5 ວິໄນທີ່ຈະຊ່ວຍໃຫ້ທ່ານຫລຸດພົ້ນຈາກພາລະວຽກໜັກໃນແຕ່ລະມື້
- ລະວັງຄຳເວົ້າໃຫ້ດີ : ຫາກທ່ານລອງນຶກເຖິງມື້ທີ່ບໍ່ດີທີ່ສຸດທີ່ ທ່ານຮູ້ສຶກວ່າກຳລັງຕົກຢູ່ໃນວົງວຽນທີ່ບັງຄັງໃຫ້ທ່ານຕ້ອງເຮັດວຽກໜັກຫລາຍໆ ແລ້ວຈະພົບວ່າ ຄຳເວົ້າຂອງທ່ານສ່ວນຫລາຍມັກຈະເປັນໄປໃນແງ່ລົບເກືອບຈະທັງໝົດ ທ່ານອາດເວົ້າວ່າ : “ບໍ່ໜ້າຈະເຮັດແບບນີ້ເລີຍ ຫລື ບໍ່ມີທາງເຮັດໄດ້ແທ້ໆ” ເພາະວ່າສະພາບເຫລົ່ານີ້ລ້ວນບັ່ນທອນການເບິ່ງໂລກໃນແງ່ດີຂອງທ່ານສະເໝີ ດັ່ງນັ້ນ ເມື່ອທ່ານສາມາດຝຶກຕົນເອງໃຫ້ເວົ້າແຕ່ສິ່ງທີ່ດີອອກມາໄດ້ ແມ່ນແຕ່ໃນເວລາພະເຊີນສະຖານະການທີ່ບໍ່ດີ ທ່ານຈະສາມາດຫລຸດລະດັບຄວາມສິ້ນຫວັງທີ່ກຳລັງທຳລາຍທ່ານໄດ້ໃນທັນທີ ແລະ ຫາກທ່ານສາມາດປ່ຽນຄຳວ່າ : “ບໍ່ໜ້າເລີຍ” ມາເປັນ “ເທື່ອໜ້າຈະຕ້ອງເຮັດໄດ້ແທ້ໆ” ຮັບຮອງວ່າຫົນທາງຂ້າງໜ້າຈະຄ່ອງແຄ້ວຂຶ້ນກ່ວາເກົ່າຫລາຍ ການເລືອກຄິດ ແລະ ເລືອກຄຳທີ່ໃຊ້ໃນແຕ່ລະມື້ ລ້ວນຊ່ວຍເສີມສ້າງພະລັງງານດ້ານບວກ ເຊິ່ງຈະກາຍມາເປັນແຮງຊຸກຍູ້ໃຫ້ທ່ານຂ້າມຜ່ານມື້ທີ່ບໍ່ດີນັ້ນໄປໄດ້.
- ເປັນນາຍຂອງເວລາ : ສິ່ງໜຶ່ງທີ່ບໍ່ສົມຄວນໃຫ້ອະໄພເມື່ອຕົກຢູ່ໃນສະພາບນີ້ກໍຄື ຕາຕະລາງເວລາ ບໍ່ວ່າຈະເປັນກຳນົດການປະຊຸມ, ກຳນົດມື້ສົ່ງວຽກ ຫລື ລາຍການສິ່ງທີ່ຕ້ອງເຮັດທີ່ຍາວເປັນຫາງວ່າວ ຖ້າຫາກທ່ານບໍ່ສາມາດຄວບຄຸມ ແລະ ຈັດສັນເວລາເຫລົ່ານີ້ໄດ້ ພວກມັນຈະກາຍເປັນຝ່າຍທ່ີຄວບຄຸມທ່ານແທນ ແລະ ນີ້ເປັນ 2 ວິທີງ່າຍໆທີ່ຈະຊ່ວຍໃຫ້ທ່ານຈັດການຕາຕະລາງເວລາເຫລົ່ານີ້ໄດ້ຢ່າງມີປະສິດທິພາບ :
– ວິທີທຳອິດ ແມ່ນຈຳກັດເວລາໃນການເຮັດວຽກໄວ້ ທ່ານອາດຮູ້ສຶກວ່າບໍ່ສາມາດເສຍເວລາໄດ້ແມ່ນແຕ່ຊົ່ວໂມງດຽວ ເພາະ ແນ່ນອນວ່າບັນຫາເລື່ອງເວລາ ໂດຍສະເພາະສຳລັບຜູ້ທີ່ເຮັດວຽກຄົນດຽວນັ້ນເປັນເລື່ອງໃຫຍ່, ແຕ່ຂໍໃຫ້ຮູ້ໄວ້ວ່າການໃຊ້ເວລາທັງ ໝົດໄປກັບການເຮັດວຽກນັ້ນຈະຍິ່ງເຮັດໃຫ້ທ່ານເສຍເວລາໄປກັບສິ່ງຍົວະໃຈຕ່າງໆນາໆຍິ່ງກ່ວາເກົ່າ ດັ່ງນັ້ນ ທາງທີ່ດີແມ່ນຄວນ ຈັດສັນເວລາທີ່ແນ່ນອນໃຫ້ກັບການເຮັດວຽກ ໂດຍໃນເວລານັ້ນໃຫ້ເນັ້ນໄປໃສ່ວຽກຢ່າງເຕັມທີ່ ແລະ ໃຊ້ເວລາທີ່ເຫລືອໃຫ້ເກີດປະ ໂຫຍດທີ່ສຸດ ສິ່ງສຳຄັນແມ່ນໃຫ້ຖືວ່າຊ່ວງເວລາຫລັງຈາກແລ້ວ ວຽກຈະແມ່ນການພັກຜ່ອນຮ່າງກາຍ ແລະ ສະໝອງເທົ່ານັ້ນ.
– ວິທີຕໍ່ມາ ແມ່ນການເຮັດລາຍການສິ່ງທີ່ຕ້ອງເຮັດໃນທຸກໆຄືນກ່ອນເຂົ້ານອນ. ໃນໜັງສື How Successful People Think ມີບົດໜຶ່ງທີ່ມີເນື້ອໃນໂດຍຫຍໍ້ໄວ້ວ່າ ເມື່ອໃດກໍຕາມທີ່ທ່ານຄິດເຖິງມື້ອື່ນໃນຄືນກ່ອນໜ້າ ທ່ານກໍຈະຕື່ນຂຶ້ນມາພ້ອມຮັບຄວາມສຳເລັດໃນມື້ນັ້ນໄດ້ເລີຍ.
- ຕັ້ງເປົ້າໝາຍໃນການເຕີບໃຫຍ່ : ສິ່ງທີ່ທ່ານຄວນເຮັດກໍແມ່ນກຳນົດເປົ້າໝາຍໃຫ້ກັບວຽກ ຫລື ທຸລະກິດຂອງທ່ານ, ເປັນຄົນຕັດສິນໃຈວ່າຕ້ອງການທີ່ຈະປະສົບຄວາມສຳເລັດຫລາຍເທົ່າໃດກ່ອນທີ່ຕະຫລາດ ຫລື ຜູ້ຄົນຈະມາຕັດສິນໃຈແທນທ່ານ. ຫາກຢາກໃຫ້ວຽກ ຫລື ທຸລະກິດເຕີບໃຫຍ່ ທ່ານຈະຕ້ອງເຕີບໃຫຍ່ໃນຖານະຜູ້ບຸກເບີກ ອາດເຮັດໄດ້ໂດຍການອ່ານໜັງສືທີ່ກ່ຽວຂ້ອງກັບໜ້າວຽກທີ່ເຮັດ, ເຂົ້າຟັງການປະຊຸມ, ການຈັດສະແດງວຽກ, ການສຳມະນາ ຫລື ອາດສະໝັກຮຽນຫລັກສູດອອນລາຍຂອງໜ່ວຍງານທີ່ໜ້າເຊື່ອຖືກໍໄດ້ ສິ່ງສຳຄັນແມ່ນຂໍໃຫ້ເຮັດຫຍັງກໍໄດ້ທີ່ຈະຊ່ວຍໃຫ້ທ່ານຍັງຄົງຄວາມຫລັກແຫລມເອົາໄວ້ ແລະ ເມື່ອໂຕທ່ານເອງເຕີບໃຫຍ່ຂຶ້ນແລ້ວ ທຸລະກິດຂອງທ່ານກໍຍ່ອມເຕີບໃຫຍ່ໄປນຳໄດ້ຄືກັນ.
- ສ້າງເຄືອຂ່າຍສັງຄົມ : ຜູ້ປະກອບທຸລະກິດທີ່ພົບບັນຫາພາລະວຽກຫລາຍໆ ມັກຈະຕົກຢູ່ໃນສະພາບໂດດດ່ຽວຢູ່ສະເໝີ ເມື່ອໃດທີ່ທ່ານຕ້ອງຮັບຜິດຊອບວຽກທຸກຢ່າງຕັ້ງແຕ່ການຂາຍໄປຈົນເຖິງການເຮັດຄວາມສະອາດ ຊີວິດໃນຖານະຜູ້ປະກອບທຸລະກິດຂອງທ່ານກໍອາດຖືໄດ້ວ່າເປັນຄວາມໂດດດ່ຽວໄດ້ຄືກັນ ດັ່ງນັ້ນ ຖ້າຫາກຢາກຈະຫລຸດພົ້ນອອກໄປຈາກວົງວຽນທີ່ໜ້າຫົດຫູ່ແຫ່ງນີ້ກໍຄວນຈະຕິດຕໍ່ເຊື່ອມໂຍງກັບຜູ້ຄົນຕື່ມ ໝາຍຄວາມວ່າ ທ່ານຈະຕ້ອງພາໂຕເອງໄປຢູ່ທ່າມກາງສະຖານະການທີ່ຈະຕ້ອງພົບປະກັບຜູ້ຄົນອື່ນໆນັ້ນເອງ. ທ່ານຄວນຫາໂອກາດໄປຮ່ວມງານຕ່າງໆ ທັງງານສຳມະນາ, ກອງປະຊຸມ, ການພົບປະສັງສັນຂອງອົງກອນທຸລະກິດ ຢ່າງໜ້ອຍກໍເດືອນລະເທື່ອຍັງດີ ທ່ານຈະໄດ້ພົບກັບຜູ້ຄົນທີ່ໜ້າສົນໃຈຫລວງຫລາຍ ຂະນະດຽວກັນກໍໄດ້ສ້າງເຄືອຂ່າຍ, ໝູ່ເພື່ອນ, ທີມງານ ຫລື ແມ່ນແຕ່ຄູ່ຮ່ວມທຸລະກິດກໍເປັນໄດ້.
- ສະຫລອງໃຫ້ກັບຄວາມສຳເລັດທີ່ໄດ້ມາ : ຜູ້ຄົນມັກຈະຕິດຢູ່ກັບຄວາມສຳເລັດຈາກການບັນລຸເປົ້າໝາຍຈົນບໍ່ແມ່ນແຕ່ຈະຄິດຢຸດພັກເພື່ອສະຫລອງໃຫ້ກັບຄວາມສຳເລັດເຫລົ່ານັ້ນເລີຍ. ລອງປ່ຽນມາຊື່ນຊົມກັບຊ່ວງເວລາແຫ່ງຄວາມສຳເລັດນີ້ແດ່ ຫລື ຖ້າກຳນົດມື້ສົ່ງວຽກຢູ່ຕໍ່ໜ້າ ຢ່າງໜ້ອຍກໍໃຫ້ເວລາກັບໂຕເອງໄດ້ສຳຜັດກັບຄວາມປິຕິຢ່າງໜ້ອຍປະມານ 5 ນາທີກໍຍັງດີ ແລະ ຖ້າຫາກວ່າເປັນຄວາມສຳເລັດຄັ້ງໃຫຍ່ກໍໃຫ້ພາຄອບຄົວ ຫລື ໝູ່ເພື່ອນໄປສະຫລອງແດ່. ນອກຈາກນີ້ ແມ່ນແຕ່ຄວາມສຳເລັດນ້ອຍໆໃນຊີວິດປະຈຳວັນກໍບໍ່ຄວນຖືກຖືເບົາ ອາດໃຫ້ລາງວັນໂຕເອງນ້ອຍໆໂດຍການພັກຜ່ອນນັ່ງດື່ມກາເຟກໍໄດ້ຄືກັນ.
ສິ່ງທ່ີທ່ານເຮັດສຳເລັດໄດ້ດ້ວຍຕົນເອງຫລັງຈາກທີ່ມືດມິດມາດົນ ລ້ວນແຕ່ເປັນສິ່ງທີ່ບົ່ງບອກເຖິງຄວາມສຳເລັດອັນແທ້ຈິງ ໃນຊ່ວງທຳອິດວຽກ ຫລື ທຸລະກິດອາດຈະຄ່ອງແຄ້ວເພາະມີແສງສ່ອງທາງໃຫ້ ແຕ່ເມື່ອໃດທີ່ແສງນຳທາງນັ້ນຫາຍໄປ ແລ້ວພົບກັບຄວາມຍາກລຳບາກ ສິ່ງນີ້ຈະເປັນໂຕນຳທາງເຖິງຄວາມສຳເລັດຂອງທ່ານໄດ້ເປັນຢ່າງດີ, ສະຖານະການຍາກລຳບາກແມ່ນສິ່ງຕັດສິນວ່າທ່ານຈະເປັນແພ້ ຫລື ຊະນະ.
