ຫລວງພະບາງມີແຜນສ້າງອະນຸສອນສະຖານບັ້ນຮົບນ້ຳບາກ ແລະ ບັ້ນຮົບໄມ້ຄ້ອນຢູ່ເມືອງວຽງຄຳ
ສຳນັກງານຂ່າວສານປະເທດລາວລາຍງານວ່າ: ລັດຖະບານໄດ້ອະນຸຍາດໃຫ້ບໍລິສັດ ດວງພະສຸກ ກໍ່ສ້າງສ້ອມແປງ- ຂົວທາງເຄຫາສະຖານ ແລະ ຊົນລະປະທານຈຳກັດຜູ້ດຽວ (DPS) ລົງທຶນສຶກສາຄວາມເປັນໄປໄດ້ ແລະ ອອກ ແບບໂຄງ ການກໍ່ສ້າງອະນຸສອນສະຖານ ບັ້ນຮົບນ້ຳບາກ ຢູ່ເມືອງນ້ຳບາກ ແລະ ບັ້ນຮົບໄມ້ຄ້ອນຢູ່ເມືອງ ວຽງຄຳ ແຂວງຫລວງພະບາງ ໃຫ້ກາຍເປັນອະນຸສອນແກ່ຄົນ ຮຸ້ນໃໝ່ໄດ້ຮຽນຮູ້ມູນເຊື້ອປະຕິວັດ ແລະ ເປັນສະຖານ ທີ່ທ່ອງທ່ຽວທາງດ້ານປະຫວັດສາດ ຂອງແຂວງອີກດ້ວຍ.
ພິທີລົງນາມບົດບັນທຶກ ຄວາມເຂົ້າໃຈ(MOU)ດັ່ງ ກ່າວມີໃນວັນທີ 8 ພຶດສະພານີ້ທີ່ຫ້ອງວ່າການສະພາແຂວງ ຫລວງພະບາງລະຫວ່າງ ທ່ານ ຄຳຫລ້າ ດວງພະສຸກ ປະທານ ບໍລິສັດ ດວງພະສຸກ ກໍ່ສ້າງສ້ອມແປງ-ຂົວທາງ ເຄຫາສະຖານ ແລະ ຊົນລະປະທານ ຈຳກັດຜູ້ດຽວ ແລະ ທ່ານ ບຸນຊົນ ທັດຕະວົງ ຮອງຫົວໜ້າພະແນກແຜນການ ແລະ ການລົງທຶນ ແຂວງ ຫລວງພະບາງໂດຍການເຂົ້າຮ່ວມເປັນສັກຂີພິຍານຂອງທ່ານ ໄຊສົມພອນ ພົມວິຫານ, ປະທານສູນກາງແນວລາວສ້າງ ຊາດ, ທ່ານ ຈະເລີນ ເຢຍປາວເຮີ ລັດຖະມົນຕີ ປະຈຳສັກງານ ນາຍົກ ແລະ ທ່ານ ຄຳຂັນ ຈັນທະວີສຸກ ເຈົ້າແຂວງຫລວງພະບາງ.
ທ່ານ ຄຳຫລ້າ ດວງພະສຸກ ກ່າວວ່າ: ບົດບັນທຶກດັ່ງກ່າວ, ເປັນບາດກ້າວເລີ່ມຕົ້ນໃນການ ສຳຫລວດ-ອອກແບບ ໂຄງການຈາກນັ້ນກໍຈະນຳເອົາແບບ ມາຜ່ານຄະນະນຳແຂວງເພື່ອປະກອບຄຳເຫັນໃສ່ບົດລາຍງານແລ້ວຈຶ່ງກ້າວ ເຂົ້າສູ່ຂະບວນການຕໍ່ໄປ. ການລົງມືສຳຫລວດ-ອອກແບບໂຄງການນີ້ ມີກຳນົດ 12 ເດືອນນັບ ແຕ່ມື້ລົງລາຍເຊັນ ເປັນຕົ້ນໄປຄາດວ່າ ຈະໃຫ້ສຳເລັດຕາມຄາດໝາຍ ເນື່ອງຈາກບໍລິສັດມີຄວາມພ້ອມ ທາງດ້ານ ເຕັກນິກ, ວິຊາ ແລະ ປະສົບຜົນສຳເລັດຕ່າງໆມາແລ້ວ, ເຊັ່ນ: ໂຄງການອະນຸ ສອນສະຖານວິລະຊົນສີທອງ, ໂຄງການກອງຮ້ອຍ ລາດຊະວົງ ແລະ ໂຄງການອື່ນໆ ທີ່ພັກ-ລັດຖະບານມອບໝາຍໃຫ້.
ບັ້ນຮົບນ້ຳບາກ ແລະ ບັ້ນ ຮົບໄມ້ຄ້ອນຢູ່ແຂວງຫລວງພະບາງເປັນບັ້ນຮົບອັນດຸເດືອດ ແຫ່ງການຕໍ່ສູ້ກູ້ຊາດ ໃນເມື່ອກ່ອນ ແລະ ກອບກູ້ເອົາເອກະ ລາດຈາກພວກສັດຕູຜູ້ຮຸກຮານ; ໃນນັ້ນ, ບັ້ນຮົບ “ນ້ຳບາກ” ໄດ້ດັບສູນ ແລະ ຈັບສະເລີຍເສີກໄດ້ 3.200 ກວ່າຄົນ, ປົດປ່ອຍເຂດປົກຄອງຂອງສັດຕູໄດ້ຫລາຍທີ່ ສຸດເຮັດໃຫ້ທຸກກຳລັງ ຂອງສັດຕູຢູ່ລາວອ່ອນເພຍລົງ ແລະ ກົງກັນຂ້າມມັນໄດ້ກາຍເປັນກຳລັງໃຈປຸກລະດົມໃຫ້ປວງຊົນລາວ ທັງຊາດລຸກຂຶ້ນຕໍ່ສູ້ຢ່າງພິລະອາດຫານ.
