ໂກນບານຍິງທີມຊາດລາວ ໄປບໍ່ເຖິງຝັນ ຕົກຮອບເອຊຽນພາລາເກມຄັ້ງທີ 12
ໃນວັນທີ 10 ຕຸລາຜ່ານມາ ນັກກິລາໂກນບານຍິງທີມຊາດລາວ ລົງສະໜາມຄັ້ງສຸດທ້າຍເສຍໃຫ້ ທີມຊາດໄທ 2-3 ໃນການແຂ່ງຂັນເອຊຽນພາລາເກມຄັ້ງທີ 12 ທີ່ປະເທດອິນໂດເນເຊຍ ຈັດຂຶ້ນລະຫວ່າງວັນທີ 6-14 ຕຸລາ.
ທ່ານ ລອນຄໍາ ອິນທອງໄຊ ຄູຝຶກນັກກິລາໂກນບານຍິງທີມຊາດລາວ ໃຫ້ສໍາພາດວ່າ: ການແຂ່ງຂັນໂກນບານພິການຕາຄັ້ງນີ້ມີ 6 ປະເທດເຂົ້າຮ່ວມຄື: ລາວ, ໄທ, ອີຣານ, ອິນໂດເນເຊຍ (ເຈົ້າພາບ), ຍີ່ປຸ່ນ ແລະ ຈີນ ເຊິ່ງນັກກິລາທີມຊາດລາວໄດ້ລົງສະໜາມ 5 ຄັ້ງ ສົ່ງຜົນໃຫ້ ທີມຊາດລາວ ຕົກຮອບໃນຮອບຄັດເລືອກ. ແນວໃດກໍຕາມ ການແຂ່ງຂັນຄັ້ງນີ້ ນັກກິລາຂອງພວກເຮົາໄດ້ເຮັດຢ່າງເຕັມທີ່ທີ່ສຸດແລ້ວ ເຖິງວ່າຜົນການແຂ່ງຂັນອອກມາບໍ່ຄ່ອຍດີປານໃດກໍຕາມ ແຕ່ພວກເຮົາກໍຈະພະຍາຍາມຝຶກຊ້ອມລູກທີມຂອງຕົນເອງໃຫ້ດີຂຶ້ນຕື່ມ ເພື່ອສ້າງຜົນງານໂດດເດັ່ນໃນເວທີພາກພື້ນ ແລະ ສາກົນອີກຄັ້ງ.
ການແຂ່ງຂັນເອຊຽນພາລາເກມຄັ້ງທີ 12 ທີ່ປະເທດອິນໂດເນເຊຍ, ສປປ ລາວ ສົ່ງເຂົ້າຮ່ວມທັງໝົດ 4 ປະເພດກິລາຄື: ແລ່ນ-ລານ, ລອຍນໍ້າ, ຍົກນໍ້າໜັກ ແລະ ໂກນບານຍິງ. ຜ່ານການແຂ່ງຂັນເປັນເວລາ 3 ມື້ ນັກກິລາທີມຊາດລາວ ສາມາດຍາດໄດ້ 1 ຫລຽນຄໍາ ໃນປະເພດກິລາຍົກນໍ້າໜັກ 49 ກິໂລ.
