ສະມາຊິກ IMF ຮັບປາກບໍ່ແຂ່ງຫລຸດ ຄ່າເງິນ ແລະ ຈະເພີ່ມການຫາລືການຄ້າ
ກອງທຶນການເງິນສາກົນ (IMF) ເປີດເຜີຍວ່າ: ສະມາຊິກຮັບປາກຈະບໍ່ແຂ່ງຂັນກັນຫລຸດຄ່າເງິນ ແລະ ຈະເພີ່ມການເຈລະຈາຫາລືເລື່ອງການຄ້າ ເພາະຂໍ້ຂັດແຍ່ງການຄ້າ ແລະ ຕົ້ນທຶນການກູ້ຢືມທີ່ສູງຂຶ້ນສ່ຽງເຮັດໃຫ້ການຂະຫຍາຍຕົວເສດຖະກິດໂລກສະດຸດ.
ຄະນະກຳມະການອຳນວຍການ IMF ອອກຖະແຫລງການໃນວັນທີ 13 ຕຸລາວ່າ: ສະມາຊິກເນັ້ນໜັກດີວ່າການຄ້າການລົງທຶນສິນຄ້າ ແລະ ບໍລິການຢ່າງເສລີ, ເປັນທຳ ແລະ ເປັນປະໂຫຍດຕໍ່ກັນ ເປັນເຄື່ອງຈັກສຳຄັນຕໍ່ການເຕີບໃຫຍ່ ແລະ ການສ້າງວຽກ. ດັ່ງນັ້ນ ສະມາຊິກຈະງົດເວັ້ນການແຂ່ງຂັນກັນຫລຸດຄ່າເງິນ ແລະ ຈະບໍ່ໃຊ້ອັດຕາແລກປ່ຽນເພື່ອຜົນປະໂຫຍດໃນການແຂ່ງຂັນ. ຖະແຫລງການລະບຸອີກວ່າ: ແຕ່ລະເສດຖະກິດມີການຟື້ນຕົວບໍ່ເທົ່າກັນ ແລະ ຄວາມສ່ຽງທີ່ຖືກກ່າວເຖິງບາງຢ່າງເປັນຜົນບໍ່ເທົ່າກັນ ເຊິ່ງໝາຍເຖິງການໃຊ້ມາດຕະການພາສີຂອງບາງປະເທດ.
