ສະຫະລັດອາເມລິກາ ສະໜັບສະໜູນລາວ ສ້າງຄວາມເຂັ້ມແຂງໃນການບັງຄັບໃຊ້ກົດໝາຍ ແລະ ຄວາມປອດໄພຊາຍແດນ
ສະຫະລັດອາເມລິກາ ແລະ ສປປ ລາວ ໄດ້ເຊັນຂໍ້ຕົກລົງສະບັບປັບປຸງ ລະຫວ່າງ ສະຖານທູດສະຫະລັດອາເມລິກາປະຈໍານະຄອນຫຼວງວຽງຈັນ ແລະ ກົມພາສີ, ກະ¬ຊວງການເງິນ ສປປ ລາວ ເພື່ອເສີມຂະຫຍາຍການຮ່ວມມືສອງຝ່າຍໃນຂົງເຂດການບັງຄັບໃຊ້ກົດໝາຍ ແລະ ຄວາມປອດໄພຊາຍແດນ.
ພິທີເຊັນຂໍ້ຕົກລົງດັ່ງກ່າວໄດ້ມີຂຶ້ນໃນວັນທີ 11 ເດືອນຕຸລານີ້ ທີ່ນະຄອນຫລວງວຽງຈັນ ລະຫວ່າງທ່ານ ບຸນປະເສີດ ສີຄຸນລະບຸດ ຮັກສາການຫົວໜ້າກົມພາສີ ແລະ ທ່ານນາງ ຣີນາ ບິດເຕີ ເອກອັກຄະລັດຖະທູດ ສະຫະລັດອາເມລິກາ ປະຈຳ ສປປ ລາວ ໂດຍການເຂົ້າຮ່ວມເປັນສັກຂີພິຍານຂອງທ່ານຮອງລັດຖະມົນຕີກະຊວງການເງິນ.
ທ່ານທູດ ຣິນາ ບິດເຕີ ກ່າວໃນພິທີວ່າ: “ປີ 2016, ສອງຝ່າຍກໍໄດ້ຮ່ວມລົງນາມສັນຍາຮ່ວມມືແບບກວມລວມ (Comprehensive Partnership) ເພື່ອສຸມໃສ່ການສ້າງອານາຄົດຮ່ວມກັນ”. “ຂໍ້ຕົກລົງສະບັບໃໝ່ນີ້ ສ້າງຂຶ້ນເພື່ອຮ່ວມມືດ້ານຄວາມປອດໄພ ໂດຍຈະໄດ້ລົງເລິກເພື່ອຊ່ວຍຕ້ານ ແລະ ສະກັດກັ້ນອາຊະຍາກໍາຂ້າມຊາດ.”
ຂໍ້ຕົກລົງສະບັບໃໝ່ນີ້ ມີມູນຄ່າຫຼາຍກວ່າ 1,2 ລ້ານໂດລາ ຈາກລັດຖະບານສະຫະລັດ ເພື່ອສະໜັບສະໜູນ ແລະ ພັດທະນາຄວາມອາດສາມາດໃນການຕ້ານ ແລະ ສະກັດກັ້ນສິ່ງຂອງຜິດກົດໝາຍປະເພດຕ່າງໆ ທີ່ນໍາເຂົ້າ ຫຼຶື ສົ່ງອອກ ຈາກລາວ ຜ່ານຊາຍແດນສາກົນ ເຊັ່ນ: ຢາເສບຕິດ, ຜະລິດຕະພັນສັດປ່າ ແລະ ຜະລິດຕະພັນປອມແປງ. ໂຄງການນີ້ ຈະຊ່ວຍ ສປປ ລາວ ຕ້ານ ແລະ ສະກັດກັ້ນການຄ້າມະນຸດອີກດ້ວຍ. ພ້ອມຈະຊ່ວຍປັບປຸງວຽກງານຄຸ້ມຄອງຄວາມປອດໄພຊາຍແດນ ໂດຍການສະໜອງການຝຶກອົບຮົມຕ່າງໆໃຫ້ເຈົ້າໜ້າທີ່ພາສີ ແລະ ເຈົ້າໜ້າທີ່ບັງຄັບໃຊ້ກົດໝາຍອື່ນໆ ໃນຂົງເຂດການປະຕິບັດກົດລະບຽບດ້ານຄວາມປອດໄພຊາຍແດນ ແລະ ວຽກງານສະກັດກັ້ນຕ່າງໆ ໂດຍຈະມີໄລຍະການປະຕິບັດງານ 5 ປີ.
