ຜູ້ລ້ຽງສັດລາຍໃຫຍ່ໃກ້ຈະໝົດຫວັງ

ຜູ້ປະກອບການລ້ຽງສັດລາຍໃຫຍ່ໃນປະເທດໃກ້ຈະໝົດຫວັງໃນການດໍາເນີນທຸລະກິດດ້ານນີ້, ພາຍຫລັງພົບບັນຫາຫຍຸ້ງຍາກຫລາຍດ້ານທີ່ກະທົບຕໍ່ຄວາມຢູ່ລອດຂອງຕົນ, ຊຶ່ງຖ້າຫາກພາກລັດບໍ່ຊ່ວຍແກ້ໄຂໄວ ອາດເຮັດໃຫ້ຂະບວນການລ້ຽງສັດເປັນສີນຄ້າຫລຸດໜ້ອຍລົງ. ດັ່ງທ່ານ ຄໍາຟອງ ວໍລະບຸດ ຮອງອໍານວຍການກຸ່ມບໍລິສັດລາວມີໄຊ ເຊິ່ງມີຟາມລ້ຽງສັດຂະໜາດໃຫຍ່ແຖວໜ້າຂອງປະເທດ ໃຫ້ຮູ້ວ່າ: ເຖິງວ່າພາກລັດຈະໄດ້ມີທິດຊຸກຍູ້ສົ່ງເສີມໃຫ້ປະຊາຊົນເກີດມີຂະບວນການປູກ-ການລ້ຽງເພື່ອເປັນສີນຄ້ານັບມື້ຫລາຍຂຶ້ນກໍຕາມ, ແຕ່ໃນຕົວຈິງແລ້ວເຫັນວ່າຜູ້ປະກອບການລ້ຽງສັດເປັນຟາມ ເປັນຕົ້ນ: ງົວ, ໝູ ຍັງປະສົບກັບບັນຫາຫລາຍດ້ານ, ໂດຍສະເພາະຕະຫລາດຈໍາໜ່າຍ, ຄ່າໄຟຟ້າແພງ, ສະພາບອາກາດປ່ຽນແປງ, ພະຍາດລະບາດ, ການເຂົ້າເຖິງແຫລ່ງທຶນ, ການຮຽກຂໍເງິນໂດຍບໍ່ສົມເຫດສົມຜົນຂອງເຈົ້າໜ້າທີ່ປະຈໍາດ່ານກວດກາໃນເສັ້ນທາງຕ່າງໆ, ການຖືກກັກກັນຈາກປະເທດສົ່ງອອກ ແລະ ບັນຫາອື່ນໆ.

ທ່ານ ຄໍາຟອງ ກ່າວວ່າ: ໃນໄລຍະເປີດຟາມໃໝ່ປີ 2014 ມີງົວ, ຄວາຍ ແລະ ໝູ່ ພໍ່ແມ່ພັນລວມກັນກວ່າ 2.000 ໂຕ ແລະ ສາມາດສະໜອງສັດສົ່ງອອກໄປຫວຽດນາມປະມານ 350-400 ໂຕຕໍ່ຊຸດ ແລະ ລາຄາກໍຢູ່ໃນລະດັບ 30.000 ກີບຕໍ່ກິໂລ. ແຕ່ມາຮອດປັດຈຸບັນ, ຍັງເຫລືອງົວພໍ່ແມ່ພັນພຽງແຕ່ 500 ໂຕເທົ່ານັ້ນ ຍ້ອນຕະຫລາດຈໍາໜ່າຍມີຈໍາກັດ ແລະ ສະພາບການລັກລອບນໍາເຂົ້າຊີ້ນສັດຈາກປະເທດໃກ້ຄຽງທີ່ມີລາຄາຖືກກວ່າເຮັດໃຫ້ການຈໍາໜ່າຍສັດລ້ຽງພາຍໃນບໍ່ດີ, ຈຶ່ງຈໍາເປັນຂາຍພໍ່ແມ່ພັນສັດອອກ ເພື່ອຫລຸດຜ່ອນຄ່າໃຊ້ຈ່າຍຕ່າງໆໃນການບໍລິຫານພາຍໃນຟາມ, ຍິ່ງໄປກວ່ານັ້ນລາຄາງົວທີ່ສົ່ງໄປຕ່າງປະເທດຫລຸດລົງເຫລືອພຽງແຕ່ 25.000 ກີບຕໍ່ກິໂລເທົ່ານັ້ນ. ຕໍ່ສະພາບດັ່ງກ່າວຢາກຂໍໃຫ້ພາກລັດຊ່ວຍຊອກວິທີແກ້ໄຂບັນຫາຫຍຸ້ງຍາກທີ່ກ່າວມານັ້ນໂດຍໄວ ເພື່ອຊ່ວຍໃຫ້ຜູ້ປູກ-ຜູ້ລ້ຽງ ກໍຄືຂະບວນການຜະລິດກະສິກໍາເປັນສີນຄ້າໃນປະເທດມີບັນຍາກາດຟົດຟື້ນຂຶ້ນ.