ເຈົ້າໜ້າທີ່ຂັ້ນສູງສະຫະລັດອາເມລິກາ ແລະ ສປປ ລາວ ພົບປະສອງຝ່າຍກ່ຽວກັບແຜນຍຸດທະສາດອິນໂດ-ປາຊີຟິກ
ໃນວັນທີ 14-16 ຕຸລານີ້, ເຈົ້າໜ້າທີ່ຂັ້ນສູງກະຊວງການຕ່າງປະເທດສະຫະລັດອາເມລິກາ ໄດ້ເດີນທາງມາຢ້ຽມຢາມ ສປປ ລາວ ເພື່ອທົບທວນຄືນກ່ຽວກັບຄວາມຄືບໜ້າໃນການພົວພັນສອງຝ່າຍ ແລະ ເພື່ອທົບທວນແຜນຍຸດທະສາດສະຫະລັດອາເມລິກາ ໃນພາກພື້ນອິນໂດ-ປາຊີຟິກ.
ໃນໄລຍະການຢ້ຽມຢາມ ທ່ານ ຮອງຜູ້ຊ່ວຍລັດຖະມົນຕີ Walter Douglas ວອລເຕີ ດັກລາສ ຈາກຫ້ອງການອາຊີຕາເວັນອອກແລະປາຊີຟິກ ໄດ້ພົບປະກັບທ່ານ ຮອງລັດຖະມົນຕີ ທອງເພັດ ອິນທະວົງ, ກະຊວງພະລັງງານ ແລະ ບໍ່ແຮ່ ເພື່ອປຶກສາຫາລືແນວທາງໃນການສືບຕໍ່ເສີມຂະຫຍາຍການລົງທຶຶນມູນຄ່າສູງຂອງສະຫະລັດອາເມລິກາ ໃນຂົງເຂດເສດຖະກິດຂອງລາວ.
ໃນທີ່ປະຊຸມ, ທ່ານ ຮອງຜູ້ຊ່ວຍລັດຖະມົນຕີ ດັກລາສ ໄດ້ກ່າວວ່າ: ສປປ ລາວ ຍັງຄົງສືບຕໍ່ປັບປຸງສະພາບແວດລ້ອມທາງທຸລະກິດ, ເຊີ່ງຈະເຮັດໃຫ້ການເສີມຂະຫຍາຍການດຶງດູດການລົງທຶນທີ່ມີຄຸນນະພາບສູງຈາກ ສະຫະລັດອາເມລິກາ ເພື່ອຊ່ວຍຂັບເຄື່ອນການເຕີບໂຕ ທາງເສດຖະກິດຢ່າງຢັ້ງຢືນ ແລະ ເປັນການເປີດໂອກາດໃຫ້ແກ່ ນັກທຸລະກິດ ຈາກສະຫະລັດອາເມລິກາເຂົ້າມາລົງທຶນຫລາຍຂຶ້ນ.
ທ່ານ ຮອງຜູ້ຊ່ວຍລັດຖະມົນຕີ ດັກລາສ ຢືນຢັນຈະສືບຕໍ່ສະໜັບສະໜູນ ການຊ່ວຍເຫຼືອຈາກສະຫະລັດອາເມລິກາໃຫ້ແກ່ ອາຊຽນ ແລະ ກໍສະແດງຄວາມຂອບໃຈ ມາຍັງ ສປປ ລາວສຳລັບບົດບາດອັນສຳຄັນໃນການເປັນຜູ້ປະສານງານອາຊຽນກັບສະຫະລັດອາເມລິກາ. ທ່ານຍັງໄດ້ເນັ້ນເຖິງຄວາມສົນໃຈຂອງລັດຖະບານສະຫະລັດອາເມລິກາໃນການສົ່ງເສີມການເຕີບໂຕຂອງເສດຖະກິດບົນພຶ້ນຖານການປະຕິບັດກົດລະບຽບ ແລະ ການຄ້າ-ການລົງທຶນທີ່ມີມູນຄ່າສູງ.
ທ່ານ DAS Douglas ໄດ້ກ່າວວ່າ: ແຜນຍຸດທະສາດອິນໂດ – ປາຊີຟິກ ແມ່ນ ລະບຽບການ ແລະ ຫຼັກການ ເພື່ອເຄົາລົບນັບຖື ອະທິປະໄຕ ແລະ ຄວາມປາຖະຫນາຕ້ອງການຂອງບັນດາປະເທດໃນຂົງເຂດພາກພື້ນ. ນີ້ຖືວ່າເປັນສິ່ງທີ່ສຳຄັນທີ່ສຸດເພື່ອໃຫ້ມີການເປີດກວ້າງ, ມີຄວາມຍຸດຕິທໍາ ແລະ ມີຄວາມໂປ່ງໃສ ສໍາລັບການຄ້າ ແລະ ການລົງທຶນ, ເພື່ອພວກເຮົາຈະໄດ້ສົ່ງເສີມການພັດທະນາແບບຍືນຍົງ.
