ເນມາ ຢາກກັບຄືນ ບາເຊໂລນາ
ອາສ ແລະ ມຸນໂດ້ ເດປໍຕິໂບ 2 ສື່ຊື່ດັງຂອງປະເທດສະເປນ ລາຍງານວ່າ: ເນມາ ຫົວຫອກຄົນດັງຂອງ ປາຣີ ແຊງແຊກແມງ ຢາກກັບໄປຢູ່ ບາເຊໂລນາ ຫລັງຈົບລະດູການນີ້, ແຕ່ຍັງຄາບັນຫາເລື່ອງຄ່າຕົວ ແລະ ບັນຫາທີ່ວ່າ ບາເຊໂລນາ ຕ້ອງການໃຫ້ລາວມາຢູ່ກັບທີມ ຫລື ບໍ່.
ເນມາ ກອງໜ້າຊຸບເປີສະຕາຂອງ ປາຣີ ແຊງແຊກແມງ ສະໂມສອນມະຫາເສດຖີແຫ່ງ ລີກເອິງ ຝຣັ່ງ ຢາກຍ້າຍກັບໄປຢູ່ກັບ ບາເຊໂນລາ ອະດີດຕົ້ນສັງກັດໃນ ລາລີກາ ສະເປນ ໃນຊຳເມີ້ໜ້າແລ້ວ.
ດາວເຕະຊາວບຣາຊິລ ສ້າງຄວາມຮືຮາໃຫ້ຫລາຍຄົນ ດ້ວຍການຍ້າຍຈາກ ບາເຊໂລນາ ໄປຢູ່ກັບ ປາຣີ ແຊງແຊກແມງ ໃນປີ 2017 ດ້ວຍຄ່າຕົວສູງເປັນສະຖິຕິໂລກ 222 ລ້ານຢູໂຣ ເຊິ່ງລາວກໍປະສົບຜົນສຳເລັດກັບທີມທັນທີ ດ້ວຍການໄດ້ແຊ້ມລີກ, ແຊ້ມເຟຣັນ ຄັບ ແລະ ແຊ້ມ ເຟຣັນ ລີກ ຄັບ ໄປຄອງ.
ເຖິງຢ່າງໃດກໍຕາມ, ເນມາ ຕົກເປັນຂ່າວລືກ່ຽວກັບການຍ້າຍອອກຈາກ ປາຣີ ແຊງແຊກແມງ ມາໂດຍຕະຫລອດ ຫລັງຈາກຂ່າວລືວ່າລາວມີການພົວພັນບໍ່ຄ່ອຍດີກັບຫລາຍຄົນໃນທີມ ເຊິ່ງລາວໄດ້ປະຕິເສດຂ່າວດັ່ງກ່າວຢູ່ສະເໝີ, ສ່ວນຜູ້ບໍລິຫານຂອງ ເປແອສເຊ ໄດ້ອອກມາໃຫ້ສຳພາດເລື້ອຍໆວ່າ ບໍ່ແມ່ນຄວາມຈິງແຕ່ຢ່າງໃດ.
ຫລ້າສຸດ ສື່ຫລາຍສຳນັກລາຍງານວ່າ: ເນມາ ຕ້ອງການຍ້າຍກັບໄປຫລິ້ນໃນຖິ່ນ ຄຳນູ ຫລັງຈົບລະດູການນີ້ ໂດຍລາວບໍ່ມີຄວາມຄຶກຄື້ນ ເພາະມີທີມ ປາຣີ ແຊງແຊກແມງ ທີ່ໂດດເດັ່ນພຽງທີມດຽວ ບໍ່ມີການແຂ່ງຂັນທີ່ສູສີ.
