ມູນນິທິ ເມແບັງ ຊ່ວຍສ້າງສູນອົບຮົມການຕໍ່າແຜ່ນແພຢູ່ແຂວງຊຽງຂວາງ

ພິທີມອບ-ຮັບ ແລະ ເປີດນໍາໃຊ້ສູນຝຶກອົບຮົມການຕໍ່າແຜນແພ ແລະ ອາຄານຫໍພັກພະນັກງານ ແລະ ຜູ້ມາຝຶກອົບຮົມ ໄດ້ຈັດຂຶ້ນເມື່ອທ້າຍອາທິດຜ່ານມານີ້, ຢູ່ເມືອງແປກແຂວງຊຽງຂວາງ, ໂດຍມີທ່ານ ບຸນໂຮມ ເທບທານີ ຮອງເຈົ້າແຂວງຊຽງຂວາງ ແລະ ທ່ານປະທານມູນນິທິເມແບັງ, ປະທານບໍລິສັດປູກມອນລ້ຽງມ້ອນສາວໄໝ ຈໍາກັດ ແລະ ປະຊາຊົນຜູ້ປູກມອນ-ລ້ຽງມອນເຂົ້າຮ່ວມເປັນຈໍານວນຫລາຍ.

ສູນແຫ່ງນີ້, ຈະເປັນບ່ອນຮຽນຮູ້ດ້ານເຕັກນິກວິຊາການໃໝ່ໆໃນການປູກມອນ-ລ້ຽງມ້ອນ ແລະ ສາວໄໝອິນຊີ ແບບຄົບວົງຈອນສໍາລັບແມ່ຍິງພາຍໃຕ້ໂຄງການ “ເມແບ້ງ ວູເມັນ ອີໂຄ-ແວເວີ ຮອສເທວ MayBank Women Eco-Weavers Hostel”, ໂດຍໄດ້ເລີ່ມກໍ່ສ້າງມາແຕ່ເດືອນເມສາ 2018 ເປັນຕົ້ນມາ, ລວມມີມູນຄ່າ 60 ພັນໂດລາສະຫະລັດ ເພື່ອແນໃສ່ສ້າງຄວາມສະດວກດ້ານທີ່ພັກອາໃສໃຫ້ຜູ້ທີ່ມາຝຶກອົບຮົບ, ໂດຍສະເພາະແມ່ຍິງທີ່ຢູ່ເຂດຊົນນະບົດຫ່າງໄກ, ເຊິ່ງເປັນສ່ວນໜຶ່ງຂອງການສົ່ງເສີມການຕໍ່າຫູກທໍໄໝແບບຍືນຍົງຢູ່ລາວ.

ໂຄງການສົ່ງເສີມຕໍ່າແຜ່ນແບບອະນຸລັກຂອງມູນນິທິເມແບັງ, ໄດ້ເລີ່ມມາແຕ່ປີ 2016 ຢູ່ 4 ປະເທດຄື: ລາວ, ກໍາປູເຈຍ, ອິນໂດເນເຊຍ ແລະ ມາເລເຊຍ, ໂຄງການໄດ້ຊ່ວຍໃຫ້ແມ່ຍິງມີວຽກເຮັດງານທໍາ ແລະ ມີລາຍໄດ້ທີ່ໝັ້ນຄົງ, ທັງເປັນການສ້າງຄວາມຍືນຍົງໃຫ້ມໍລະດົກ ແລະ ວັດທະນະທໍາທ້ອງຖິ່ນ ແລະ ສົ່ງເສີມຜະລິດຕະພັນແຜ່ນແພພື້ນເມືອງອອກສູ່ສາກົນອີກດ້ວຍ.