ທະນາຄານໂລກສະເໜີໃຫ້ກູ້ 1.000 ລ້ານໂດລາ ແກ່ອິນໂດເນເຊຍທີ່ປະສົບໄພພິບັດ
ທະນາຄານໂລກປະກາດໃຫ້ເງິນກູ້ມູນຄ່າເຖິງ 1.000 ລ້ານໂດລາ ແກ່ອິນໂດເນເຊຍທີ່ປະສົບໄພພິບັດຕໍ່ເນື່ອງໃນໄລຍະຜ່ານມາ ລວມທັງແຜ່ນດິນໄຫວຄັ້ງໃຫຍ່ ແລະ ສຶນາມິທີ່ມີຜູ້ເສຍຊີວິດຫລາຍພັນຄົນ.
ປະທານເຈົ້າໜ້າທີ່ບໍລິຫານທະນາຄານໂລກ ຖະແຫລງເລື່ອງເງິນກູ້ຢູ່ເກາະບາຫລີ ຂອງອິນໂດເນເຊຍ ເຊິ່ງທະນາຄານໂລກຮ່ວມກັບກອງທຶນການເງິນສາກົນ (IMF) ຈັດກອງປະຊຸມຂຶ້ນ. ແຜ່ນດິນໄຫວຂະໜາດ 7,5 ແມກນິຈູດ ແລະ ຄຶ້ນສຶນາມິ ຢູ່ເມືອງປາລູ ໃນເກາະສຸລາເວສີ ວັນທີ 28 ກັນຍາຜ່ານມາ ເຮັດໃຫ້ມີຜູ້ເສຍຊີວິດຫລາຍກວ່າ 2.000 ຄົນ ແລະ ສູນຫາຍອີກຫລາຍພັນຄົນ ເຊິ່ງຄາດວ່າເສຍຊີວິດແລ້ວ. ໜ່ວຍກູ້ໄພທີ່ຄົ້ນຫາຮ່າງຜູ້ເສຍຊີວິດຕິດຕໍ່ກັນຫລາຍວັນ ກ່ອນຢຸດພາລະກິດ ຄາດວ່າອາດມີຜູ້ສູນຫາຍສູງເຖິງ 5.000 ຄົນ. ຜູ້ບໍລິຫານທະນາຄານໂລກ ຖະແຫລງວ່າ: ທະນາຄານຈະໃຫ້ການຊ່ວຍເຫລືອໃນຮູບແບບຂອງເງິນກູ້ແກ່ອິນໂດເນເຊຍ ເພື່ອໃຊ້ໃນການຟື້ນຟູ ແລະ ກຽມການຮັບມືກໍລະນີເກີດໄພພິບັດໃນອະນາຄົດ ເພາະໄພພິບັດຕ່າງໆຈະເກີດຂຶ້ນເລື້ອຍໆ ແລະ ຈາກບັນຫາສະພາບອາກາດປ່ຽນແປງຈະຍິ່ງຮຸນແຮງຂຶ້ນ. ດັ່ງນັ້ນ ການກຽມແຜນຮັບມືໃຫ້ດີຂຶ້ນຈະຊ່ວຍບັນເທົາຜົນກະທົບທີ່ຈະເກີດຂຶ້ນ ທັງການສູນເສຍຊີວິດ ແລະ ຊັບສິນ. ເຈົ້າໜ້າທີ່ກ່າວວ່າ: ມີຜູ້ບໍ່ມີບ່ອນຢູ່ເກືອບ 90.000 ຄົນຈາກແຜ່ນດິນໄຫວໃນເມືອງປາລູ ແລະ ຕ້ອງໄປອາໄສຢູ່ຕາມສູນພັກຊົ່ວຄາວ ເຊິ່ງຄາດວ່າຈະຕ້ອງໃຊ້ເວລາເຖິງ 2 ປີທີ່ຜູ້ບໍ່ມີບ່ອນຢູ່ທັງໝົດຈະສາມາດຟື້ນຟູເຮືອນຂຶ້ນໃໝ່.
