ລ໋ອບສະເຕດ້ຽມ ເສຍໃຫ້ ນິວຟຸດບອນຄັບ 7-0 ບານເຕະກະຊັບມິດ
ທ້າຍອາທິດຜ່ານມາ ທີ່ສະໜາມກິລາລ້ານຊ້າງ, ລ໋ອບສະເຕດ້ຽມ ເສຍໃຫ້ ສະໂມສອນນິວຟຸດບອນຄັບ 7-0 ຂອງການແຂ່ງຂັນບານເຕະກະຊັບມິດລະຫວ່າງ ລາວ-ໄທ.
ທ່ານ ອາລ໋ອບ ມະນີບົດ ປະທານອາຄາເດມີ ລ໋ອບສະເຕດ້ຽມ ໃຫ້ສໍາພາດວ່າ: ການແຂ່ງຂັນຄັ້ງນີ້ຖືວ່າເປັນການເປີດປະສົບການໃຫ້ແກ່ນ້ອງໆທີ່ຢູ່ໃນຕົ້ນສັງກັດ ເພື່ອນໍາເອົາບົດຮຽນການລົງສະໜາມຄັ້ງນີ້ໄປແກ້ໄຂ ແລະ ພັດທະນາອາຄາເດມີຂອງພວກເຮົາກ້າວສູ່ລະດັບມາດຕະຖານ. ນອກຈາກນັ້ນ ຍັງເປັນການເຊື່ອມສໍາພັນທີ່ດີລະຫວ່າງ ລາວ-ໄທ. ເຖິງວ່າການລົງສະໜາມຄັ້ງນີ້ ພວກເຮົາຈະເສຍໃຫ້ເຂົາແບບຂາດລອຍກໍຕາມ ພວກເຮົາກໍມີຄວາມພາກພູມໃຈຕໍ່ກັບຜົນງານ ເພາະວ່ານັກກິລາແຕ່ລະຄົນຂອງພວກເຮົາແມ່ນຍັງບໍ່ທັນລົງສະໜາມໃຫຍ່ຈັກຄັ້ງ ເພາະແຕ່ລະຄັ້ງການລົງສະໜາມ ຫລື ແຂ່ງຂັນແມ່ນໃຊ້ເດີ່ນບານເຕະນ້ອຍ. ດັ່ງນັ້ນ, ຈຶ່ງເຮັດໃຫ້ນັກກິລາຂອງພວກເຮົາບໍ່ມີຄວາມລື້ງເຄີຍ ສົ່ງຜົນໃຫ້ການແຂ່ງຂັນອອກມາແບບຂາດລອຍ.
ອາຄາເດມີ ລ໋ອບສະເຕດ້ຽມ ເປີດສອນທຸກໆວັນເສົາ-ທິດ ເວລາ 8:00 -11: 00 ໂມງ ທີ່ເດີ່ນລ໋ອບສະເຕ້ດ້ຽມ ບ້ານຊ້າງຄູ້ ເມືອງໄຊທານີ ນະຄອນຫລວງວຽງຈັນ.
