ທະນາຄານກາງສິງກະໂປເຂັ້ມງວດ ນະໂຍບາຍການເງິນຄັ້ງໃໝ່
ທະນາຄານກາງສິງກະໂປເຂັ້ມງວດນະໂຍບາຍການເງິນເປັນຄັ້ງທີສອງຂອງປີນີ້ ໂດຍໃຫ້ເຫດຜົນວ່າ: ເສດຖະກິດສິງກະໂປອາດຈະຂະຫຍາຍຕົວຕໍ່ເນື່ອງ ຖ້າການຂະຫຍາຍຕົວຂອງເສດຖະກິດໂລກບໍ່ຜະເຊີນອຸປະສັກຈາກຂໍ້ຂັດແຍ່ງການຄ້າອາເມລິກາ-ຈີນ.
ສຳນັກງານການເງິນສິງກະໂປ (MAS) ເຮັດໜ້າທີ່ຄືທະນາຄານກາງ ດຳເນີນນະໂຍບາຍຜ່ານການກຳນົດອັດຕາແລກປ່ຽນຫລາຍກວ່າອັດຕາດອກເບ້ຍນະໂຍບາຍ. MAS ຖະແຫລງນະໂຍບາຍ 6 ເດືອນຕົ້ນປີ ໃນວັນທີ 12 ຕຸລາວ່າ: ຈະເລື່ອນເສັ້ນອັດຕາແລກປ່ຽນໃຫ້ຊັນຂຶ້ນເລັກໜ້ອຍ, ແຕ່ຈະຮັກສາຄວາມກວ້າງ ແລະ ຄ່າກາງໄວ້ຄືເກົ່າ ເພາະຄາດວ່າອັດຕາເງິນເຟີ້ຈະເພີ່ມຂຶ້ນໃນໄລຍະສັ້ນ ເນື່ອງຈາກລວມຍອດຜະລິດຕະພັນພາຍໃນ (GDP) ສູງກວ່າຄວາມອາດຈະເປັນເລັກໜ້ອຍ ໂດຍຄາດວ່າອັດຕາເງິນເຟີ້ພື້ນຖານຈະຢູ່ໃນຂອບ 1,5-2% ໃນປີນີ້ ແລະ 1,5-2,5% ໃນປີໜ້າ, ສ່ວນ GDP ຈະຢູ່ 2,5-3,5% ໃນປີນີ້ ແລະ ເພີ່ມຂຶ້ນເລັກໜ້ອຍໃນປີໜ້າ.
ນັກເສດຖະສາດຕີຄວາມໝາຍຂອງຖະແຫລງການ MAS ວ່າ: ສົ່ງສັນຍານວ່າຈະເຂັ້ມງວດນະໂຍບາຍການເງິນອີກໃນເດືອນເມສາປີໜ້າ ເພາະຄາດວ່າເງິນເຟີ້ຍັງສູງຕໍ່ໄປ. ອີກທັງ MAS ຍັງລະບຸໃນຖະແຫລງການວ່າ: ການຂະຫຍາຍຕົວຂອງເສດຖະກິດໂລກຈົນຮອດປັດຈຸບັນນີ້ຂ້ອນຂ້າງຫົດຢືດຢູ່, ແຕ່ປີໜ້າສ່ຽງໄດ້ຮັບຜົນກະທົບຈາກຂໍ້ຂັດແຍ່ງການຄ້າໂລກ ຖ້າການຂະຫຍາຍຕົວຂອງເສດຖະກິດໂລກບໍ່ມີອຸປະສັກໃນເລື່ອງນີ້ ເສດຖະກິດສິງກະໂປປີໜ້າອາດຈະຂະຫຍາຍຕົວໃກ້ຄວາມເປັນໄປໄດ້. ຂໍ້ມູນທີ່ມີການເຜີຍແຜ່ໃນວັນທີ 12 ຕຸລານີ້ຊີ້ໃຫ້ເຫັນວ່າ: ເສດຖະກິດໄຕມາດສາມຂອງສິງກະໂປຂະຫຍາຍຕົວຕໍ່າກວ່າຄາດໝາຍ.
