ກະສິກໍາ ແລະ ປ່າໄມ້ ສະເໜີງົບປະມານ 100 ຕື້ກີບ ເພື່ອຟື້ນຟູການຜະລິດຫຼັງນໍ້າຖ້ວມ
ຮອງຫົວໜ້າກົມແຜນການ ແລະ ການເງິນ ກະຊວງ ກະສິກໍາ ແລະ ປ່າໄມ້ ໃຫ້ຮູ້ວ່າ: ໃນປີນີ້ລາວປະສົບກັບໄພພິບັດນໍ້າຖ້ວມ ຢ່າງໜັກໜ່ວງ ແລະ ເປັນວົງກວ້າງແຕ່ເໜືອຮອດໃຕ້ ຊຶ່ງໄດ້ສ້າງຄວາມເສຍຫາຍໃຫ້ແກ່ຊີວິດ, ຊັບສິນ, ພື້ນຖານໂຄງລ່າງ ແລະ ເຮືອນຊານບ້ານຊ່ອງຂອງປະຊາຊົນເປັນຈໍານວນຫຼາຍ ໂດຍສະເພາະເນື້ອທີ່ການຜະລິດກະສິກໍາເສຍຫາຍຫຼາຍກວ່າ 92 ພັນເຮັກຕາ ກວມ 13% ຂອງເນື້ອທີ່ທໍາການຜະລິດລະດູຝົນທັງໝົດ ຖືວ່າກາຍຄ່າມາດຕະຖານຂອງການຮັບປະກັນຄວາມໝັ້ນຄົງທາງດ້ານສະບຽງອາຫານຂອງປະເທດ ທີ່ບໍ່ເຄີຍມີມາກ່ອນ, ຜົນເສຍຫາຍທັງໝົດຕົກເປັນມູນຄ່າປະມານ 1.260 ຕື້ກີບ ເມື່ອທຽບໃສ່ໄພພິບັດໃນປີ 2011 ເພີ່ມຂຶ້ນ 2 ເທົ່າຕົວ.
ເພື່ອຕອບສະໜອງ ແລະ ດຸນດ່ຽງສະບຽງອາຫານ, ຮັບປະກັນຄວາມສະຫງົບ, ຄວາມໝັ້ນຄົງທາງດ້ານສະບຽງອາຫານຂອງປະເທດເຮົາໄດ້ນັ້ນ. ໃນລະດູແລ້ງປີນີ້, ກະຊວງກະສິກໍາ ແລະ ປ່າໄມ້ ໄດ້ວາງຄາດໝາຍສູ້ຊົນເຮັດນາແຊງໃຫ້ໄດ້ 1 ແສນເຮັກຕາ, ພ້ອມທັງສູ້ຊົນຜະລິດເປັນສິນຄ້າໃນເນື້ອທີ 185 ພັນເຮັກຕາ, ເພື່ອເປັນລາຍຮັບໜຶ່ງໃຫ້ແກ່ປະຊາຊົນ ບ່ອນໃດທີ່ບໍ່ມີເງື່ອນໄຂກໍເຮັດນາແຊງ ແລະ ກໍສົ່ງເສີນໃຫ້ປູກພືດ ແລະ ການລ້ຽງສັດຕ່າງໆທີ່ມີທ່າແຮງ ເພື່ອທົດແທນຜົນຜະລິດທີ່ເສຍໄປຈາກໄພພິບັດຄັ້ງຮ້າຍແຮງນີ້.
ເພື່ອເຮັດແນວໃດໃຫ້ການຜະລິດລະດູແລ້ງໃຫ້ໄດ້ຮັບຜົນ, ທາງບໍລິສັດ ໄຟຟ້າ ມະຫາຊົນ ໄດ້ສະໜອງທຶນປະມານ 3 ຕື້ກີບ ແລະ ໄດ້ຈາກອົງການຈັດຕັ້ງສາກົນ 1,2 ຕື້ກີບ ເພື່ອເປັນພື້ນຖານຊື້ແນວພັນ ສະໜອງໃຫ້ແກ່ບັນດາແຂວງທີ່ໄດ້ຮັບຜົນກະທົບຈາກໄພພິບັດນໍ້າຖ້ວມ ແລະ ຍັງຈະສືບຕໍ່ຍາດແຍ່ງການຊ່ວຍເຫຼືອຈາກໂຄງການຕ່າງໆທີ່ມີຕື່ມ, ພ້ອມຍັງໄດ້ສະເໜີງົບປະມານຕໍ່ລັດຖະບານ ປະມານ 100 ຕື້ກີບ ເພື່ອນໍາໃຊ້ເຂົ້າໃນການຟື້ນຟູ ເປັນຕົ້ນແມ່ນມາສ້ອມແປງລະບົບຊົນລະປະທານເໝືອງຝ່າຍທີ່ເປ່ເພ ແລະ ຊື້ແນວພັນເຂົ້າ, ພັນພືດ ແລະ ແນວພັນສັດ ເພື່ອສະໜອງໃຫ້ແກ່ຜູ້ທີ່ຖືກຜົນກະທົບ. ສ່ວນແນວພັນທີ່ຍັງຕ້ອງການຫຼາຍທີ່ສຸດ ຊຶ່ງຈະຕ້ອງໄດ້ຊື້ນໍາປະເທດເພື່ອນບ້ານຄື: ແນວພັນພືດຕ່າງໆເຊັ່ນ: ພືດຖົ່ວ, ໝາກແຕງ, ຜັກກາດ, ສາລີຫວານ ແລະ ອື່ນໆ. ນອກນີ້, ຍັງຕ້ອງການແນວພັນສັດລ້ຽງ ປະເພດງົວ ແລະ ຄວາຍ . ສ່ວນແຂວງທີ່ຕ້ອງໄດ້ສະໜອງແນວພັນຫຼາຍກວ່າໝູ່ແມ່ນ 4 ແຂວງຫຼັກທີ່ເປັນອູ່ເຂົ້າອູ່ປາ (ແຂວງ ວຽງຈັນ, ນະຄອນຫຼວງ, ຄໍາມ່ວນ ແລະ ສະຫວັນນະເຂດ), 4 ແຂວງດັ່ງກ່າວນີ້, ສາມາດຜະລິດສະບຽງອາຫານໄດ້ກວ່າ 2/3 ຂອງທົ່ວປະເທດ.
ຜູ້ລາຍງານຂ່າວໃຫ້ຮູ້ຕື່ມວ່າ: ໃນນາມເປັນ ສະມາຊິກຄັງເຂົ້າອາຊຽນນັ້ນ ກະຊວງກະສິກໍາໄດ້ຂໍແນວພັນເຂົ້າ ຈໍານວນ 1 ພັນໂຕນ ເພື່ອຈະສຸມໃສ່ສະເພາະແຂວງອັດຕະປື ເພື່ຶອຟື້ນຟູຊີວິດການເປັນຢູ່ຂອງເຂົາເຈົ້າດີຂຶ້ນ ແລະ ມີແນວພັນເຂົ້າສືບຕໍ່ຊຸກຍູ້ການຜະລິດໃນລະດູແລ້ງກໍຄືໃນລະດູຕໍ່ໄປ. ຕໍ່ກັບສະພາບດັ່ງກ່າວ, ລັດຖະບານໄດ້ມີນະໂຍບາຍ ຕໍ່ຜູ້ໄດ້ຮັບຜົນກະທົບ 100% ແມ່ນຈະສະໜອງແນວພັນໃຫ້ລ້າ, ສ່ວນຄອບຄົວທີ່ບໍ່ຖືກທົບຮ້າຍແຮງພວກເຮົາຈະໃຫ້ເປັນທຶນໝູນວຽນ.
