ຫວຽດນາມຍຶດເມທແອມເຟຕາມິນ ຄັ້ງໃຫຍ່ທີ່ສຸດ
ຕຳຫລວດຫວຽດນາມໄດ້ຍຶດເມທແອມເຟຕາມິນມູນຄ່າປະມານ 3 ລ້ານໂດລາສະຫະລັດ ເປັນການຍຶດຄັ້ງໃຫຍ່ທີ່ສຸດເທົ່າທີ່ເຄີຍມີມາ, ຂະນະທີ່ຜູ້ເສບສານເສບຕິດສັງເຄາະປະເພດນີ້ເພີ່ມຂຶ້ນ.
ຕຳຫລວດເປີດເຜີຍວ່າ: ຜູ້ຕ້ອງສົງໄສສອງຄົນຫລົບໜີຈາກຈຸດເກີດເຫດ, ເຈົ້າໜ້າທີ່ສາມາດນຳຈັບໄດ້ໜຶ່ງຄົນ ເປັນຊາວລາວທີ່ຮັບສາລະພາບວ່າ: ໄດ້ຮັບຄ່າຈ້າງ 10.000 ໂດລາສະຫະລັດ ໃຫ້ຂົນສົ່ງຢາເສບຕິດຄັ້ງນີ້ໄປເມືອງດາໜັງ, ສ່ວນຜູ້ຕ້ອງສົງໄສອີກຄົນໜຶ່ງເປັນຊາວຫວຽດນາມ ເຈົ້າໜ້າທີ່ກຳລັງຕາມຈັບຕົວຢູ່. ຕຳຫລວດເປີດເຜີຍວ່າ: ພົບຖົງສີຂຽວ 12 ຖົງ ແຕ່ລະຖົງມີຫໍ່ສານສີຂາວຫໍ່ນ້ອຍໆນ້ຳໜັກລວມທັງໝົດ 309 ກິໂລ.
ຫວຽດນາມມີກົດໝາຍປາບປາມຢາເສບຕິດຮຸນແຮງທີ່ສຸດແຫ່ງໜຶ່ງຂອງໂລກ, ແຕ່ຍັງເປັນແຫລ່ງລຳລຽງ ແລະ ຈຸດໝາຍຂອງຜູ້ລັກລອບນຳເອົາຢາເສບຕິດເຂົ້າມາຈາກບໍລິເວນສາມຫລ່ຽມທອງຄຳທີ່ເປັນແຫລ່ງຜະລິດສານເສບຕິດ, ທາງການມີຕົວເລກຜູ້ລົງທະບຽນໃຊ້ສານເສບຕິດ 220.000 ຄົນ ແລະ ພົບວ່າຕົວເລກຜູ້ໃຊ້ສານເສບຕິດສັງເຄາະເພີ່ມຂຶ້ນເຖິງ 7% ໃນໄລຍະປີ 2001-2016 ສ່ວນຫລາຍມາຈາກປະເທດໃກ້ຄຽງ.
