ລາວ-ໄທ ຮ່ວມຫາລືການເລັ່ງພັດທະນາລະບົບຂໍ້ມູນຕະຫລາດແຮງງານແຫ່ງຊາດ
ໃນວັນທີ 11 ຕຸລາ ນີ້, ຢູ່ ນະຄອນຫລວງວຽງຈັນ ໄດ້ມີກອງປະຊຸມຄົ້ນ ຄ້ວາ ແລະ ແລກປ່ຽນບົດຮຽນ ລະຫວ່າງ ລາວ ແລະ ໄທ ກ່ຽວກັບການສ້າງແບບຈຳລອງ ພະຍາກອນແຮງງານ, ເພື່ອພັດທະນາລະບົບຂໍ້ມູນຂ່າວສານຕະຫລາດແຮງງານ ແຫ່ງຊາດ ໃຫ້ເປັນຮູບປະທຳ ເພື່ອເຮັດໃຫ້ຜູ້ອອກແຮງງານ ແລະ ຜູ້ປະກອບການ ໄດ້ຮັບຂໍ້ມູນຂ່າວສານແຮງງານທີ່ຖືກຕ້ອງ ແລະ ສອດຄ່ອງກັບຄວາມເປັນຈິງ ໃນແຕ່ລະໄລຍະ ແລະ ທັງເປັນການເພີ່ມທະວີການປະສານສົມທົບກັບບັນດາຂະແຫນງການ ແລະ ທຸກພາກສ່ວນເສດຖະກິດ ສ້າງ ແລະ ພັດທະນາສີມືແຮງງານລາວ ສາມາດຕອບສະໜອງກຳລັງແຮງງານທີ່ມີຄຸນນະພາບ, ປະກອບສ່ວນເຂົ້າໃນການພັດທະນາເສດຖະກິດສັງຄົມ-ຂອງຊາດ, ໂດຍການເຂົ້າຮ່ວມຂອງ ທ່ານ ບຸນຄົງ ຫລ້າສຸກັນ ຮອງລັດຖະມົນຕີກະຊວງ ແຮງງານ ແລະ ສະຫວັດດີການສັງຄົມ.
ໃນໂອກາດນີ້, ທ່ານ ຮອງລັດຖະມົນຕີກະຊວງດັ່ງກ່າວ ມີຄຳເຫັນວ່າ: ໃນໄລະຍຜ່ານມາ ດ້ວຍຄວາມພະຍາຍາມຂອງກົມພັດທະນສີມືແຮງງານ ແລະ ຈັດຫາງານ ພາຍໃຕ້ການຊີ້ນຳຈາກຄະນະນຳກະຊວງ ແລະ ຄະນະກຳມາທິການແຫ່ງຊາດ ເພື່ອພັດທະນາຊັບພະຍາກອນມະນຸດ ພວກເຮົາໄດ້ມີຄວາມສຳເລັດບາງດ້ານທີ່ເປັນພື້ນຖານໃຫ້ແກ່ການສ້າງ ແລະ ພັດທະນາລະບົບຂໍ້ມູນຂ່າວສານຕະຫລາດແຮງງານໃຫ້ເປັນຮູບປະທຳ ໂດຍສະເພາະແມ່ນໄດ້ເຮັດປື້ມຄູ່ມືການປະຕິບັດວຽກງານຂໍ້ມູນຂ່າວສານຕະຫລາດແຮງງານ ແລະ ຂະຫຍາຍຂໍ້ມູນຂ່າວສານຕະຫລາດແຮງງານອອກໄປສູ່ 18 ແຂວງ ໃນທົ່ວປະເທດ, ເພື່ອເຮັດໜ້າທີ່ເກັບກຳຂໍ້ມູນ ແລະ ຂຶ້ນທະບຽນນັກຮຽນທີ່ຈົບໃໝ່ໃນສາຂາວິຊາຊີບຕ່າງໆ.
