ຍີ່ປຸ່ນເປີດເຜີຍມາດຕະການດຶງດູດ ແຮງງານຕ່າງປະເທດມີຝີມື
ລັດຖະບານຍີ່ປຸ່ນມີແຜນອະນຸຍາດໃຫ້ແຮງງານຕ່າງປະເທດທີ່ມີທັກສະສູງໃນສາຍງານ ເຊິ່ງກຳລັງຂາດເຂີນ ມີສິດຂໍຮັບສະຖານະການຜູ້ຢູ່ອາໄສຖາວອນ ພ້ອມຄອບຄົວ ສະທ້ອນການຂາດເຂີນແຮງງານສະເພາະທາງ. ຂະນະທີ່ປະເທດເປັນສັງຄົມຜູ້ອາຍຸສູງ.
ສຳນັກຂ່າວຕ່າງປະເທດລາຍງານວ່າ: ທ່ານ ໂຢຊິຮິເດະ ສິກະ ເລຂາທິການຄະນະລັດຖະບານຍີ່ປຸ່ນ ກ່າວໃນວັນທີ 12 ຕຸລາວ່າ: ລັດຖະບານຂອງນາຍົກລັດຖະມົນຕີ ຊິນໂຊ ອາເບະ ກຽມສະເໜີຮ່າງມາດຕະການດຶງດູດແຮງງານທັກສະສູງຈາກຕ່າງປະເທດໃນກຸ່ມວຽກທີ່ຍັງຂາດເຂີນ ເຊິ່ງຕ້ອງການຄວາມຊ່ຽວຊານສະເພາະທາງ ບໍ່ວ່າຈະເປັນຂະແໜງກະສິກຳ, ແພດໝໍ, ກໍ່ສ້າງ, ໂຮງແຮມ ແລະ ຕໍ່ເຮືອ ໂດຍບຸກຄົນທີ່ຜ່ານການທົດສອບອາດໄດ້ຮັບອະນຸມັດວີຊາເຮັດວຽກເປັນໄລຍະເວລາສູງສຸດ 5 ປີ.
ຂະນະດຽວກັນ, ແຮງງານຄົນໃດທີ່ມີປະສິດທິພາບໃນການເຮັດວຽກທີ່ໂດດເດັ່ນກວ່າຄົນອື່ນ ແລະ ຜ່ານການທົດສອບທັກສະຄວາມຮູ້ພາສາຍີ່ປຸ່ນຂັ້ນສູງ ຈະສາມາດຍື່ນຄຳຮ້ອງຂໍຮັບການພິຈາລະນາເອົາສະມາຊິກໃນຄອບຄົວມາອາໄສໄດ້ນຳອີກ ແລະ ມີສິດຍື່ນເອກະສານຂໍຮັບພິຈາລະນາສະຖານະຜູ້ຢູ່ອາໄສຖາວອນ ເຊິ່ງມີການວິເຄາະເຊັ່ນກັນວ່າ: ຍິ່ງເນັ້ນໃຫ້ເຫັນການຂາດເຂີນປະຊາກອນໄວແຮງງານໃນຍີ່ປຸ່ນ ທີ່ກຳລັງຜະເຊີນສະພາບສັງຄົມຜູ້ອາຍຸສູງ.
ທັງນີ້, ຂໍ້ມູນຈາກກະຊວງແຮງງານຂອງຍີ່ປຸ່ນລະບຸສະຖິຕິແຮງງານຕ່າງປະເທດໃນຍີ່ປຸ່ນມີ 1,28 ລ້ານຄົນໃນປີຜ່ານມາ ເພີ່ມຂຶ້ນ 2 ເທົ່າພາຍໃນໄລຍະເວລາພຽງ 1 ທົດສະວັດ, ແຕ່ຈຳນວນແຮງງານມີຝີມືພັດຍັງໜ້ອຍກວ່າ 240.000 ຄົນ. ນອກຈາກນີ້ ໃນຈຳນວນແຮງງານຕ່າງປະເທດທີ່ມີຢູ່ໃນປັດຈຸບັນນັ້ນ ມີປະມານ 450.000 ຄົນເປັນແຮງງານຕ່າງປະເທດທີ່ມີຄູ່ສົມລົດເປັນຊາວຍີ່ປຸ່ນ.
