ປ໊ອກບາ ຕົກລົງຍ້າຍໄປ ບາຊາ ໄດ້ແລ້ວ
ສຳນັກຂ່າວ “ໄຣ ສະປອດ” ຂອງອີຕາລີ ລາຍງານ ມິໂນ ໄຣໂອລາ ຜູ້ຈັດການສ່ວນຕົວຂອງ ປໍ ປ໊ອກບາ ມິດຟິລທີມຊາດຝຣັ່ງ ຂອງ ແມນເຊັສເຕີ ຢູໄນເຕັດ ສາມາດຕົກລົງໃນຫລັກການເບື້ອງຕົ້ນໄດ້ແລ້ວວ່າຈະຍ້າຍໄປ ບາເຊໂລນາ ແຕ່ບໍ່ໄດ້ລະບຸວ່າຈະຍ້າຍທີມທັນທີຕອນຕະຫລາດເປີດຮອບ 2 ເດືອນມັງກອນ ຫລື ຈົບລະດູການນີ້.
ປ໊ອກບາ ຫາກໍຍ້າຍມາຈາກ ຢູເວນຕຸສ ດ້ວຍຄ່າຕົວເປັນສະຖິຕິໂລກເມື່ອ 2 ປີ ແຕ່ໄລຍະຫລັງລາວບໍ່ມີຄວາມສຸກ ໂດຍສະເພາະຄວາມບໍ່ລົງລອຍກັບ ໂຮເຊ ມູຣິນໂຢ ຈົນຖືກປົດຕຳແໜ່ງຮອງກັບຕັນທີມໃນເດືອນຜ່ານມາ.
ຂະນະດຽວກັນມີລາຍງານອີກວ່າ: ບາເຊໂລນາ ຮ່ວມກັບ ແມນເຊັສເຕີ ຢູໄນເຕັດ ສະແດງຄວາມສົນໃຈ ໂທບີ ອັລເດີໄວເຣລ ກອງຫລັງທີມຊາດເບລຢ້ຽມ ໄວ 29 ປີຂອງ ທ໊ອດແນມ ຮອດສະເປີ ທີ່ເຫລືອສັນຍາອີກບໍ່ຮອດປີ ແລະ ຍັງບໍ່ໃກ້ຄຽງທີ່ຈະຕົກລົງເລື່ອງສັນຍາໃໝ່ໄດ້ສຳເລັດ, ເຖິງວ່າ ໂທບີ ມີການຕໍ່ສັນຍາ 1 ປີ ແຕ່ມາພ້ອມເງື່ອນໄຂທີ່ມີຄ່າຈີກສັນຍາພຽງ 25 ລ້ານປອນ ເມື່ອເຖິງໄລຍະ 2 ອາທິດສຸດທ້າຍກ່ອນຕະຫລາດປິດ.
