ຄວາມຄືບໜ້າການພັດທະນາລະບົບເສຍພາສີທີ່ດິນຜ່ານທະນາຄານ

ໃນອາທິດທີ່ຜ່ານມາ, ທີ່ກະຊວງການເງິນ, ໄດ້ຈັດກອງປະຊຸມລາຍງານຄວາມຄືບໜ້າໃນໜ້າການພັດທະນາລະບົບການຊໍາລະພາສີທີ່ດິນຜ່ານລະບົບທັນສະໄໝ, ໂດຍການເປັນປະທານຂອງທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ, ມີບັນດາ​ທ່ານຫົວໜ້າກົມສ່ວຍສາອາກອນ, ຜູ້ ຕາງໜ້າທະນາຄານການຄ້າຕ່າງປະເທດລາວມະຫາຊົນ ​ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມນຳ​ດ້ວຍ.

ກອງ​ປະຊຸມ​ລາຍ​ງານ​ວ່າ : ມາ​ຮອດປັດຈຸບັນການພັດທະນາລະບົບການຊໍາລະພາສີທີ່ດິນຜ່ານລະບົບທະນາຄານ, ໄດ້ສຳເລັດການສ້າງນິຕິກໍາທີ່ໃຊ້ໃນການຄຸ້ມຄອງ, ສໍາເລັດການຮ່າງຄໍາແນະນໍາເພີ່ມເຕີມ ກ່ຽວກັບການຈັດຕັ້ງປະຕິບັດການເກັບພາສີທີ່ດິນຜ່ານລະບົບທະນາຄານໂດຍພື້ນຖານ ແຕ່ຈະຕ້ອງໄດ້ປັບປຸງຄືນບາງເນື້ອໃນຂອງຄຳແນະນຳດັ່ງກ່າວໃຫ້ມີຄວາມຊັດເຈນຂຶ້ນຕື່ມ ແລະ ຄະນະຮັບຜິດຊອບໂຄງການດັ່ງກ່າວຈະຕ້ອງໄດ້ເຮັດວຽກຮ່ວມກັບພາກສ່ວນທີ່ກ່ຽວຂ້ອງໃນການປັບປຸງຖານຂໍ້ມູນຈຳນວນໜຶ່ງໃຫ້ສຳເລັດ.

ສຳລັບຂໍ້ມູນຕອນດິນແມ່ນກໍາລັງສຸມໃສ່ເກັບກໍາການເສຍພາສີທີ່ດິນຕົວຈິງ  ໃນຂອບເຂດທົ່ວປະເທດເພື່ອສັງລວມເອົາເຂົ້າໃນຖານຂໍ້ມູນລະບົບ,ຊຶ່ງຈະເປັນພື້ນຖານໃຫ້ແກ່ການຊໍາລະພາສີຜ່ານລະບົບທະນາຄານ. ພ້ອມນັ້ນກຳ​ໄດ້​ຮັບຂໍ້ມູນຕອນດິນຈາກຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມ ​ແລ້ວ 1,2 ລ້ານຕອນຊຶ່ງໄດ້ປັບປຸງເຂົ້າໃນຖານຂໍ້ມູນເຊັ່ນດຽວກັນ.

ເຖິງແນວໃດກໍ່ຕາມບັນດາຂໍ້ມູນຂອງຕອນດິນທີ່ມີໃນປະຈຸບັນກໍ່ຍັງບໍ່ທັນມີຄວາມສົມບູນ ແລະ ຄົບຖ້ວນ ຊຶ່ງມີຄວາມຈຳເປັນຈະຕ້ອງໄດ້ສືບຕໍ່ສົມທົບກັບພາກສ່ວນກ່ຽວຂ້ອງຕື່ມອີກ.

ໂອກາດນີ້, ທ່ານຮອງລັດຖະມົນຕີກະຊວງການເງິນໄດ້ມີຄຳເຫັນ ແລະໃຫ້ທິດຊີ້ນໍາກ່ຽວກັບວຽກງານການພັດທະນາການຊໍາລະພາສີທີ່ດິນຜ່ານລະບົບທັນສະໄໝ ແລະ ບັນຫາທີ່ເປັນຂໍ້ຄົງຄ້າງນຳມາປັບປຸງແກ້ໄຂໃຫ້ທັນກັບເວລາ ແລະ ດີຂຶ້ນກວ່າເກົ່າ. ເພື່ອເຮັດໃຫ້ວຽກງານດັ່ງກ່າວມີປະສິດທິຜົນສູງ, ສ້າງຄວາມສະດວກສະບາຍໃຫ້ແກ່ພາກລັດ, ປະຊາຊົນບັນດາເຜົ່າໄດ້ມີຄວາມຕື່ນຕົວໃນການປະກອບສ່ວນເສຍພາສີທີ່ດິນດ້ວຍລະບົບເອເລັກໂຕນິກທີ່ທັນສະໄໝ. ພ້ອມນີ້, ຍັງເນັ້ນໃຫ້ຜູ້ພັດທະນາລະບົບຜູ້ປະຕິບັດຕົວຈິງໂຄສະນາເຜີຍແຜ່ຂໍ້ມູນ ແລະ ພ້ອມພຽງກັນປະສານງານສົມທົບການຈັດຕັ້ງປະຕິບັດຢ່າງເຂັ້ມງວດ ເພື່ອເຮັດໃຫ້ວຽກງານດັ່ງກ່າວປະສົບຜົນສໍາເລັດສູງ.