ກວາງໂຈ່ວ R&F ທຸ້ມ 10 ລ້ານຢູໂຣ ຈັບມືກັບ ອາແຈ໋ກ ພັດທະນານັກເຕະເຍົາວະຊົນ-ໄວໜຸ່ມ ໃນສັນຍາ 5 ປີ

ໃນຕົ້ນອາທິດນີ້ ສະໂມສອນບານເຕະ ອາແຈ໋ກ ອຳສະເຕີດຳ (Ajax Amsterdam) ທີມຊັ້ນນຳໃນລີກສູງສຸດຂອງເນເທີແລນ ຕົກລົງຮ່ວມມືກັບ ສະໂມສອນບານເຕະ ກວາງໂຈ່ວ ອາຣແອນເອຟ (Guangzhou R&F) ທີມດັງໃນລີກສູງສຸດຂອງຈີນ ໃນການພັດທະນານັກເຕະເຍົາວະຊົນ-ໄວໜຸ່ມຂອງສະໂມສອນ ກວາງໂຈ່ວ ອາຣແອນເອຟ ເຊັນສັນຍາ 5 ປີ ມູນຄ່າ 10 ລ້ານຢູໂຣ.

ເອັດວິນ ຟານເດີຊາຣ (Edwin Van de Sar) ຜູ້ອຳນວຍການສະໂມສອນ ອາແຈ໋ກ ອຳສະເຕີດຳ ອະດີດຜູ້ຮັກສາປະຕູທີມຊາດເນເທີແລນ, ສະໂມສອນ ອາແຈ໋ກ ອຳສະເຕີດຳ ແລະ ແມນເຊັສເຕີ ຢູໄນເຕັດ ກ່າວວ່າ: ສູນພັດທະນານັກເຕະເຍົາວະຊົນ ຫລື Academy ແມ່ນມີຄວາມສຳຄັນຢ່າງຍິ່ງໃນການພັດທະນາທີມ, ພວກເຮົາພ້ອມແລກປ່ຽນຄວາມຮູ້, ບົດຮຽນ ແລະ ປະສົບການເຊິ່ງກັນ ແລະ ກັນ.

ຂະນະທີ່ Nicky Wong ຮອງປະທານສະໂມສອນ ກວາງໂຈ່ວ ອາຣແອນເອຟ ກ່າວວ່າ: Academy ອາແຈ໋ກ ເປັນໜຶ່ງໃນ Academy ທີ່ດີທີ່ສຸດໃນໂລກ ເຊື່ອວ່າຈະສາມາດຊ່ວຍພັດທະນານັກເຕະເຍົາວະຊົນ-ໄວໜຸ່ມຂອງສະໂມສອນ ແລະ ປະເທດຈີນ.