ເວນເກີ ກຽມກັບເຂົ້າສູ່ວົງການບານເຕະອີກຄັ້ງ
ອາແຊນ ເວນເກີ ອະດີດຜູ້ຈັດການທີມສະໂມສອນ ອາເຊນອລ ໃນພຣີເມຍລີກ ອັງກິດ ເປີດເຜີຍວ່າ: ອາດກັບມາເຮັດໜ້າທີ່ຜູ້ຈັດການທີມອີກຄັ້ງໃນຕົ້ນປີ 2019 ນີ້ ເນື່ອງຈາກຫລາຍສະໂມສອນທົ່ວໂລກຕ່າງໃຫ້ຄວາມສົນໃຈຍື່ນຂໍ້ສະເໜີມາໃຫ້.
ອາແຊນ ເວນເກີ ອະດີດຜູ້ຈັດການທີມສະໂມສອນ ອາເຊນອລ ອາຍຸ 68 ປີ ຢຸດບົດບາດການຄຸມທີມສະໂມສອນ ອາເຊນອລ ໃນລະດູການ 2017-18 ເນື່ອງຈາກກະແສກົດດັນທີ່ບໍ່ສາມາດພາທີມປະສົບຜົນສໍາເລັດໃນໄລຍະຜ່ານມາ ແຕ່ຕອນນີ້ຈະກັບມາສູ່ວົງການບານເຕະອີກຄັ້ງ.
ອາແຊນ ເວນເກີ ກ່າວວ່າ: ພາຍຫລັງທີ່ລາອອກຈາກສະໂມສອນ ອາເຊນອລ ແລ້ວ ມີຫລາຍສະໂມສອນທີ່ໄດ້ທາບທາມໄປເຮັດໜ້າທີ່ຫົວໜ້າຄູຝຶກທີມຊາດຍີ່ປຸ່ນ ແລະ ຂໍ້ສະເໜີເຂົ້າເປັນປະທານຜູ້ບໍລິຫານຂອງສະໂມສອນ ປາຣີ ແຊງແຊກແມງ ທີມຍັກໃຫຍ່ໃນບ້ານເກີດ ແຕ່ຍັງບໍ່ໄດ້ໃຫ້ຄໍາຕອບ. ມາຮອດປັດຈຸບັນຕົນເອງພັກຜ່ອນພຽງພໍແລ້ວ ແລະ ພ້ອມຈະກັບມາສູ່ວົງການອີກຄັ້ງ ແຕ່ຈະຢູ່ສະໂມສອນໃດຍັງບໍ່ແນ່ໃຈ.
