ປກສ ເມືອງ ໄຊເສດຖາຈັບຜູ້ແອບອ້າງແລ່ນເຂົ້າຕຳຫລວດ
ເມື່ອບໍ່ດົນມາ ນີ້, ເຈົ້າໜ້າທີ່ ປກສ ເມືອງ ໄຊເສດຖາ ນະຄອນຫລວງວຽງຈັນ ໄດ້ຈັບຕົວ ທ້າວ ທອງໄຊ ອາຍຸ 32 ປີ ຢູ່ບ້ານ ວັດນາກ ເມືອງ ສີສັດຕະນາກ, ທ້າວ ພູເວດ ອາຍຸ 30 ປີ ຢູ່ບ້ານ ຫົວຫ້າ ເມືອງ ຫາດຊາຍຟອງ ແລະ ທ້າວ ພູທອນ ອາຍຸ 38 ປີ ຢູ່ບ້ານ ເມືອງ ນ້ອຍ, ເມືອງ ໄຊເສດຖາ ນະຄອນຫລວງວຽງຈັນ ພາຍຫລັງທີ່ເຄື່ອນໄຫວແອບອ້າງ ຮັບແລ່ນເອົາເຂົ້າເປັນພະນັກງານຕຳຫລວດ ຊຶ່ງມີຜູ້ເສຍຫາຍ ຕົກເປັນເຍື່ອຫລາຍສິບຄົນ.
ເຈົ້າໜ້າທີ່ ໃຫ້ຮູ້ວ່າ: ພາຍຫລັງຜູ້ເສຍຫາຍໄດ້ເຂົ້າແຈ້ງຄວາມວ່າ: ມີກຸ່ມຄົນບໍ່ດີເຄື່ອນໄຫວຕົວະຍົວະແອບອ້າງວ່າສາມາດແລ່ນເອົາຄົນເຂົ້າໃນກຳລັງຕຳຫລວດ ແລະ ເຂົ້າເຮັດວຽກນຳອົງການຈັດຕັ້ງຕ່າງໆ, ຈຶ່ງຕັ້ງໜ່ວຍສະເພາະກິດລົງຕິດຕາມ ຈົນສາມາດຈັບຕົວຜູ້ຕ້ອງຫາມາດຳເນີນຄະດີໄດ້ດັ່ງກ່າວ. ຊຶ່ງຜ່ານການສືບສວນ-ສອບສວນ ພວກກ່ຽວຮັບສາລະພາບວ່າ: ໄດ້ຮ່ວມກັນເຄື່ອນໄຫວແອບອ້າງດັ່ງກ່າວແທ້, ໂດຍຕົວະວ່າໄດ້ຮູ້ຈັກກັບຜູ້ໃຫຍ່ທີ່ສາມາດແລ່ນເອົາຄົນເຂົ້າເຮັດວຽກໄດ້ ແຕ່ຕ້ອງຈ່າຍຄ່າມັດຈຳ ມູນຄ່າ 60 ພັນບາດ(ສະກຸນເງີນໄທ), ຈາກນັ້ນ ກໍໄດ້ເຄື່ອນໄຫວດ້ວຍຮູບການດັ່ງກ່າວມາຫລາຍຄັ້ງ ຊຶ່ງມີຜູ້ທີ່ຕົກເປັນເຫຍື່ອທັງຢູ່ຕ່າງແຂວງ ແລະ ນະຄອນຫລວງວຽງຈັນ ມາແລ້ວ 99 ຄົນ, ຕົກເປັນເງີນກ່ວາ 2 ຕື້ກີບ. ກ່ອນຈະຖືກເຈົ້າໜ້າທີ່ຈັບຕົວດຳເນີນຄະດີ ແລະ ກຳລັງຂະຫຍາຍຜົນເພື່ອຫາຜູ້ຮ່ວມຂະບວນການຕື່ມອີກ.
