ໂກນບານຍິງຕ້ອງຝຶກຊ້ອມໃຫ້ຫລາຍຂຶ້ນ ຫລັງເຂົ້າຮ່ວມເອຊຽນພາລາເກມຄັ້ງທີ 12
ນັກກິລາໂກນບານຍິງທີມຊາດລາວ ຕ້ອງໄດ້ຝຶກຊ້ອມໃຫ້ຫລາຍຂຶ້ນກວ່າເກົ່າ ຫລັງຈາກເຂົ້າຮ່ວມການແຂ່ງຂັນເອຊຽນພາລາເກມຄັ້ງທີ 12 ທີ່ປະເທດອິນໂດເນເຊຍ ຈັດຂຶ້ນລະຫວ່າງຕົ້ນເດືອນຕຸລາຜ່ານມານີ້ ເພື່ອກຽມຄວາມພ້ອມເຂົ້າຮ່ວມການແຂ່ງຂັນລາຍການຕ່າງໆໃນພາກພື້ນ ແລະ ສາກົນ.
ທ່ານ ລອນຄໍາ ທອງມີໄຊ ຫົວໜ້າຄູຝຶກໂກນບານທີມຊາດຍິງ ໃຫ້ສໍາພາດວ່າ: ການເຂົ້າຮ່ວມແຂ່ງຂັນເອຊຽນພາລາເກມຄັ້ງຜ່ານມາ ຄະນະນໍາໂກນບານທີມຊາດລາວໄດ້ສົ່ງນັກກິລາໂກນບານຍິງເຂົ້າຮ່ວມຈໍານວນ 6 ຄົນ, ຜ່ານການແຂ່ງຂັນ ທີມຊາດລາວບໍ່ສາມາດຜ່ານເຂົ້າຊີງຊະນະເລີດໄດ້ ແລະ ສ້າງຜົນງານບໍ່ໂດດເດັ່ນພໍປານໃດ ຈາກການແຂ່ງຂັນ 5 ຄັ້ງ ເສຍ 5 ຄັ້ງ ສິ່ງດັ່ງກ່າວໄດ້ເຮັດພວກເຮົາຕ້ອງໄດ້ເອົາໃຈໃສ່ຝຶກຊ້ອມໃຫ້ຫລາຍຂຶ້ນກວ່າເກົ່າ ເພື່ອເພີ່ມພະລະກໍາລັງໃຫ້ແກ່ນັກກິລາ ໂດຍຈະເຂົ້າສູນຝຶກຊ້ອມທ້າຍປີນີ້. ແນວໃດກໍຕາມ ການເຂົ້າຮ່ວມແຂ່ງຂັນຄັ້ງຜ່ານມານີ້ ຕົນເອງໃນນາມຄະນະຄູຝຶກແມ່ນເພິ່ງພໍໃຈຜົນງານຫລາຍ ເພາະພວກເຮົາສາມາດຕໍ່ສູ້ກັບຄູ່ແຂ່ງໄດ້ຢ່າງສົມສັກສີ ເຖິງວ່າຈະຕົກຮອບກໍຕາມ ແຕ່ຜົນງານຖືວ່າດີຂຶ້ນຈາກການແຂ່ງຂັນໃນລະດັບອາຊີ.
ການແຂ່ງຂັນເອຊຽນພາລາເກມຄັ້ງທີ 12 ທີ່ປະເທດອິນໂດເນເຊຍ ທີມຊາດລາວສາມາດຍາດໄດ້ 1 ຫລຽນຄໍາຈາກກິລາຍົກນໍ້າໜັກ.
