ບໍລິຄໍາໄຊຫາລືມາດຕະການຫລຸດຜ່ອນອຸປະຕິເຫດບົນທ້ອງຖະໜົນ
ປັດຈຸບັນແຂວງບໍລິຄໍາໄຊ, ພວມຮ່າງແຜນໂຄງການຫລຸດຜ່ອນອຸປະຕິເຫດບົນທ້ອງຖະໜົນ, ພາຍຫລັງເຫັນວ່າສະພາບດັ່ງກ່າວມີລັກສະນະເພີ່ມຂຶ້ນ, ເຊິ່ງເມື່ອບໍ່ດົນນີ້, ພາກສ່ວນກ່ຽວຂ້ອງຕ່າງໆອ້ອມຂ້າງແຂວງ ກໍໄດ້ເຂົ້າຮ່ວມປືກສາຫາລືຮ່າງແຜນໂຄງການດັ່ງກ່າວ, ໂດຍການເປັນປະທານຂອງທ່ານເຈົ້າແຂວງບໍລິຄໍາໄຊ ກອງແກ້ວ ໄຊສົງຄາມ.
ທ່ານຫົວໜ້າກອງບັນຊາການ ປກສ ແຂວງ ໃຫ້ຮູ້ວ່າ: ອຸປະຕິເຫດສ່ວນໃຫຍ່ແມ່ນເກີດຈາກການລະເມີດກົດລະບຽບຈະລາຈອນຂອງຜູ້ຂັບຂີ່ ເປັນຕົ້ນ: ຂັບຂີ່ລົດໄວ, ລ່ວງໄຟອໍານາດ ແລະ ປ້າຍຫ້າມຕ່າງໆ, ດື່ມສິ່ງມືນເມົາແລ້ວຂັບລົດ, ການຈອດລົດຊະຊາຍ, ລົດບໍ່ຮັບປະກັນດ້ານເຕັກນິກ ແລະ ອື່ນໆ ແລະ ອີກສ່ວນໜຶ່ງແມ່ນເກີດຈາກເສັ້ນທາງເປ່ເພ ແລະ ບໍ່ໄດ້ມາດຕະຖານ, ຊຶ່ງໃນ 6 ເດືອນຕົ້ນປີນີ້, ທົ່ວແຂວງມີອຸປະຕິເຫດເກີດຂຶ້ນ 128 ຄັ້ງ ແລະ ມີຜູ້ເສຍຊີວິດ 30 ຄົນ, ເຊິ່ງເຫັນວ່າເປັນຕົວເລກທີ່ສູງສົມຄວນ, ສະນັ້ນເພື່ອຫລຸດອຸປະຕິເຫດ ກໍຄືຜ່ອນຄວາມສູນເສຍດ້ານຊີວິດ ແລະ ຊັບສີນຂອງປະຊາຊົນ, ໂດຍສະເພາະຜູ້ໃຊ້ລົດໃຊ້ຖະໜົນ, ຈຶ່ງມີຄວາມຈໍາເປັນສ້າງໂຄງການນີ້ຂຶ້ນມາ, ໂດຍໜ້າວຽກຕົ້ນຕໍແມ່ນສຸມໃສ່ການໂຄສະນາ, ສຶກສາອົບຮົມຜູ້ໃຊ້ລົດ-ໃຊ້ຖະໜົນ ຢູ່ຕາມສະຖາບັນການສຶກສາ, ອົງການຈັດຕັ້ງລັດ, ໂຮງຈັກ-ໂຮງງານ ແລະ ຊຸມຊົນຕ່າງໆ ໃຫ້ຮັບຮູ້ເຂົ້າໃຈຕື່ມກ່ຽວກັບກົດລະບຽບຈະລາຈອນ. ໄປຄຽງຄູ່ກັບການບັງຄັບໃຊ້ມາດຕະການຕ່າງໆໃຫ້ເຂັ້ມງວດ.
ເພີ່ມທະວີເອົາໃຈໃສ່ກວດກາພາຫະນະ, ກວດກາຜູ້ຂັບຂີ່ຢ່າງລຽນຕິດ, ປັບປຸງ ສ້ອມແປງ ແລະ ກໍ່ສ້າງເສັ້ນທາງໃຫ້ຖືກຕ້ອງຕາມມາດຕະຖານເຕັກນິກ, ຕິດຕັ້ງກ້ອງວົງຈອນປິດໃນຕົວເມືອງ ແລະ ເສັ້ນທາງສາຍສໍາຄັນ ເພື່ອເຮັດໃຫ້ສະພາບການເກີດອຸປະຕິເຫດຫລຸດໜ້ອຍລົງ ແລະ ສາມາດແກ້ໄຂຕາມລະບຽບກົດໝາຍໄດ້.
