ບຸນຊ່ວງເຮືອທ່າວັດຈັນປີນີ້ເນັ້ນສົ່ງເສີມວັດທະນະທໍາ ແລະ ການທ່ອງທ່ຽວ
ທ່ານເຈົ້າເມືອງຈັນທະບູລີ, ນະຄອນຫລວງວຽງຈັນ ໄດ້ຖະແຫລງຂ່າວຕໍ່ສື່ມວນຊົນວ່າ: ງານບຸນຊ່ວງເຮືອທ່າວັດຈັນປີນີ້, ແມ່ນຈະໄດ້ຈັດຂຶ້ນເປັນເວລາ 4 ວັນຄື: ໃນລະຫວ່າງວັນທີ 22-25 ຕຸລານີ້, ເພື່ອແນໃສ່ສົ່ງເສີມຮີດຄອງປະເພນີ ແລະ ວັດທະນະທໍາອັນດີງາມຂອງຊາດ, ພ້ອມເປັນການດຶງດູດການອງທ່ຽວໃຫ້ຫລາຍຂຶ້ນ ແລະ ເພື່ອຮັບປະກັນຈຸດປະສົງ ແລະ ເປົ້າໝາຍດັ່ງກ່າວ ທາງເມືອງ ກໍຄືຄະນະຮັບພິຊອບງານດັ່ງກ່າວ ຈະໄດ້ເພີ່ມທະວີການຮັກສາຄວາມສະຫງົບເປັນລະບຽບຮຽບຮ້ອຍ, ຊຶ່ງໄດ້ກຳນົດສະຖານທີ່ຈັດວາງຂາຍສິນຄ້າ ແລະ ກຳລັງຮັກສາຄວາມສະຫງົບ, ຊຶ່ງໄດ້ອອກຂໍ້ຫ້າມຕ່າງໆຄື: ຫ້າມບໍ່ໃຫ້ມີການໂຄສະນາທຸກຮູບແບບທີ່ຜິດຕໍ່ກົດໝາຍຂອງ ສປປ ລາວ, ຫ້າມຂາຍ ຫລື ນຳເອົາອາວຸດທຸກປະເພດ ລວມທັງ: ພ້າ, ມີດ, ງ້າວ, ສະໜັບມື ແລະ ປະເພດຂອງມີຄົມຕ່າງໆ ເຂົ້າໄປໃນງານໂດຍເດັດຂາດ, ຫ້າມນຳເອົາທາດເບື່ອ, ສານເຄມີທີ່ອອກລິດທາງປະສາດທຸກຊະນິດ, ສິ່ງເກີດສຽງດັງເກີນຂອບເຂດ ແລະ ກະໂພກເຂົ້າມາຈູດ ແລະ ວາງຂາຍພາຍໃນງານຢ່າງເດັດຂາດ, ຫ້າມນຳເອົາຜະລິດຕະພັນທີ່ລອກແບບຕ່າງໆນຳເອົາມາຂາຍຈຳໜ່າຍພາຍໃນເດັດຂາດ, ຫ້າມ ນຳເອົາເຄື່ອງສຽງອອກມາໂຄສະນາສິນຄ້າຢູ່ນອກບໍລິເວນຮ້ານກາຍຂອບເຂດ ທີ່ຄະນະກຳມະການຈັດງານໄດ້ກຳນົດໃຫ້, ຫ້າມຂາຍ ແລະ ນຳເອົາຜະລິດຕະພັນວັດທະນະທຳລາມົກ ເຊັ່ນ: ແຜ່ນຊີດີລາມົກ ແລະ ຮູບພາບລາມົກຕ່າງໆ ເຂົ້າມາວາງຂາຍຢູ່ໃນງານ, ຫ້າມຫລີ້ນການພະນັນທຸກປະເພດ ແລະ ອາລະວາດຕີກັນຢ່າງເດັດຂາດ, ຫ້າມຂາຍເຄື່ອງຊະຊາຍໂດຍບໍ່ໄດ້ຮັບອະນຸຍາດຈາກຄະນະກຳມະການຈັດງານຕະຫລາດນັດ, ງານບຸນອອກພັນສາປະວໍລະນາ ແລະ ຊ່ວງເຮືອປະເພນີປະຈຳປີ 2018, ຫ້າມດື່ມສິ່ງມືນເມົາເກີນຂອບເຂດ ຖ້າຜູ້ໃດລະເມີດ ຈະຖືກເຈົ້າໜ້າທີ່ກ່າວເຕືອນ ຫລື ນຳຕົນໄປພັກຜ່ອນໄວ້ກ່ອນ.
ຄະນະກຳມະການຈັດງານບຸນດັ່ງກ່າວ ໃຫ້ຮູ້ອີກວ່າ: ບຸນຊ່ວງເຮືອປີນີ້ໄດ້ເພີ່ມມາດຕະການຮັກສາຄວາມສະຫງົບຮອບດ້ານ, ໂດຍໄດ້ຈັດກຳລັງເວນຍາມ ແລະ ປະຈຳການຕະຫອດ 24 ຊົ່ວໂມງຢູ່ຕາມບ້ານ, ສຳນັກງານ, ອົງການທົ່ວເມືອງໃຫ້ມີຄວາມສະຫງົບປອດໄພ, ເຊິ່ງກຳນົດຈຸດປ້ອງກັນ 24 ຈຸດ, ມີກຳລັງຫລາຍກ່ວາ 800 ຄົນ, ລວມມີກຳລັງເຈົ້າໜ້າທີ່ ປກສ ເມືອງ, ນະຄອນຫລວງວຽງຈັນ ແລະ ກຳລັງຊາວໜຸ່ມເຂົ້າຮ່ວມໃນການປະຕິບັດກວດກາປ້ອງກັນເວນຍາມຕາມທາງຮ່ອມທາງຊອຍ ແລະ ຕາມຈຸດຕ່າງໆທີ່ໄດ້ກຳນົດໄວ້ໃຫ້ມີຄວາມສະຫງົບປອດໄພ.
