຫ້ມີເງື່ອນໄຂເຂົ້າສຶກສາຮໍ່າຮຽນຢ່າງເປັນປົກກະຕິຄືກັບນັກຮຽນໃນທ້ອງຖິ່ນຕ່າງໆທົ່ວປະເທດ.

ຕາມການລາຍງານຂອງກະຊວງສຶກສາທິການ ແລະ ກິລາ ໃຫ້ຮູ້ວ່າ: ມາຮອດປັດຈຸບັນ, ໂຮງຮຽນຕ່າງໆຢູ່ເມືອງສະໜາມໄຊໄດ້ເປີດການຮຽນ-ການສອນເປັນສ່ວນໃຫຍ່ແລ້ວ, ພາຍຫລັງລັດຖະບານໃຫ້ການຊ່ວຍເຫລືອສະໜອງປື້ມແບບຮຽນ, ປື້ມຄູ່ມືຄູນັບແຕ່ຊັ້ນປະຖົມຈົນຮອດຊັ້ນມັດທະຍົມຕົ້ນເກືອບ 2.000 ຊຸດ, ພ້ອມທັງສະໜອງຊຸດນັກຮຽນ, ກະເປົາ, ອຸປະກອນການຮຽນ 760 ກວ່າຊຸດ ແລະ ໄດ້ມອບເງິນເພື່ອປົວແປງຈິດໃຈໃຫ້ຄູສອນ 67 ຄົນຜູ້ລະ 1 ລ້ານກີບ, ພ້ອມນໍາໃຊ້ເງິນທີ່ລະດົມໄດ້ຊ່ວຍເຫລືອສຸກເສີນບັນດາໂຮງຮຽນທີ່ໄດ້ຮັບຜົນເສຍຫາຍຈາກໄພນໍ້າຖ້ວມແຫ່ງລະ 5 ລ້ານກີບ. ໄດ້ຊ່ວຍຍົກຍ້າຍ ແລະ ຈັດສົ່ງນັກຮຽນທີ່ຈົບຊັ້ນ ປ5 ກວ່າ 100 ຄົນ ໄປຮຽນຢູ່ມັດທະຍົມສາມັນຊົນເຜົ່າແຂວງອັດຕະປື, ຈັດສົ່ງນັກຮຽນຈົບຊັ້ນ ມ4 ແລະ ມ7 ຈໍານວນ 60 ຄົນໄປຮຽນຕໍ່ຢູ່ໂຮງຮຽນເຕັກນິກວິຊາຊີບປາກເຊ ໂດຍໄດ້ຮັບທຶນສະໜັບສະໜູນຈາກໂຄງການເວນລາ Vella ປະເທດເຢຍລະມັນ ແລະ ປັດຈຸບັນ, ໄດ້ສະເໜີຂໍທຶນການສຶກສານໍາພາກລັດໃຫ້ນັກຮຽນຈົບ ມ7 ໄປຮຽນຢູ່ວິທະຍາໄລຄູປາກເຊຈໍານວນ 9 ຄົນ, ມະຫາມິທະຍາໄລຈໍາປາສັກ 18 ຄົນ ແລະ ມະຫາວິທະຍາໄລແຫ່ງຊາດ (ດົງໂດກ) 4 ຄົນ. ສ່ວນເດັກກໍາພ້າແມ່ນຍັງລໍຖ້າການເກັບກໍາຂໍ້ມູນໃຫ້ລະອຽດຊັດເຈນຈາກສູນພັກເຊົາຊົ່ວຄາວແຕ່ລະແຫ່ງ ເພື່ອຈະໄດ້ຈັດສັນໄປຮຽນຢູ່ໂຮງຮຽນຕ່າງໆຕາມຄວາມເໝາະສົມ.