4 ວິທີໃນການເພີ່ມມູນຄ່າໃຫ້ລົດເມື່ອຕ້ອງເອົາໄປຂາຍຕໍ່
ການມີລົດຖືເປັນຄວາມສຸກຢ່າງໜຶ່ງໄດ້, ແຕ່ລົດກໍເປັນສິ່ງຂອງທີ່ມັນບໍ່ມີຊີວິດ ບໍ່ສາມາດຈະເວົ້າ ຫລື ສື່ສານກັບທ່ານໄດ້ ດັ່ງ ນັ້ນເມື່ອມັນຖືກຕຳ, ຖືກດາດ, ມີຮອຍຂູດຂີດທີ່ທ່ານບໍ່ເຄີຍສັງເກດເຫັນ ມັນກໍບໍ່ສາມາດບອກທ່ານໄດ້ ຜົນກໍຄືຕ້ອງເປັນໂຕທ່ານເອງທີ່ຈະຕ້ອງໝັ່ນກວດເຊັກສະພາບອາການຂອງລົດຢູ່ສະເໝີ ເພື່ອການໃຊ້ງານທີ່ຍາວນານ ຫລື ເຜື່ອທີ່ທ່ານຕ້ອງເອົາລົດໄປຂາຍຕໍ່.
ແນວໃດກໍຕາມ, ໃນການຂາຍລົດນັ້ນ ມັນເປັນສິ່ງຈຳເປັນຢ່າງຍິ່ງທີ່ທ່ານຈະຕ້ອງເຮັດໃຫ້ລົດຂອງທ່ານງາມ ແລະ ມີຄວາມ ພ້ອມໃນການໃຊ້ງານຢູ່ສະເໝີ. ມື້ນີ້ພວກເຮົາມີຄວາມຮູ້ກ່ຽວກັບການເພີ່ມມູນຄ່າຂອງລົດທີ່ທ່ານຈະເອົາໄປຂາຍຕໍ່ມາແນະນຳ.
– ທ່ານຈົ່ງປັບແຕ່ງມັນໃໝ່ Refurnishing : ຕາມທີ່ໄດ້ກ່າວໄວ້ຂ້າງເທິງ ເມື່ອທ່ານຂາຍລົດຂອງທ່ານໄປແລ້ວ ມັນກໍຈະກາຍເປັນລົດຄັນທຳອິດຂອງເຈົ້າຂອງຄົນໃໝ່ ດັ່ງນັ້ນ ເຂົາຍ່ອມຄາດຫວັງວ່າທຸກຢ່າງໃນລົດຂອງເຂົາຄວນຈະຢູ່ໃນສະພາບທີ່ດີທີ່ສຸດ, ແຕ່ຖ້າທ່ານຮູ້ໂຕວ່າບໍ່ໄດ້ບຳລຸງຮັກສາລົດຄັນນັ້ນໄດ້ດີພໍ ທ່ານກໍອາດຈະຫລຸດມູນຄ່າຂອງລົດລົງຕື່ມ ເພື່ອຈະໄດ້ບໍ່ເປັນການເອົາປຽບຜູ້ຊື້. ດັ່ງນັ້ນ, ກ່ອນທີ່ທ່ານຈະຂາຍລົດຂອງທ່ານ ຈະເປັນການດີກ່ວາຖ້າທ່ານເອົາລົດໄປກວດເຊັກສະພາບຢູ່ສູນບໍລິການກ່ອນ ເພື່ອທີ່ທ່ານຈະໄດ້ຮັບຮູ້ຂໍ້ບົກພ່ອງຂອງລົດຈາກຊ່າງຜູ້ຊ່ຽວຊານ.
ນອກຈາກນີ້, ຫາກມີຄວາມຈຳເປັນທີ່ຈະຕ້ອງປ່ຽນອຸປະກອນພາຍໃນລົດຂອງທ່ານ ທ່ານກໍຄວນປ່ຽນຈະດີກ່ວາ ເພາະການທີ່ ທ່ານດູແລເອົາໃຈໃສ່ລົດຂອງ ທ່ານກ່ອນທີ່ທ່ານຈະເອົາມັນອອກໄປຂາຍແບບນີ້ ມັນຍັງເປັນເຄື່ອງພິສູດໃຫ້ຜູ້ຊື້ຄົນໃໝ່ເຫັນນຳວ່າ ທ່ານເອົາໃຈໃສ່ຕໍ່ລົດຂອງທ່ານກ່ອນຂາຍ ແລະ ມັນກຸ້ມຄ່າແລ້ວ ສົມກັບລາຄາທີ່ທ່ານຕັ້ງເອົາໄວ້.
– ທ່ານຄວນມີເອກະສານທີ່ຖືກຕ້ອງ ແລະ ຄົບຖ້ວນ : ການມີເອກະສານທຸກຢ່າງກ່ຽວກັບລົດໄວ້ ບໍ່ພຽງແຕ່ຈະເຮັດໃຫ້ທ່ານບໍ່ຖືກດຳເນີນຄະດີທາງກົດໝາຍເທົ່ານັ້ນ, ແຕ່ມັນຍັງຊ່ວຍໃຫ້ທ່ານໄດ້ຮັບລາຄາທີ່ດີຂຶ້ນໃນການຂາຍລົດນຳອີກ.
– ຕ້ອງດຶງດູດສາຍຕາ : ຄວາມປະທັບໃຈຄັ້ງທຳອິດຖືວ່າເປັນຄວາມປະທັບໃຈທີ່ດີສຸດ ແລະ ຝັງໃຈເຮົາໄດ້ຫລາຍທີ່ສຸດ ການຂາຍລົດກໍໃຊ້ຫລັກການດຽວກັນນີ້ໄດ້ ເຖິງວ່າປັດໄຈດ້ານການເຮັດວຽກຂອງເຄື່ອງຈັກຈະມີອິດທິພົນຕໍ່ການຕັດສິນໃຈຊື້ລົດຫລາຍກ່ວາກໍຕາມ, ແຕ່ຖ້າທ່ານເຮັດຄວາມສະອາດ ແລະ ບຳລຸງຮັກສາລົດຢ່າງຖືກຕ້ອງ, ບໍ່ມີຮອຍບຸ້ມ ແລະ ຮອຍຂູດຂີດໃດໆ ມັນກໍຈະສາມາດດຶງດູດຄວາມສົນໃຈຈາກຜູ້ຊື້ໄດ້ດີກ່ວາ. ນອກຈາກນີ້, ບໍ່ພຽງແຕ່ພາຍນອກລົດທີ່ງົດງາມເທົ່ານັ້ນ ແຕ່ພາຍໃນຫ້ອງໂດຍສານ ລວມເຖິງແວ່ນໄຟຟ້າ, ລະບົບເຄື່ອງສຽງ, ລະບົບເຄື່ອງປັບອາກາດ ແລະ ອຸປະກອນອື່ນໆທັງໝົດຈະຕ້ອງມີການເຮັດວຽກຢ່າງມີປະສິດທິພາບນຳ.
– ການປະເມີນລົດຂອງທ່ານຈາກຜູ້ຊ່ຽວຊານ : ໃນປີທີ່ຜ່ານມາຕະຫລາດລົດໄດ້ມີການປ່ຽນແປງໄປຈຳນວນຫລາຍ ທັງນີ້ຜູ້ຄົນຈຳນວນຫລາຍມັກທີ່ຈະຊື້ລົດມື 1 ຫລາຍກ່ວາມື 2 ໂອກາດແບບນີ້ມີໃຫ້ເຫັນຫລາຍຂຶ້ນໃນກຸ່ມຜູ້ທີ່ມັກຂັບລົດມື 1. ແຕ່ແນວໃດກໍຕາມ, ຍັງມີອີກຫລາຍກຸ່ມຄົນທີ່ຫລົງໄຫລໃນລົດມືສອງ ຫລື ກຸ່ມຄົນທີ່ມີເງິນບໍ່ພຽງພໍຕໍ່ການຊື້ລົດມື 1 ກໍມີຄວາມສົນໃຈໃນການຊື້ລົດມື2 ຄືກັນ. ດັ່ງນັ້ນ, ມັນຈະເປັນການດີກ່ວາຫາກທ່ານເອົາລົດຂອງທ່ານເຂົ້າໄປຮັບການປະເມີນກວດເຊັກສະພາບ ແລະ ຕີລາຄາຈາກຜູ້ຊ່ຽວຊານເພື່ອໃຫ້ເຂົາປະເມີນມູນຄ່າທີ່ເໝາະສົມກັບລົດຂອງທ່ານ ເພາະອາດມີບາງລາຍການ ຫລື ມາດຕະຖານລາຄາໃນການປະເມີນມູນຄ່າລົດມື 2 ທີ່ທ່ານອາດຍັງບໍ່ຮູ້ກໍມີ.
