ຊ່ວຍປົກປ້ອງຄົນບໍ່ມັກ “ຂອງປອມ” ແດ່ທ້ອນ!

ໃນຈຳນວນຄົນລາວຫຼາຍກວ່າ 35% ທີ່ນຳໃຊ້ສື່ອອນລາຍ ເປັນປະຈຳ ໂດຍສະເພາະ ເຟສບຸກ ຈະມີຈຳນວນຫຼາຍ ສົມຄວນທີ່ຮູ້ສຶກວ່າ ເຂົາເຈົ້າກຳລັງໄດ້ຮັບການໂຄສະນາ ຢາວິເສດຫຼາຍແນວທັ່ງທີ່ເຂົາເຈົ້າບໍ່ໄດ້ ຄິດຮອດເລື່ອງນີ້ຊໍ້າ ແຕ່ເຖິງປານນັ້ນ ການໂຄສະນາ ກໍບໍ່ໄດ້ຊິຫຼຸດໜ້ອຍຖອຍລົງແຕ່ຢ່າງໃດ.

ຕັ້ງແຕ່ກ່ອນຜູ້ຂຽນກໍຫາກໄດ້ຍິນເລື່ອງຢາວິເສດ ຢູ່ໃນແຕ່ນິທານຫຼາຍເລື່ອງ ບໍ່ວ່າຈະເປັນນິທານຂອງ ພື້ນເມືອງ ລາວ ແລະຕ່າງປະເທດ ທີ່ຢາຊະນິດດຽວເຮັດໃຫ້ດີຫຼາຍຢ່າງພັນແນວ ບາງກໍລະນີ ຄົນຕາຍແລ້ວຍັງສາມາດ ຟື້ນຄືນມາໄດ້ ອັນນັ້ນຢູ່ໃນນິທານ ແຕ່ມາຮອດດຽວນີ້ ຢາວິເສດໄດ້ປະກົດຂຶ້ນມາໜ້າຈໍ ທີ່ເພິ່ນເວົ້າວ່າ ເຮັດໃຫ້ຈ່ອຍໄດ້, ເຮັດໃຫ້ຕຸ້ຍໄດ້, ຄົນຮູບຮ່າງຮ້າຍ ກໍກາຍເປັນດາລາ ສົມລາຄາຂອງຢາວ່າຊ້ານ!

ການໂຄສະນາ ຢາວິເສດທີ່ວ່ານີ້ກໍຫາກມານຳ ສື່ອອນລາຍນັ້ນລະເປັນສ່ວນຫຼາຍ, ອັນຜູ້ຂາຍ ຫຼື ໂຄສະນາ ສ່ວນຫຼາຍເປັນແມ່ຍິງ ທີ່ສ່ວນຫຼາຍມີໜ້າຕາອ່າວດີ ມີຮ່າງກາຍງົດງາມ ພ້ອມຄຳເວົ້າອັນໜ້າອອນຊອນນຳ ຊັບພະຄຸນຢາ ອັນວິເສດທີ່ວ່ານີ້. ສິ່ງສຳຄັນ ຍຸດທະສາດການໂຄສະນາ ນັ້ນໄປທຸກຈອກທຸກແຈ ເກືອບໝົດທຸກຄົນ ທີ່ເຊື່ອມສານກັນຜ່ານທາງສື່ອອນລາຍ, ຈັ່ງແມ່ນເພິ່ນໃຈກວ້າງຂວາງແທ້ໆ ທີ່ຢາກໃຫ້ຄົນລາວທັງປະເທດ ມີແຕ່ຜູ້ງາມໆ ຮຸ່ນດີໝົດທຸກຄົນຊັ້ນບໍ?​

ຄວາມງາມທີ່ ອາດມາຈາກຢາວິເສດນີ້ ແມ່ນຜິດພ້ຽນຈາກຂອງຈິງ ແຕ່ຍ້ອນຍຸດທະສາດການໂຄສະນາ ທີ່ດຸດັນ ຂອງເພິ່ນ ເຮັດໃຫ້ຄົນຈຳນວນຫຼາຍ ແລະເພີ່ມຂຶ້ນເລື້ອຍໆ ກຳລັງນິຍົມຂອງປອມທີ່ວ່າ, ຕາມທີ່ຮູ້ມານີ້ ຢາວິເສດ ເຊັ່ນ ການເຮັດໃຫ້ຮ່າງກາຍຈ່ອຍລົງຕາມຄວາມຕ້ອງການ, ອາຫານເສີມ ບຳລຸງ ແລະຟື້ນຟູສະມັດຖະພາບທາງເພດ ແລະອື່ນໆລາຄາທີ່ເພິ່ນຂາຍນັ້ນບໍ່ແມ່ນຂອງຄ່ອຍເລີຍ, ມັນກໍບໍ່ແມ່ນເລື່ອງແປກດອກ ເພາະຊັບພະຄຸນທີ່ເພິ່ນບັນຍາຍນັ້ນຊ່າງເປັນຕາສະອອນນຳແທ້ໆ.

ແຕ່ເຖິງຈະດີປານນັ້ນກໍຕາມ, ຫຼາຍຄົນຍັງນິຍົມຂອງແທ້ ແລະບໍ່ຢາກຖືກລົບກວນຈາກຍຸດທະສາດ ການໂຄສະນາຂອງພວກເພິ່ນ, ບາງຜ່ອງ ກໍວ່າ “ເມື່ອເວລາເປີດເຟສ ຂຶ້ນມາຍາມໃດກໍເຫັນ ແຕ່ໂຄສະນາ ຢາວິເສດ ທີ່ເຮົາບໍ່ຕ້ອງການ ແຕ່ປານນັ້ນ ກໍສົ່ງນັ້ນສົ່ງນີ້ມາບໍ່ຂາດສາຍ” ຄວາມເປັນສ່ວນຕົວໄດ້ລຸກລໍ້າ ຢ່າງບໍ່ເຄົາລົບສິດທິສ່ວນບຸກຄົນໄປແລ້ວລະ.

ການໂຄສະນາເລື່ອງຢາວິເສດນີ້ ມີຂະບວນການທີ່ຄຶກຄື້ນກວ່າ ການໂຄສະນາ ການໃຊ້ຖົງຢາງອະນາໄມ, ການຫຼຸດຜ່ອນການສູບຢາ ໂດຍສະເພາະໃນທີ່ສາທາລະນະ ດ້ວຍຊໍ້າ, ຖ້າບໍ່ມີຢາອັນວິເສດນີ້ ພວກເຮົາຄົນລາວ ກໍຫາກບໍ່ແມ່ນຄົນຂີ້ຮ້າຍປານໃດດອກຜູ້ຂຽນວ່າ.

ເຮັດແນວໃດໃຫ້ຜູ້ບໍ່ມັກຢາວິເສດນີ້ ໜີພົ້ນຈາກການຊວນເຊື່ອທີ່ເໜືອຄວາມຕ້ອງການ? ຜູ້ໂຄສະນານັ້ນ ກໍຄວນມີຈັນຍາບັນແດ່, ຄັນໃຈກວ້າງແທ້ໆ ກໍໃຫ້ຄິດເຖິງວ່າ “ເພິ່ນບໍ່ຮ້ອງ ຢ່າຂານ ເພິ່ນບໍ່ວານ ຢ່າຊ່ວຍ”, ອັນສອງມາ ພວກໝູ່ເຮົາທີ່ຊົມໃຊ້ ສື່ອອນລາຍ ແລະບໍ່ມັກໃນເລື່ອງຂອງ ປອມໆທີ່ວ່າ ກໍຈົ່ງມີສະຕິ ໃນການ ຕິດຕາມເພຈ໌ ຕ່າງໆ ແຕ່ດີແທ້ ຖ້າຖືກຄຸກຄາມ ຫຼື ລ່ວງລໍ້າເລື່ອງສິດທິສ່ວນບຸກຄົນແລ້ວ ກໍສາມາດແຈ້ງເຈົ້າໜ້າທີ່ໄດ້ ໂດຍສະເພາະ ດຽວນີ້ເພິ່ນມີ ສາຍດ່ວນປົກປ້ອງຜູ້ບໍລິໂພກ 1510​.

ແລະອັນສຸດທ້າຍ, ເຊື່ອວ່າທາງການເພິ່ນກໍໄດ້ເຂົ້າໃຈ ແລະຫຼີງເຫັນບັນຫາ ການໂຄສະນາຢາ ທີ່ມີຊັບພະຄຸນເກີນຈິງນີ້ແລ້ວ, ແນວໃດກໍຂໍໃຫ້ ຄວບຄຸມຂອບເຂດການໂຄສະນາ, ການນຳເຂົ້າຢາເສີມກຳລັງ, ອາຫານເສີມ ແລະອື່ນໆ ເພື່ອພາກັນປົກປ້ອງຂອງຈິງໄວ້ແດ່!