ກິດຈະກຳກະຕຸ້ນຮ່າງກາຍປ່ອຍສານແຫ່ງຄວາມສຸກ

ຄວາມສຸກຂອງຄົນເຮົາກ່ຽວຂ້ອງກັບຮໍໂມນ ຫລື ສານເຄມີໃນສະໝອງ ເຊັ່ນ : ໂດປາມີນ ເຊິ່ງເປັນສານສື່ປະສາດທີ່ຈະຫລັ່ງ ເມື່ອເຮົາເກີດຄວາມຮູ້ສຶກປະສົບຄວາມສຳເລັດ ຫລື ໄດ້ຮັບການຕອບສະໜອງຕາມຄວາມສຳເລັດ ຫລື ໄດ້ຮັບການຕອບສະໜອງ ຕາມຄວາມຕ້ອງການ. ຊີໂຣໂທນິນ ເປັນສານສື່ປະສາດອີກຊະນິດໜຶ່ງທີ່ຫລັ່ງເມື່ອເຮົາເກີດຄວາມຮູ້ສຶກຜ່ອນຄາຍ ຫລື ຮູ້ສຶກມີຄວາມສຸກ ແລະ ເອັນດໍຟິນ ຫລື ສານແຫ່ງຄວາມສຸກ ເປັນຮໍໂມນທີ່ຫລັ່ງໃນຂະນະທີ່ອາລົມດີ ແລະ ມັກຈະຫລັ່ງອອກມາຫລັງຈາກ ອອກກຳລັງກາຍ ທັງຍັງເປັນສານທີ່ຊ່ວຍຫລຸດຄວາມເຈັບປວດໄດ້ນຳອີກ ເຊິ່ງສານທັງ 3 ຊະນິດນີ້ຈະຫລັ່ງອອກມາພ້ອມໆກັນໃນຂະນະທີ່ເຮົາມີຄວາມສຸກ. ສ່ວນສານເຄມີໃນສະໝອງບາງໂຕທີ່ກ່ຽວຂ້ອງກັບຄວາມທຸກ ຫລື ຄວາມເຄັ່ງຄຽດ ໄດ້ແກ່ : ຄໍຕິໂຊນ ເຊິ່ງເປັນຮໍໂມນທີ່ຈະຫລັ່ງເມື່ອເຮົາມີຄວາມເຄັ່ງຄຽດ ຫລື ມີຄວາມກົດດັນ ຮໍໂມນຊະນິດນີ້ມີສ່ວນກ່ຽວຂ້ອງກັບຄວາມວິຕົກກັງວົນ ເຮັດໃຫ້ຄວາມສາມາດໃນການຄິດ ແລະ ການຈື່ຈຳຫລຸດລົງ ແລະ ເຮັດໃຫ້ພູມຕ້ານທານໃນຮ່າງກາຍຫລຸດລົງໄປນຳ.

ສະນັ້ນ ໃນການສ້າງຄວາມສຸກຂອງທຸກໆຄົນຈຶ່ງບໍ່ມີສູດສຳເລັດຮູບ, ແຕ່ສິ່ງທີ່ສຳຄັນປະການໜຶ່ງກໍຄື ການເລີ່ມຕົ້ນທີ່ຈະປ່ຽນແປງ ຫລື ປັບປ່ຽນຄວາມຄິດ, ການຮັບຮູ້ ແລະ ການຕັດສິນຄຸນຄ່າຂອງໂຕເຮົາໃຫ້ເປັນໄປຕາມຄວາມເປັນຈິງ ເຊິ່ງຈະນຳໄປສູ່ການປ່ຽນແປງວິທີການດຳລົງຊີວິດທີ່ນຳໄປສູ່ຄວາມສຸກ ແລະ ຄວາມດຸ່ນດ່ຽງໄດ້ບໍ່ຍາກ ຄວາມສຸກໃນຊີວິດຈຶ່ງບໍ່ແມ່ນເກີດຈາກການຝັກໄຝ່ ຫລື ສະແຫວງຫາຈາກສິ່ງພາຍນອກ ພຽງຢ່າງດຽວ, ແຕ່ຍັງຢູ່ໃນໂຕ ເຮົາວ່າຈະເຮັດໃຫ້ຊີວິດມີຄວາມ ສຸກຫລາຍ ຫລື ສຸກໜ້ອຍ ຕາບໃດທີ່ໂຕເຮົາສາມາດໃຫ້ຄວາມຮັກແກ່ຕົນເອງ ແລະ ຜູ້ອື່ນ, ຍອມຮັບໂຕເຮົາ ແລະ ຜູ້ອື່ນ, ຍອມຮັບໃນ ຄວາມເປັນຈິງ, ເບິ່ງທຸກສ່ິ່ງດັ່ງທີ່ ເຮົາເຮັດ, ມີແງ່ດີງາມຢູ່ສະເໝີ ລວມທັງມີອາລົມຂັນກັບເລື່ອງອ້ອມໂຕແດ່ ເຮົາກໍຈະເປັນສຸກໄດ້ ເຊັ່ນກັນ. ຕໍ່ໄປນີ້ແມ່ນ 5 ວິທີຊ່ວຍເພີ່ມຮໍໂມນແຫ່ງຄວາມສຸກ :

1. ອອກກຳລັງກາຍ ຢ່າງສະໝໍ່າສະເໝີ ເທື່ອລະຢ່າງໜ້ອຍ 30 ນາທີ ຈະຊ່ວຍໃຫ້ຮ່າງກາຍຫລັ່ງສານແຫ່ງຄວາມສຸກທັງ 3 ໄດ້ແກ່ ຊີໂຣໂທນິນ ເຊິ່ງເປັນຮໍໂມນທີ່ມີຜົນຕໍ່ຄວາມສຸກ, ຄວາມໝັ້ນຄົງທາງອາລົມ ແລະ ຊ່ວຍປ້ອງກັນອາການຊຶມເສົາ, ເອັນດໍຟິນ ທີ່ເປັນຮໍໂມນເຮັດໃຫ້ຮູ້ສຶກດີ, ຫລຸດຄວາມກັງວົນ ແລະ ຄວາມເຈັບປວດ ແລະ ໂດປາມີນ ເປັນຮໍໂມນທີ່ເຮັດໃຫ້ຮູ້ສຶກສົດຊື່ນຫ້າວຫັນ.
2. ກິນອາຫານຈຳພວກນຳ້ຕານ, ໄຂມັນ ແລະ ໂຄເລສເຕີໂຣນໃນລະດັບທີ່ເໝາະສົມ ຄວນກິນໝາກກ້ວຍ, ທັນຍາພືດ ເພື່ອ ຊ່ວຍເພີ່ມລະດັບໂດປາມີນ, ກິນອາຫານໂປຣຕິນທີ່ມີທຣິບໂຕເຟນ ເຊັ່ນ : ແກ່ນດອກຕາເວັນ, ແກ່ນໝາກອຶ, ປາ, ນົມ, ໝາກກ້ວຍ, ຖົ່ວດິນ ຈະຊ່ວຍເພີ່ມການຫລັ່ງຂອງຊີໂຣໂທນິນ.
3. ເຮັດກິດຈະກຳທ່າມກາງແສງແດດອ່ອນໆ ຢ່າງໜ້ອຍ 20 ນາທີໃນຕອນເຊົ້າ ຈະສົ່ງຜົນໃຫ້ ຮ່າງກາຍຜະລິດສານເມລາໂທນິນທີ່ຈະປ່ຽນເປັນຊີໂຣໂທນິນ ຊ່ວຍໃນເລື່ອງຂອງການນອນຫລັບພັກຜ່ອນໄດ້ເຕັມທີ່ໃນຕອນກາງຄືນ.
4. ນວດໂຕ ເປັນພະລັງຈາກການສຳຜັດ ເຊິ່ງມີລາຍງານວິໄຈວ່າ Touch Research Institute ຂອງ Miami School of Medicine ພົບວ່າ : ການນວດໂຕຊ່ວຍເພີ່ມຊີໂຣໂທນີນເຖິງ 28% ແລະ ຫລຸດສານຄໍຕີໂຊນທີ່ເປັນຮໍໂມນແຫ່ງຄວາມເຄັ່ງຄຽດໄດ້ເຖິງ 31%.
5. ຫລຸດຄວາມເຄັ່ງຄຽດ ແລະ ຈັດການອາລົມ ທີ່ເຮັດໃຫ້ເຄັ່ງຄຽດ ເຊັ່ນ : ຄວາມກັງວົນ, ຄວາມຄຽດຊັງ, ຄວາມຢ້ານ ເພື່ອ ຊ່ວຍເພີ່ມລະດັບຂອງຮໍໂມນຊີໂຣໂທນິນ ເຊັ່ນ : ການຝຶກຫາຍໃຈເພື່ອຄາຍຄຽດ ຫລື ການນັ່ງສະມາທິ ເປັນຕົ້ນ.