3 ຄຸນລັກສະນະພິເສດຂອງພະນັກງານທີ່ທຸກອົງກອນຕ້ອງການໂຕ
ປິກາຍນີ້ບໍລິສັດຜະລິດແວ່ນຕາ ວໍບີ ພາກເກີ (Warby Parker) ໄດ້ຖືກປະເມີນລາຄາວ່າເປັນຮ້ານຄ້າອອນລາຍທີ່ມີມູນ ຄ່າຫລາຍທີ່ສຸດໃນໂລກ ໃນລາຄາສູງເຖິງ 1 ພັນລ້ານໂດລາສະຫະລັດ. ປະທານທັງສອງຂອງບໍລິສັດນາມວ່າ Dave Gilboa ແລະ Neil Blumenthal ແລະ ຜູ້ຮ່ວມກໍ່ຕັ້ງອີກ 2 ຄົນ ນາມວ່າ : Andrew Hunt ກັບ Jeff Raider ພວກເຂົາມີຄວາມໄຝ່ຝັນ ວ່າຢາກຈະມອບແວ່ນທີ່ດີມີລົດສະນິຍົມ ແລະ ລາຄາບໍ່ແພງໃຫ້ກັບຜູ້ຄົນ ພວກເຂົາຈຶ່ງໄດ້ກໍ່ຕັ້ງບໍລິສັດ Warby Parker ຂຶ້ນໃນປີ 2010 ແລະ ມີຄູ່ແຂງລາຍໃຫຍ່ ດັ່ງ Luxottica.
ບໍລິສັດ Warby Parker ມີສຳນັກງານໃຫຍ່ຕັ້ງຢູ່ເມືອງນິວຢອກ ແລະ ມີຫ້ອງການເປີດໃໝ່ຢູ່ເມືອງ Nashville ນອກຈາກນີ້ຍັງມີຮ້ານຂາຍຍ່ອຍອີກກ່ວາ 40 ສາຂາທົ່ວປະເທດໃນສະຫະລັດອາເມລິກາ ເພື່ອທີ່ຈະເດີນຕາມຄວາມຝັນ ແລະ ພາລະກິດຂອງຜູ້ກໍ່ຕັ້ງ ການເລືອກພະນັກງານເຂົ້າມາເຮັດວຽກກັບບໍລິສັດຈຶ່ງເປັນສິ່ງທີ່ສຳຄັນຫລາຍ.
ທີມງານ Business Insider ໄດ້ມີໂອກາດສຳພາດ ທ່ານ Dave Gilboa ປະທານຂອງບໍລິສັດ ໃນງານ Cosmopolitan and SoFi’s Fun Fearless Moneyevent ວ່າດ້ວຍເລື່ອງຄຸນສົມບັດທີ່ເຂົາໃຊ້ໃນການເລືອກພະນັກງານ ແລະ ຕໍ່ໄປນີ້ກໍແມ່ນ ບົດສຳພາດຂອງເຂົາ.
- ຄວາມຢາກຮູ້ຢາກເຫັນ : “ພົບວ່າພະນັກງານທີ່ດີມັກຈະເປັນຄົນທີ່ຢາກຮູ້ຢາກເຫັນ ແລະ ຮຽນຮູ້ໄດ້ເລື້ອຍໆ ທັງໃນ ແລະ ນອກທຸລະກິດ. ສິ່ງຕ່າງໆກຳລັງປ່ຽນແປງຢ່າງໄວວາເຖິງຂັ້ນທີ່ວ່າຖ້າທ່ານມີປະສົບການ ແລະ ທັກສະພໍສຳລັບວຽກມີຄວາມເປັນ ໄປໄດ້ສູງຫລາຍທີ່ວຽກເຫລົ່ານີ້ຈະປ່ຽນໄປໃນບໍ່ເທົ່າໃດປີຂ້າງໜ້າ ເຮົາຈຶ່ງຕ້ອງການຄົນທີ່ປັບໂຕໄດ້ ແລະ ພ້ອມທີ່ຈະຮຽນຮູ້ໄປກັບການປ່ຽນແປງ”.
- ໃຈຮັກ : “ອີກຄຸນລັກສະນະໜຶ່ງກໍແມ່ນຄົນທີ່ມີໃຈຮັກໃນຍີ່ຫໍ້ຂອງເຮົາ ແລະ ຢາກເປັນສ່ວນໜຶ່ງຂອງບໍລິສັດໂດຍບໍ່ເບິ່ງມັນ ເປັນພຽງແຕ່ວຽກ ພວກເຂົາມີຄວາມເຕັມໃຈ ແລະ ຕັ້ງໃຈທີ່ຈະສ້າງຫຍັງທີ່ຍິ່ງໃຫຍ່ຮ່ວມກັບພວກເຮົາ”.
- ຄວາມໝັ້ນໃຈ : “ ໃນທຸລະກິດ Startup ທີ່ຍັງບໍ່ໝັ້ນຄົງປານໃດ ບັນຫາຕ່າງໆສາມາດເຂົ້າມາໄດ້ຢູ່ຕະຫລອດເວລາ ຫົວໜ້າບໍ່ມີເວລາທີ່ຈະຄອຍບອກໃຫ້ພະນັກງານຕ້ອງເຮັດຫຍັງ ເຮົາຢາກໄດ້ຄົນທີ່ເບິ່ງເຫັນບັນຫາ ແລະ ກ້າທີ່ຈະລົງມືແກ້ໄຂມັນທັນທີ ”.
